Hita Taratra eo Amin’ny Fanompoantsika ny Fangorahana
1 Hitan’i Jesosy fa “nampahorina sady naparitaka toy ny ondry tsy misy mpiandry” ireo olona maro be nihaino azy. (Matio 9:36) Tamim-pitiavana sy hatsaram-panahy, dia nampianatra azy ireo ny fitsipik’i Jehovah izy, ary nampionona azy ireo. Ankoatra izany, dia nangoraka azy ireo izy rehefa nanome izay nilainy teo amin’ny lafiny ara-panahy. Lasa manahaka ny toe-tsain’i Jesosy sy manana fihetseham-po toy ny azy isika, rehefa misaintsaina izay nataony, ka hahay hangoraka ny olona itoriantsika koa.
2 Eritrereto kely, ohatra, izay nataon’i Jesosy rehefa nisy olona tena nitady fanampiana nanatona azy. (Lioka 5:12, 13; 8:43-48) Niahy an’ireo nila fanampiana manokana koa izy. (Marka 7:31-35) Nahalala ny fihetseham-pon’ny hafa izy, ary nihevitra izay hahasoa azy ireo. Tsy nitsara ivelany fotsiny izy. (Lioka 7:36-40) Nanahaka tanteraka ny fangoraham-pon’Andriamanitsika tokoa i Jesosy.
3 “Nangoraka”: Tsy noho izy nahatsapa adidy fotsiny no nanaovan’i Jesosy ny fanompoany, fa noho izy “nangoraka” ny olona koa. (Marka 6:34) Tsy misy hafa amin’izany no ataontsika. Tsy mampita hafatra amin’ny olona fotsiny isika, fa miezaka mamonjy ny ain’izy ireo koa, izay tena sarobidy. Miezaha mamantatra ny anton’ny fihetsiky ny olona. Nahoana izy, ohatra, no manahy na sahiran-tsaina? Tsy niraharaha azy ve ireo mpitondra ao amin’ny fivavahan-diso, ary namitaka azy? Mety handrisika ny olona hihaino ny vaovao tsara isika, raha tena miahy azy.—2 Kor. 6:4, 6.
4 Manohina ny fo ny fangorahana. Namoy ny zanany vavikely telo volana, ohatra, ny vehivavy iray, ka tena ory. Nisy Vavolombelona roa tonga nitsidika azy ka nampandrosoiny, satria tiany haseho tamin’izy ireo fa diso hevitra izy ireo momba ny antony amelan’Andriamanitra ny fijaliana hisy. Nilaza anefa io vehivavy io tatỳ aoriana hoe: “Tena nangoraka izy ireo rehefa nihaino ahy. Nahatsiaro ho maivamaivana kokoa aho rehefa avy niresaka taminy, ka nanaiky hotsidihiny indray.” Miezaka mangoraka ny olona tsirairay hitanao eny amin’ny fanompoana ve ianao?
5 Ho afaka hampionona ny hafa tokoa isika, rehefa miezaka mangoraka azy. Manome voninahitra an’i Jehovah, ilay “Rain’ny fangorahana”, isika raha manao izany.—2 Kor. 1:3.