Ampio ny Mpianatra ho Tia ny Toetran’i Jehovah
1 Tsy ny fahamarinana fototra ao amin’ny Baiboly ihany no ampianarintsika ny olona. Manampy azy ireo koa isika mba hahafantatra an’i Jehovah, ka ho tia ireo toetrany tsy manan-tsahala. Misy vokany lehibe eo amin’ny olona tso-po, ny fahalalany ny marina momba an’Andriamanitra. Mandrisika azy ireo hiova izany, ‘amin’izay dia handeha mendrika an’i Jehovah izy ireo mba hankasitrahany tanteraka azy.’—Kol. 1:9, 10; 3:9, 10.
2 Boky fianarana vaovao: Vao manomboka ny boky Ampianarina, dia misarika ny saina ho amin’ny toetran’i Jehovah. Mamaly ireto fanontaniana ireto ny toko voalohany: Tena miahy anao ve Andriamanitra?, Inona avy no toetrany?, ary Afaka mifandray akaiky aminy ve ianao? Asongadin’io toko io koa fa masina i Jehovah (feh. 10), tia rariny, miahy antsika (feh. 11), be fitiavana (feh. 13), mahery (feh. 16), mamindra fo, miantra, mamela heloka, manam-paharetana, ary mahatoky (feh. 19). Mamintina an’izany toy izao ny fehintsoratra faha-20: “Vao mainka ianao hino fa tena misy izy, rehefa fantatrao tsara kokoa izy. Hitombo koa ny fitiavanao azy ary hahatsiaro ho akaiky azy kokoa ianao.”
3 Ahoana no azontsika ampiasana ny boky Ampianarina, mba hanampiana ny mpianatra Baiboly hanatona akaiky an’i Jehovah? Rehefa avy mandinika fehintsoratra manasongadina ny iray amin’ny toetran’Andriamanitra isika, dia afaka manontany an’ilay mpianatra hoe: “Inona no ianaranao momba an’i Jehovah avy amin’izany?” na “Hitanao avy amin’izany ve fa miahy anao Andriamanitra? Nahoana?” Tsara ny manontany an’ilay mpianatra toy izany tsindraindray. Mampianatra azy hisaintsaina momba izay ianarany isika amin’izany, ary manampy azy ho tia kokoa ireo toetra tsy manan-tsahalan’i Jehovah.
4 Manaova famerenana: Isaky ny mifarana ny toko tsirairay, dia asao ilay mpianatra hilaza amin’ny fomba fiteniny, ny hevitra tsirairay ao amin’ilay efajoro hoe “Inona no Ampianarin’ny Baiboly?” Asongadino ireo andinin-teny voatonona. Mety hanontany toy izao ianao indraindray, mba hampirisihana an’ilay mpianatra hilaza ny heviny: “Ahoana no fahitanao an’izany zavatra ampianarin’ny Baiboly izany?” Hanasongadina ny hevi-dehibe ianao amin’izay, sady hahafantatra tsara izay tena inoan’ilay mpianatra. Hanampy azy hifandray akaiky amin’i Jehovah izany.