Nanankinana Harena Isika
1 Sarobidy tamin’ny apostoly Paoly ny fitoriana. Noheveriny ho toy ny “harena” io asa nanirahan’Andriamanitra azy io. (2 Kor. 4:7) Niaritra zava-tsarotra sy fanenjehana izy, mba hanatontosana an’io asa io. Tsy nitandro hasasarana izy nitory tamin’izay rehetra sendra azy. Nanao dia lavitra maro izy, na an-tanety na an-dranomasina, nefa sarotra sy nampidi-doza izany. Ahoana no hanahafantsika an’i Paoly, ka hanehoantsika fa sarobidy amintsika koa ny fanompoana? (Rom. 11:13) Nahoana ny fanompoantsika no harena tsy manan-tsahala?
2 Harena tsy manan-tsahala: Matetika ny harena ara-bakiteny no mitondra fahoriana, ary voafetra na mihelina ihany ny soa entiny. Ny fanompoana kosa anefa mitondra soa maharitra ho antsika sy ho an’ny hafa. (1 Tim. 4:16) Izy io no manampy ny olona hahalala an’i Jehovah, sy hanova ny fiainany, ary hanantena hiaina mandrakizay. (Rom. 10:13-15) Manjary tena misy heviny ny fiainantsika, rehefa heverintsika ho sarobidy ny fanompoana. Mahatsiaro ho afa-po koa isika satria nahavita zavatra tsara, ary velombelona ny fanantenantsika.—1 Kor. 15:58.
3 Porofoy fa sarobidy aminao ny harenanao: Raha vonona hamoy zavatra betsaka ho an’ny zavatra iray isika, dia manaporofo izany fa sarobidy amintsika izy io. Tombontsoa tokoa ny hoe manokana fotoana sy hery mba hiderana an’i Jehovah! (Efes. 5:16, 17) Ny fanompoana an’Andriamanitra no tokony ho sarobidy kokoa amintsika, ka handaniantsika fotoana bebe kokoa noho ny zavatra hafa. Manan-javatra tena sarobidy hozaraina amin’ny hafa isika, ka maniry hitory azy io amin-jotom-po. Mailaka ny hitory ny vaovao tsara koa isika, isaky ny afaka manao izany.
4 Tsy afenina ny harena sarobidy, fa aseho mba ho hitan’ny hafa. Raha heverintsika ho toy ny harena ny fanompoana, dia hataontsika loha laharana eo amin’ny fiainantsika izany. (Matio 5:14-16) Aoka àry isika hanahaka ny apostoly Paoly, ka hankasitraka ny fanompoana amin’ny fontsika manontolo. Aoka koa isika hanaporofo foana fa tena sarobidy amintsika izy io, ary heverintsika ho toy ny harena.