Inona no Hataonao eo Amin’ny Fiainana?
1 Matetika ny ankizy no misy manontany hoe: “Inona no hataonao rehefa lehibe?” Raha lehilahy ianao, dia mety ho niteny hoe te ho mpitondra fiaramanidina, na dokotera, na mpiandraikitra ny faritra. Raha vehivavy kosa ianao, dia mety ho niteny hoe te ho mpihira, na mpanao volo, na misionera. Lehibe ianao izao, ka tsy maintsy mieritreritra hoe: ‘Inona no hataoko eo amin’ny fiainana?’ Efa vonona hanapa-kevitra ve ianao?
2 Hanampy anao hahay hanapa-kevitra ilay DVD navoakan’ny fandaminan’i Jehovah hoe Manontany ny Tanora—Inona no Hataoko eo Amin’ny Fiainana? Jereo izy io, ary eritrereto tsara ny tantara sy ny fanadinadinana, ary ny fanazavana fanampiny rehetra ao. Ho hitanao ao amin’ilay hoe “Fizarana Lehibe” ny ao anatin’ilay DVD.
3 Tantara: Jereo ilay tantara ary valio ireto: 1) Inona no itovizan’i Andry sy Timoty, ilay voaresaka ao amin’ny Soratra Grika? (Asa. 16:1; 1 Tim. 4:8; 2 Tim. 1:5) 2) Iza avy no nampirisika mafy an’i Andry ho lasa mpihazakazaka mahay, ary tamin’ny fomba ahoana? 3) Iza avy no nampirisika an’i Timoty sy Andry hanao safidy tsara, ary tamin’ny fomba ahoana? (2 Tim. 1:1-4; 3:14, 15) 4) Nanampy an’i Andry hanao inona ny Matio 6:24 sy ny Filipianina 3:8, ary ahoana koa no anampian’ireo anao?
4 Ampahany: Jereo ilay tantara manontolo. Ivereno jerena ireto ampahany ireto avy eo, ka valio izao: “Paoly sy Timoty”: Inona no hafatra farany nomen’i Paoly an’i Timoty? (2 Tim. 4:5) “Manompoa An’i Jehovah Araka Izay Fara Herinao”: Inona no tanjonao eo amin’ny fanompoana? “Miandany Amin’i Jehovah”: Inona no tena mahasambatra? “Torohevitr’i Bebe”: Diso ve ianao raha te halaza eo amin’ny tontolon’i Satana? Nahoana? (Mat. 4:9) “Tsy Misy Nenina”: Inona no hanampy anao hanana fiainana mahafa-po?—Ohab. 10:22.
5 Fanadinadinana: Jereo ireto ampahany ireto, ary lazao hoe inona no azonao atao mba hanomezana ny tsara indrindra ho an’i Jehovah? 1) “Hikatsaka Zava-poana sa Hanokan-tena ho An’Andriamanitra?” (1 Jaona 2:17); 2) “Mianara Mankafy ny Fanompoanao” (Sal. 27:14); ary 3) “Fahafahana Hanompo Bebe Kokoa.”—Mat. 6:33.
6 Jery todika: Ahoana no havalinao an’ireto: 1) Inona no nokatsahin’ilay rahalahy sy ilay anabavy, ary nahoana? 2) Inona avy no zava-bitany tamin’izany? 3) Inona no fiovana lehibe teo amin’ny fiainan’izy ireo? (2 Kor. 5:15) 4) Inona no asa hafa nifantohan’izy ireo, ary inona no nahatonga azy ireo hiaiky fa tsy afaka nikatsaka zavatra roa izy ireo? 5) Nanenina ve izy ireo nanova ny tanjony teo amin’ny fiainana? 6) Inona tamin’ny tenin’izy ireo no nanampy anao hieritreritra tsara izay tokony hataonao eo amin’ny fiainana?
7 Fanadinadinana fanampiny: Inona tamin’ireto fanadinadinana ireto no manampy anao hanompo an’i Jehovah bebe kokoa? 1) “Ny Hasarobidin’ny Fianarana Samirery”, 2) “Lafiny Samihafa Amin’ny Fanompoana”, 3) “Fanompoana ao Amin’ny Betela”, 4) “Fampiofanana ho Misioneran’i Gileada”, ary 5) “Sekoly Fampiofanana ho Amin’ny Fanompoana.” Jereo ilay hoe “Fanondroana Boky sy Gazety Manazava An’ireto.” Vakio izay lahatsoratra tena mahaliana anao ao.
8 Fantatrao amin’izay àry ve izay hataonao eo amin’ny fiainana? Hoy i Paoly tamin’i Timoty: “Eritrereto tsara izany, ary aoka ianao hifantoka tanteraka amin’izany, mba hiseho amin’ny rehetra ny fandrosoanao.” (1 Tim. 4:15) Mampirisika anao koa izahay mba hanao toy izany rehefa avy mijery an’io DVD io. Iangavio i Jehovah hanampy anao hahay hanapa-kevitra. Ho faly sy ho afa-po ianao dieny izao, ary handray valisoa sy ho sambatra rahatrizay.