Ampionòny Ireo Torotoro Fo
1 Mbola tsy nila fampiononana noho ny amin’izao fotoana izao mihitsy ny olombelona. Manaraka ny fitarihan’i Kristy Jesosy Mpanjakantsika isika, ka miezaka ‘manasitrana ny torotoro fo’, toy ny nataony.—Isaia 61:1.
2 Fomba hampiononana: Tokony hahay handanjalanja sy hampahery isika rehefa mitory, raha te hampionona ny olona. Miezaka isika mba tsy hiresaka be loatra momba ny faharatsiana sy ny fampianaran-diso, fa hanasongadina kosa ny fahamarinana araka ny Soratra Masina sy ny fanantenana mahafaly avy amin’Andriamanitra. Tsy midika anefa izany hoe tsy tokony hiresaka momba ny Hara-magedona isika. Nirahina hitory ny “taona ankasitrahan’i Jehovah sy [ny] andro famalian’Andriamanitsika” isika, ary “hananatra ny ratsy fanahy, hialany amin’ny làlany ratsy.” Miresaka amin’ny olona mahakasika ny Hara-magedona sy ny vokatr’izany àry isika, nefa tsy izany no tokony hibahan-toerana eo amin’ny resaka ataontsika, fa ny vaovao tsaran’ny fanjakan’Andriamanitra.—Isaia 61:2; Ezek. 3:18; Matio 24:14.
3 Rehefa mitory isan-trano: Matetika isika no mahita olona kivy noho ny aretina, ny fahafatesan’ny havana, ny tsy rariny, ary ny olana ara-bola. Manahaka an’i Kristy isika, ka ‘mangoraka’ sy miombom-pihetseham-po amin’ny olona mihaona amintsika eny amin’ny fanompoana. (Lioka 7:13; Rom. 12:15) Mety hamaky andinin-teny iray na roa mifandray amin’ilay olana mahazo azy isika. Tokony havelantsika hilaza ny fihetseham-pony koa anefa izy, mba hampisehoana fa “mailaka hihaino” isika. (Jak. 1:19) Hahay hampionona azy kokoa isika, raha mihaino azy.
4 Afaka milaza toy izao isika, amin’ny fotoana mampety azy: “Misy teny mampahery tiako horesahina aminao ato amin’ny Baiboly.” Tokony hahay handanjalanja isika, ka tsy hanohitra izay hevi-diso rehetra mety holazain’ilay olona. Ny hampahery sy hampionona ny fon’ny olona amin’ny alalan’ny Soratra Masina no tokony ho tanjontsika. Azonao ampiasaina ny boky Ny Fomba Fanjohian-kevitra avy Amin’ny Soratra Masina, pejy 135-139, eo ambanin’ny lohateny hoe “Fampaherezana.” Azonao omena ilay taratasy mivalona Fampiononana ho An’ireo Ketraka koa ilay olona, ary afaka miara-mandinika azy io ianareo.
5 Mitadiava fomba hampiononana ny hafa: Hitanao ve hoe mila fampiononana ny mpiara-monina iray, na mpiara-miasa, na mpiara-mianatra, na mpianakavy? Nahoana raha miezaka mitsidika azy any an-tranony, mba hampionona azy amin’ny alalan’ny Soratra Masina? Fantaro ny antony ilany fampiononana, ary omano izay holazainao. Misy manoratra taratasy na miantso an-telefaonina, mba hampiononana. Handrisika antsika hahay hiombom-pihetseham-po amin’ny hafa sy hampionona amin’ny alalan’ny Soratra Masina ny tena fitiava-namana.—Lioka 10:25-37.
6 Nirahina hampionona ny ory sy hampahery ny ketraka isika, ary hanampy azy ireo hanantena hoavy sambatra. Izany fampiononana izany no ilain’ny olona eran-tany. Mitondra fampiononana sy fanantenana ho an’ny olona tso-po, ny firesahana amim-pifaliana amin’izy ireo ny zava-tsoa maro ampanantenain’Andriamanitra. Enga anie hotadidintsika foana fa mila manasitrana ny torotoro fo isika.