Ampionòny ny Malahelo
1. Nahoana no mila ampiononina ny olona maty havana na namana?
1 Tena mafy ny maty havana na namana, indrindra ho an’ireo tsy manana fanantenana momba ilay Fanjakana. (1 Tes. 4:13) Maro no mieritreritra hoe: ‘Nahoana no maty ny olona? Inona no manjo azy ireny? Mbola hifankahita indray ve izahay?’ Ireto àry misy fomba azo ampiononana ny olona malahelo, satria maty havana na namana.—Isaia 61:2.
2. Tokony hiresaka ela ve isika, raha milaza ny olona itoriantsika fa misy fahoriana ao aminy?
2 Rehefa mitory isan-trano: Mety hilaza ny olona itoriantsika fa misy fahoriana ao aminy. Malahelo be ve izy? Feno olona mitomany ve ao amin’ilay trano? Aleo àry tsy miresaka ela. (Mpit. 3:1, 7) Alohan’ny handaozana azy anefa, dia azo atao ny mitsapa alahelo vetivety, ary manome taratasy mivalona, gazety, na bokikely mampahery. Afaka miverina isika amin’ny fotoana mety aminy, ary mampiasa Baiboly mba hampiononana azy bebe kokoa.
3. Raha afaka miresaka ela kokoa amin’ilay olona isika, inona avy no andinin-teny azo vakina aminy?
3 Mety ho azo atao ihany anefa indraindray ny miresaka ela kokoa. Tsy fotoana hanitsiana ny hevi-diso lazain’ilay olona amin’izay. Azo atao fotsiny ny mamaky ny fampanantenana fitsanganana amin’ny maty resahin’ny Baiboly. (Jaona 5:28, 29) Na azo hazavaina aminy ny momba ny maty. (Mpit. 9:5, 10) Mety hampionona azy koa ny famakiana fitantarana iray momba ny fitsanganana amin’ny maty. (Jaona 11:39-44) Na azo vakina aminy ny tenin’i Joba. Nanantena io mpanompon’i Jehovah nahatoky io fa mbola hatsangany. (Joba 14:14, 15) Azo atao avy eo ny manome taratasy mivalona na bokikely, toy ilay hoe Inona no Mitranga Amintsika Rehefa Maty Isika?, na Rehefa Nodimandry ny Olona Iray Tianao. Azo omena ny boky Ampianarina koa izy, ka aseho azy ny toko 6. Afaka mifanao fotoana ianareo avy eo, mba hanohizana ilay resaka.
4. Amin’ny fotoana toy inona isika no afaka mampionona ny olona?
4 Amin’ny fotoana hafa: Misy lahatenim-pandevenana indraindray any amin’ny Efitrano Fanjakana. Jereo raha misy olona tsy Vavolombelona tonga any. Manomàna àry boky sy gazety ho azy ireo, fa mety hampahery azy izany. Azo atao koa indraindray ny mamaky filazana manjo, ary manoratra taratasy fohy hampiononana ilay fianakaviana. Nisy mpitory nandefa taratasy ho an’ny lehilahy iray maty vady. Nampiarahiny tamin’ny taratasy mivalona ilay izy. Nankany an-tranon’ilay mpitory ilay lehilahy sy ny zanany vavy avy eo. Hoy izy: “Ianao ve ilay nanoratra tamiko? Mba te hahafantatra bebe kokoa momba ny Baiboly aho!” Nanaiky hianatra izy mianaka, ary nanatrika fivoriana.
5. Nahoana isika no tokony hanararaotra hampionona an’ireo nidonam-pahoriana?
5 Hoy ny Mpitoriteny 7:2: “Tsara ny mankamin’ny trano misy fisaonana noho ny mankamin’ny trano misy fanasana.” Matetika no vonona kokoa hihaino ny Tenin’Andriamanitra ny olona nidonam-pahoriana, noho ny olona manao fety. Tokony hanararaotra hampionona an’ireo nidonam-pahoriana àry isika rehetra, amin’ny fotoana mety amin’izany.