“Ento ny Ziogako”
1 Maro ny zavatra manahiran-tsaina sy mampitebiteby eto amin’ity tontolo ity. Mahazo famelombelomana anefa isika, rehefa manaiky an’ilay fanasan’i Jesosy hoe: “Ento ny ziogako.” (Matio 11:29, 30) Rehefa manaiky hitondra ny ziogan’i Jesosy isika, dia mandray anjara amin’ny asa iray sarotra nefa mamelombelona. Anisan’io asa io ny fitoriana ny vaovao tsara momba ilay Fanjakana, sy ny fanampiana ny olona hahazo famelombelomana toa antsika koa.—Matio 24:14; 28:19, 20.
2 Mamelombelona ny fanompoana: Tsy naniry hanampy trotraka ny enta-mavesatra nentin’ny mpanara-dia azy i Jesosy. Tiany hesorina kosa ny enta-mavesatr’izy ireo, ka hatakalo ny entany maivan-kely. Raha manaiky an’izany fanasana izany isika, dia tsy hovesaran’ny fanahiana sy ny hakiviana eto amin’ity tontolo ity, ary tsy ho variana hikatsaka harena tsy azo antoka. (Lioka 21:34; 1 Tim. 6:17) Ary na dia be atao aza isika sady tsy maintsy miasa mba hivelomana, dia ny fanompoana an’Andriamanitra no ataontsika loha laharana eo amin’ny fiainana. (Matio 6:33) Hamelombelona antsika ny fanompoana fa tsy ho enta-mavesatra, raha ataontsika an-tsaina foana hoe inona no zava-dehibe indrindra.—Fil. 1:10.
3 Mahafinaritra antsika ny miresaka ny zavatra tiantsika. (Lioka 6:45) Tia an’i Jehovah ny Kristianina rehetra, ary zava-dehibe amintsika ireo fitahiana ampanantenainy amin’ny alalan’ny Fanjakany. Tena mamelombelona àry ny miresaka momba “ny vaovao tsara momba ny zava-tsoa”, ary koa ny miala kely amin’ireo zavatra mampanahy eo amin’ny fiainana, rehefa manompo. (Rom. 10:15) Arakaraka ny anaovantsika asa iray no ahaizantsika an’ilay izy, sy ahitantsika fifaliana. Hahazo famelombelomana bebe kokoa àry isika, raha mampitombo ny fanompoantsika. Mampahery tokoa ny mahita olona mandray tsara rehefa mitory! (Asa. 15:3) Ary na dia tsy mandray aza ny olona na manohitra, dia mbola hamelombelona antsika foana ny fanompoana, raha ataontsika ao an-tsaina foana hoe mahafaly an’i Jehovah ny ezaka ataontsika, ary noho ny fitahiany no ahazoantsika an’ireo vokatra tsara rehetra mety ho hitantsika.—Asa. 5:41; 1 Kor. 3:9.
4 Raha manaiky ny fanasan’i Jesosy isika, dia hanana tombontsoa hanompo miaraka amin’io Vavolombelon’i Jehovah toa antsika io. (Isaia 43:10; Apok. 1:5) Tsy misy zavatra mamelombelona noho izany!