Ampianaro ho Tia An’i Jehovah ny Olona
1. Inona no nahasarika ny olona sasany hanatona an’i Jehovah?
1 Tsaroanao ve ny voalohany nandrenesanao momba an’i Jehovah? Inona no nahasarika anao taminy? Mety hilaza ny olona tso-po maro fa voasarika hanatona an’ilay Mpamorona izy, rehefa nahalala ireo toetrany miavaka, indrindra fa ny fangorahany sy ny fitiavany.—1 Jaona 4:8.
2, 3. Ahoana no azo ampiasana ny boky Ampianarina mba hanampiana ny olona ho tia an’i Jehovah bebe kokoa?
2 “Izy no Andriamanitsika”: Asongadin’ny boky Ampianarina, fa be fitiavana i Jehovah, ary tena mila mifandray akaiky aminy isika isam-batan’olona. Ahoana no anampiana ny olona ho tia an’Andriamanitra bebe kokoa rehefa mampianatra amin’io boky io? Rehefa misy fanazavana vaovao amin’ilay olona, ohatra, dia afaka mampisaintsaina azy isika amin’ny fanontaniana hoe: “Mampiseho inona momba an’i Jehovah izany?” na “Nahoana izany no manaporofo fa i Jehovah no Ray tsara indrindra ho antsika?” Hanampy an’ilay mpianatra hanana fifandraisana maharitra amin’i Jehovah ny fomba fampianatra toy izany.
3 Raha ampiantsika ny mpianatra hahatsapa fa voninahitra ny mianatra momba an’ilay tena Andriamanitra velona, dia hiaiky izy ireo hoe: “Izy no Andriamanitsika”, araka ny tenin’i Isaia. (Isaia 25:9) Rehefa manazava ny tenin’Andriamanitra isika, dia ilaina antitranterina tsara ny fitahiana ho azon’ny olombelona rehefa tanteraka ny fikasan’i Jehovah, amin’ny alalan’ilay fanjakany entin’i Kristy Jesosy.—Isaia 9:6, 7.
4, 5. Inona no dikan’ny hoe tia an’i Jehovah?
4 Porofon’ny fitiavana an’i Jehovah: Fantatsika fa ny hoe tia an’i Jehovah amin’ny fo manontolo sy ny tena manontolo ary ny saina manontolo dia tsy midika fotsiny hoe tena miraiki-po amin’Andriamanitra. Mila manana ny fomba fisainany koa isika. (Sal. 97:10) Tena tia an’Andriamanitra ny olona raha mankatò an-tsakany sy an-davany ny didiny, ka manana “fitondran-tena masina” sy “fahafoizan-tena ho an’Andriamanitra” foana, na dia iharam-pitsapana sy fanoherana aza.—2 Pet. 3:11; 2 Jaona 6.
5 Mahafinaritra ny manao ny sitrapon’Andriamanitra, raha atosiky ny fitiavana. (Sal. 40:8) Tokony ho tsapan’ilay olona ampianarina Baiboly, fa nataon’Andriamanitra hahasoa ny mpanompony mandrakizay ny didiny rehetra. (Deot. 10:12, 13) Manaraka ny tari-dalan’i Jehovah ny olona tena mankasitraka an’ireo asany mahatalanjona. Ampio ilay mpianatra hahatakatra fa ho voaro amin’ny alahelo sy ratram-po izy, raha manaraka ny lalan’ny fahamarinana.
6. Inona no fitahiana azon’ireo tia an’i Jehovah?
6 Fitahiana ho an’ireo tia an’Andriamanitra: Tena karakarain’i Jehovah ireo olona manetry tena sy tia azy, ka aharihariny amin’izy ireo “ny zava-dalin’Andriamanitra.” (1 Kor. 2:9, 10) Fantatr’izy ireo àry ny fikasan’i Jehovah, ka tsy manjavozavo aminy ny hoavy, ary azony antoka ny fanantenany. (Jer. 29:11) Anehoan’i Jehovah ny hatsaram-panahiny miavaka ireo tia azy. (Eks. 20:6) Manantena ny hiaina mandrakizay izy ireo satria tena tia azy Andriamanitra.—Jaona 3:16.
7. Inona no tsapanao rehefa mampianatra ny olona ho tia an’i Jehovah?
7 Arakaraka ny habetsahan’ny zavatra fantatsika momba an’ilay Raintsika any an-danitra, ny habetsahan’ny zavatra tokony holazaintsika amin’ny hafa. (Matio 13:52) Voninahitra lehibe tokoa ny mampianatra ny olona, indrindra fa ny zanatsika, mba ho tia an’i Jehovah! (Deot. 6:5-7) Enga anie hiboiboika teny fiderana ny vavantsika sy ny an’ireo olona ampianarintsika, rehefa tsapantsika ny ‘hatsaran-toetran’i Jehovah.’—Sal. 145:7.