Ilana Fiaretana ny Asa Fitoriana
1 Ny asa fitoriana no nataon’ny apostoly Paoly anton-draharaha nandritra ny 30 taona mahery, ary nahafa-po azy izany. Nahita olana maro izy nefa tsy kivy. (2 Kor. 4:1; 11:23-29) Fantany fa ho afaka hiaritra sy hanatontosa ny fanompoany izy, noho ny hery avy amin’i Jehovah. (Fil. 4:13) Ohatra tsara i Paoly satria tsy nivadika sy niaritra, ka afaka nilaza hoe: “Aoka hanahaka ahy ianareo, tahaka ny anahafako an’i Kristy.”—1 Kor. 11:1.
2 Fiaretana amin’izao andro izao: Maro amin’ireo rahalahintsika no esoina na enjehina, isan’andro. Mety tsy hiraharaha ny fahamarinana koa ny fianakaviany, na mpiara-mianatra, na mpiara-miasa aminy. (Mat. 10:35; Jaona 15:20) Izany angamba no mahazo anao. Mety hanana olana ara-pahasalamana koa ianao, na hiady mafy isan’andro mba hanoherana fakam-panahy, na tsy hanaovana fialam-boly mety hanimba ny finoanao sy hampivadika anao. Hampahery anao ny fandinihana ny ohatr’ireo mpanompon’i Jehovah tsy nivadika fahiny sy ankehitriny. Niatrika olana maro izy ireo, nefa nandresy.—1 Pet. 5:9.
3 Hanana hery hiaretana foana isika eny amin’ny fanompoana, raha ‘tafintsika daholo ny fiadiana fiarovana rehetra avy amin’Andriamanitra.’ (Efes. 6:10-13, 15) Tena ilaina koa ny vavaka. Manome ny fanahiny masina i Jehovah mba hahafahantsika hiaritra fitsapana. (2 Kor. 6:4-7) Tsy maintsy manaraka ny fampahatsiahivan’Andriamanitra isika, mba ho afaka hanavao ny toe-tsaintsika. Handresy amin’ilay ady ara-panahy isika, raha manao izany. (Sal. 119:24, 85-88) Mety hamerimberina hamaky ny taratasy nalefan’ny rainy be fitiavana ny ankizy iray. Hanamafy ny fifandraisantsika amin’i Jehovah koa ny famakiantsika Baiboly isan’andro. Hahazo fahendrena hiatrehana fitsapana isika, raha mianatra samirery tsy tapaka. Hanana ny fomba fisainan’i Jehovah foana isika rehefa handray fanapahan-kevitra, ary vao mainka ho tapa-kevitra ny tsy hivadika aminy.—Ohab. 2:10, 11.
4 Mitondra fitahiana ny fiaretana: Toa an’i Paoly, dia afaka mampifaly ny fon’i Jehovah isika raha tsy mivadika sy maneho fiaretana eo amin’ny fanompoantsika. Hitondra fitahiana ho antsika sy ho an’ny hafa izany. (Ohab. 27:11) Enga anie isika ho tapa-kevitra ny haharitra amin’ny fanompoana, ka hanaporofo fa matanjaka tsara ny finoantsika ary “sarobidy lavitra noho ny volamena, izay mety simba na dia voasedra tamin’ny afo aza.”—1 Pet. 1:6, 7.