Ahoana no Hampiasana ny Boky “Fitiavan’Andriamanitra”?
1. Inona no antony namoahana ny boky “Fitiavan’Andriamanitra”?
1 Faly isika nandre tamin’ny fivoriamben’ny vondrom-paritra fa hivoaka ny boky vaovao hoe “Mitoera ao Amin’ny Fitiavan’Andriamanitra”! Nolazaina tamin’izany fa natao hanampiana antsika hahafantatra sy ho tia ny fitsipik’i Jehovah izy io, fa tsy natao hampitana an’ireo fampianarana fototra ao amin’ny Baiboly. Tsy hanolotra azy io isan-trano àry isika.
2. Ahoana no hampiasana an’io boky io, ary iza no ampianarina aminy?
2 Io no boky faharoa hianaran’ny mpianatra Baiboly, rehefa vita ny boky Ampianarina. Tadidio fa tsy mitovy ny olona: Misy haingana kokoa, misy ela kokoa vao mahataka-javatra. Tokony hatao arakaraka ny fahatakaran’ny mpianatra tsirairay àry ny fianarana. Ataovy mazava tsara aminy izay ianarany. Amin’ny ankapobeny, dia tsy tokony hampianarina amin’ny boky “Fitiavan’Andriamanitra” ny olona efa nahavita boky maromaro nefa tsy mivory, sady hita hoe tsy te hiaina mifanaraka amin’ny fahamarinana nampianarina azy.
3. Inona no ataontsika raha mampianatra amin’ny boky Mivavaha isika izao?
3 Raha mampianatra amin’ny boky Mivavaha ianao izao, ka toko vitsivitsy sisa tavela, dia mety ho tianao ny hamita azy io sy hampirisika an’ilay mpianatra hamaky samirery an’ilay boky “Fitiavan’Andriamanitra.” Raha mbola tsy any amin’ny farany kosa ianareo, dia aleo havadika amin’ilay boky vaovao ny fianarana, ka atombohy hatrany amin’ny voalohany. Tsy voatery hodinihina ny fanazavana fanampiny, toy ny tamin’ny boky Ampianarina ihany.
4. Ahoana raha vita batisa ilay mpianatra nefa mbola tsy nahavita ny boky Ampianarina na ny boky “Fitiavan’Andriamanitra”?
4 Raha vita batisa ilay mpianatra, nefa mbola tsy nahavita ireo boky roa ireo, dia tokony hotohizina ny fianarana mandra-pahavitan’ny boky “Fitiavan’Andriamanitra.” Afaka manisa ny ora laninao, sy ny fiverenana mitsidika, ary ny fampianarana ianao, na dia vita batisa aza izy. Afaka manisa ora koa ny mpitory miaraka aminao, ka mandray anjara amin’ilay fampianarana.
5. Ahoana no azo ampiasana ny boky “Fitiavan’Andriamanitra” mba hanampiana olona tsy mitory intsony?
5 Mety hotendren’ny Komitin’ny Fanompoana ianao, mba hampianatra olona iray tsy mitory intsony. Mety hasainy hiara-mandinika toko vitsivitsy voafaritra tsara ao amin’ilay boky “Fitiavan’Andriamanitra” ianareo. Tsy voatery hotohizina ela izany fampianarana izany. Tena faly isika manana an’io boky vaovao io. Natao hanampiana antsika tsy hiala “amin’ny fitiavan’Andriamanitra” mantsy izy io!—Joda 21.