Vonona Hitory any Am-pianarana ve Ianao?
1. Afaka manararaotra manao inona ianao amin’izao fidiran’ny mpianatra izao?
1 Hiatrika olana sy fanerena vaovao ny tanora kristianina, na vao hiditra hianatra izy na hisondrotra kilasy. Fotoana azo hararaotina anefa izany mba ‘hanambarana ny marina.’ (Jaona 18:37) Vonona hitory any am-pianarana ve ianao?
2. Inona no hanampy anao ho vonona hitory any am-pianarana?
2 Natao hanampiana anao hahomby eo amin’ny fiainana ny fampiofanana maro avy amin’i Jehovah sy ny ray aman-dreny ary ny mpanompo mendri-pitokisana sy malina. (Ohab. 1:8; 6:20; 23:23-25; Efes. 6:1-4; 2 Tim. 3:16, 17) Azo inoana àry fa efa fantatrao ny fisedrana hatrehinao any am-pianarana. Ny fahalalana izany sy ny fampiofanana avy amin’Andriamanitra, dia manomana anao hitory any. (Ohab. 22:3) Diniho tsara ireo toromarika sy torohevitra ara-baiboly omena ao amin’ireo boky Manontany ny Tanora, sy ireo lahatsoratra ho an’ny tanora ao amin’ny Mifohaza!
3. Ahoana avy no ahafahanao mitory any am-pianarana?
3 Faritany miavaka tokoa ny any am-pianarana, ary ho afaka hitory amin’ny fomba maro samihafa ianao. Voamariky ny hafa, ohatra, fa modely eo amin’ny fitafiana sy taovolo ianao, tsara fitondran-tena sy fomba fiteny, manaja ny mpiara-mianatra sy ny mpampianatra, ary tsara naoty mihitsy aza. Tsapany fa tsara kokoa ny fiainanao, ka mety hanontany izy hoe: “Nahoana ianao no tsy mba toy ny ankizy hafa?” (Mal. 3:18; Jaona 15:19; 1 Tim. 2:9, 10) Mety ho afaka hitory sy hanazava izay inoanao ianao amin’izay. Azo inoana fa hiatrika olana ianao mandritra ny taona, rehefa tonga ny fetim-pirenena na fety hafa. Raha misy manontany anao hoe nahoana ianao no tsy mandray anjara, dia aza milaza fotsiny hoe: “Vavolombelon’i Jehovah aho, ary mandrara izany ny fivavahako.” Hararaoty kosa izany mba hitoriana momba an’i Jehovah, ilay Rainao be fitiavana. Ho vonona hitory amin’ny mpampianatra sy ny mpiara-mianatra ary ny hafa ianao, raha miomana tsara eo ambany fitarihan’i Jehovah.—1 Pet. 3:15.
4. Nahoana no azo antoka fa ho afaka hitory ianao mandritra ny taom-pianarana?
4 Mety ho somary hatahotra ny hitory any am-pianarana ianao. Matokia anefa fa maro no hanampy anao sady maniry ny hahombiazanao. Miara-paly aminao izahay, noho ianao afaka mitory amin’ny hafa ao amin’ilay faritany miavaka misy anao. Aoka àry ianao ho be herim-po sy ho vonona hitory any am-pianarana!