Mety Hahitam-bokatra ny Fitoriana An-telefaonina
1. Nahoana isika no tokony hihevitra ny fitoriana an-telefaonina ho zava-dehibe?
1 Nahoana isika no tokony hieritreritra momba ny fitoriana an-telefaonina? Satria anisan’ny fomba anampiana ny olona hahazo fahalalana marina tsara ho amin’ny famonjena izy io. (2 Pet. 3:9) Ny fitoriana isan-trano no fomba lehibe indrindra hitoriana ny vaovao tsaran’ny Fanjakan’Andriamanitra. Vonona hanararaotra ny fomba hafa azo itoriana amin’ireo tsy tratra an-trano anefa isika.—Mat. 24:14; Lioka 10:1-7; Apok. 14:6.
2. Inona no fiomanana hatao rehefa hitory an-telefaonina?
2 Inona no fiomanana hatao? Omena faritany ireo mitory an-telefaonina, toy ireo mitory isan-trano ihany. Azo atao ny mitory irery an-telefaonina, na miaraka amin’ny mpitory iray na roa. Tokony ho toerana mangina sy mety tsara mba hitoriana an-telefaonina ny toerana iantsoana. Maro no mahita fa tsara kokoa raha mipetraka, ary atao eo ambony latabatra ny fitaovana fampiasa rehefa mitory isan-trano.
3. Inona no tokony hotadidina rehefa mitory an-telefaonina?
3 Ahoana no hanaovana azy? Tsy tokony hamboamboarina ny fitenintsika rehefa mitory an-telefaonina. Afaka mamaky fomba fitory ny mpitory sambany vao mitory an-telefaonina, nefa tokony hataony toy ny fomba fiteniny isan’andro izany. Afaka manampy azy ny fampidiran-dresaka ao amin’ny boky Fanjohian-kevitra, Ny Fanompoantsika Ilay Fanjakana, ary ny taratasy mivalona Tianao ve ny Hahafantatra ny Marina? Raha ianao ihany no manomana ny fomba fitorinao, dia mitadiava foto-kevitra sy fanontaniana, ary manomàna andinin-teny vitsivitsy mamaly an’ilay fanontaniana. Izay zavatra atolotra rehefa mitory isan-trano ihany, amin’ny ankapobeny, no atolotra rehefa mitory an-telefaonina. Tadidio izao manaraka izao: Miezaha ho tony ary mitenena miadana. Aoka ianao hahalala fomba sy ho sariaka ary hanam-paharetana, satria mety ho tsapan’ilay olona antsoinao izany. Henoy izy rehefa milaza ny heviny ary aza toherina fa isaory. Aza miresaka momba ny fanomezana koa, sao hataon’ny olona hoe mangata-bola an-telefaonina isika.
4. Iza avy no mety ho tafaresaka amintsika, rehefa mitory an-telefaonina isika?
4 Mety ho tafaresaka amin’ny olona marary ao an-trano ianao, na amin’ny olona tsy tratra an-trano mihitsy noho ny asany. Sarotra koa ny mitory isan-trano amin’ireo mipetraka ao amin’ny tanàna lehibe mifefy na ao amin’ny trano lehibe misy rihana maromaro sady tsy azo idirana. Miezaha àry manatanteraka tsara kokoa ny fanompoanao, ka diniho sao ho afaka hitory an-telefaonina ianao. Mety hahitam-bokatra mantsy io endri-panompoana io.