Vavolombelona Foana Isika
1. Nitory tamin’ny vehivavy iray nantsaka i Jesosy. Inona no ianarantsika avy amin’izany?
1 Nandeha an-tongotra lavitra i Jesosy ka reraka sy nangetaheta. Nipetraka niala sasatra teo amin’ny lavadrano tany ivelan’ny tanàna samaritanina iray àry izy, fa ny mpianany kosa lasa nividy sakafo. Tsy hitory no anton-diany tao. Nandalo tao fotsiny izy, tamin’izy hanohy ny fanompoany any Galilia. Nanararaotra nitory tamin’ny vehivavy iray tonga nantsaka anefa izy. (Jaona 4:5-14) Nahoana? Satria “vavolombelona mendri-pitokisana sy marina” foana i Jesosy. (Apok. 3:14) Vavolombelon’i Jehovah foana koa isika, toa an’i Jesosy.—1 Pet. 2:21.
2. Ahoana no iomanantsika hitory tsy ara-potoana?
2 Miomàna mialoha: Ahoana no iomanantsika hitory tsy ara-potoana? Mitondrà foana boky, na gazety, na ny toy izany. Mpitory maro no mitondra taratasy mivalona ka mametraka izany amin’ny mpivarotra, na amin’izay olona tojo azy. (Mpito. 11:6) Matetika no manao dia lavitra ny anabavy iray ka asiany Baiboly sy boky Ampianarina foana ao anaty poketrany, ary miezaka manombo-dresaka amin’izay olona eo akaikiny izy.
3. Ahoana no azontsika anombohan-dresaka?
3 Ataovy izay hanombohana resaka: Tsy voatery hiresaka Baiboly avy hatrany isika rehefa mitory tsy ara-potoana. Tsy ny fampahafantarana ny tenany ho Mesia no nanombohan’i Jesosy ny resaka tamin’ilay vehivavy nantsaka. Nangataka rano fotsiny izy mba hanairana ny sain’ilay vehivavy. (Jaona 4:7-9) Afaka nanombo-dresaka koa ny anabavy iray rehefa nanao toy izany. Rehefa nisy nanontany izy hoe nahafinaritra ve ny fety, dia tsy nilaza izy hoe tsy mankalaza fety aho satria Vavolombelon’i Jehovah. Hoy kosa izy: “Raha izaho manokana aloha, aleoko tsy mankalaza fety e!” Matetika no manontany ny antony ilay olona ka afaka mitory tsara ilay anabavy.
4. Nahoana no mandrisika anao ny Matio 28:18-20?
4 Nahavita ny fanompoany teto an-tany i Jesosy, nefa mbola tiany hatao araka ny fomba nanaovany azy ny asa fitoriana. (Mat. 28:18-20) Manao toa an’i Jesosy àry isika, ka ho Vavolombelona vonona hanao fanambarana ampahibemaso ny finoantsika, amin’ny fotoana rehetra.—Heb. 10:23.