Tena Ilaina ny Misaintsaina sy Mivavaka
1. Inona no nanampy an’i Jesosy tsy hanadino ny tena asany?
1 Nanasitrana marary sy namoaka demonia i Jesosy ny takariva tontolo. Hoy ny mpianany raha vao nahita azy ny ampitso: “Mitady anao ny olona rehetra.” Mbola tiany hanao fahagagana mantsy i Jesosy. Tsy nohadinoin’i Jesosy anefa fa ny fitoriana ny vaovao tsara no tena asany. Hoy izy: “Andao isika ho any an-toeran-kafa, ho any amin’ny tanàna manodidina, mba hitoriako any koa, fa izany no nahatongavako.” Inona no nanampy an’i Jesosy tsy ho variana tamin-javatra hafa? Nifoha maraina be izy mba hivavaka sy hisaintsaina. (Mar. 1:32-39) Ho be zotom-po koa isika raha misaintsaina sy mivavaka.
2. Inona no azontsika saintsainina mba ho be zotom-po foana?
2 Zavatra azo saintsainina: Tsikaritr’i Jesosy fa “nampahorina sady naparitaka toy ny ondry tsy misy mpiandry” ny olona. (Mat. 9:36) Tokony hataontsika an-tsaina koa fa mila mandre ny vaovao tsara ny olona, ary efa tena akaiky ny farany. (1 Kor. 7:29) Eritrereto koa ireo zavatra nataon’i Jehovah, ny toetrany, ny voninahitra ananantsika noho isika Vavolombelony, ary ireo fahamarinana sarobidy nianarantsika tao amin’ny Teniny, izay mbola tsy fantatry ny olona ao amin’ny faritanintsika.—Sal. 77:11-13; Isaia 43:10-12; Mat. 13:52.
3. Inona avy no fotoana tsara hisaintsainana?
3 Fotoana tsara hisaintsainana: Misy mifoha maraina toa an’i Jesosy satria mbola mangina amin’izay. Aleon’ny hafa kosa misaintsaina, amin’ny alina alohan’ny hatory. (Gen. 24:63) Afaka mahita fotoana hisaintsainana foana isika, na be atao aza. Ny sasany indray rehefa mandeha fitateram-bahoaka no misaintsaina. Misy kosa manao izany amin’ny fiatoana antoandro. Maro no mahita fa mafana fo sy sahy kokoa izy raha misaintsaina, na kely aza, alohan’ny hanompo.
4. Nahoana isika no tokony hisaintsaina?
4 Vao mainka isika ho tia manompo an’i Jehovah raha mivavaka sy misaintsaina. Ho zava-dehibe amintsika koa ny fifandraisana aminy, ary ho tapa-kevitra ny hitory foana isika. Hahasoa antsika ny misaintsaina, satria nahasoa an’i Jesosy Mpanompon’Andriamanitra lehibe indrindra.