“Manàna Fangorahana”
1. Inona no tena ilain’ny olona ankehitriny?
1 Olona maro be, mihoatra noho ny hatramin’izay, no mila fangorahana sy fanampiana. Tena miharatsy ny fiainana eran-tany, ka betsaka no mijaly sy kivy ary tsy manana fanantenana. Olona an-tapitrisany no mila fanampiana. Isika Kristianina no tena afaka manampy azy ireny. (Mat. 22:39; Gal. 6:10) Inona no azontsika atao?
2. Inona no fomba tsara indrindra azontsika anehoana fangorahana?
2 Manahafa an’i Jehovah: Avy amin’Andriamanitra ihany ny tena fampiononana. (2 Kor. 1:3, 4) Tian’i Jehovah ‘hangoraka’ toa azy isika, ary nirahiny mba hitsidika ny olona sy hitory ny vaovao tsaran’ilay Fanjakana. (1 Pet. 3:8) Tokony hazoto handray anjara amin’io asa io isika, satria izany no fomba tsara indrindra ampiononantsika an’ireo “torotoro fo.” (Isaia 61:1) Ny Fanjakan’Andriamanitra ihany mantsy no fanantenana ho an’ireo olona mijaly. Tsy ho ela i Jehovah dia hanala ny faharatsiana ary hitondra tontolo vaovao hanjakan’ny fahamarinana, noho izy mangoraka ny olony.—2 Pet. 3:13.
3. Ahoana no azontsika anahafana an’i Jesosy?
3 Manahafa an’i Jesosy: Na dia vahoaka be aza no nitorian’i Jesosy, dia nieritreritra izay nilain’ny olona tsirairay izy. Fantany fa nila an’Andriamanitra izy ireo, sady toy ny ondry tsy nisy mpiandry. Nanohina ny fon’i Jesosy ny fahitana an’izany, ka nampianatra ny olona izy sady naneho faharetana. (Mar. 6:34) Raha hoatr’izany koa no fahitantsika ny olona tsirairay, dia hangoraka azy ireny avy hatrany isika. Ho hita amin’ny endritsika sy ny feontsika izany. Tsy hataontsika ambanin-javatra koa ny asa fitoriana, ary hampifanarahintsika amin’izay ilain’ny olona tsirairay ny zavatra lazaintsika.—1 Kor. 9:19-23.
4. Nahoana isika no tokony hitafy fangoraham-po?
4 Olona maro be avy amin’ny firenena rehetra izao no mandray ny hafatra momba ilay Fanjakana, ary faly erỳ rehefa anehoana fiheverana. Mitafia àry fangoraham-po foana, satria mampifaly sy manome voninahitra an’i Jehovah, ilay Andriamanitra be fangoraham-po, izany!—Kol. 3:12.