Aza Matahotra Mitory!
1. Inona no ilana herim-po, ary nahoana?
1 Efa nisy fotoana ve ianao te hitory tany an-tsekoly, nefa natahotra sao dia misy maneso? Tena ilana herim-po ny mitory, indrindra raha saro-kenatra ianao. Inona àry no azonao atao?
2. Nahoana no ilaina ny mahay mandinika, rehefa hitory any an-tsekoly?
2 Mahaiza mandinika: Tsara ny mihevitra ny sekoly ho toy ny faritaninao. Tadidio anefa fa tsy voatery hitory amin’izay rehetra hitanao ianao, satria tsy hoatran’ny fitoriana isan-trano ilay izy. Mahaiza mandinika hoe oviana no mety ny mitory. (Mpito. 3:1, 7) Mety hisy famelabelarana na ady hevitra amin’ny taranja sasany, ka ho afaka hilaza ny zavatra inoanao ianao. Na mety hisy ankizy hanontany anao hoe nahoana ianao no tsy mandray anjara amin’ny zavatra sasany. Misy tanora miresaka amin’ny mpampianatra hoe Vavolombelon’i Jehovah izy raha vao miandoha ny taom-pianarana, ary manome boky na bokikely manazava ny zavatra inoantsika. Misy kosa mametraka gazety na boky eo amin’ny dabilio, mba hisy mpiara-mianatra hanontany momba ilay izy.
3. Inona no fiomanana azonao atao mba hitoriana any an-tsekoly?
3 Miomàna: Hatoky tena kokoa ianao raha miomana. (1 Pet. 3:15) Eritrereto mialoha àry izay fanontaniana mety hipoitra, sy ny fomba hamalianao azy. (Ohab. 15:28) Mitondrà Baiboly sy boky vitsivitsy, raha mety, ohatra hoe ny boky Fandresen-dahatra sy Manontany ny Tanora, ary fanazavana momba ny famoronana. Resaho ny ray aman-dreninao mba hanisy fanazaran-tena mandritra ny fotoam-pivavahan’ny fianakavianareo.
4. Nahoana ianao no tokony hiezaka hitory foana any am-pianarana?
4 Aza mora kivy: Aza tonga dia mieritreritra hoe haneso anao foana ny ankizy rehefa miresaka momba ny fahamarinana ianao. Mety ho gaga noho ny herim-ponao ny sasany, ka hihaino anao. Aza kivy anefa na tsy misy mihaino mihitsy aza. Faly i Jehovah satria efa mba niezaka ianao. (Heb. 13:15, 16) Angataho foana izy mba hanampy anao ‘hitory amim-pahasahiana be.’ (Asa. 4:29; 2 Tim. 1:7, 8) Eritrereto ny ho fifalianao rehefa misy mandray ny fitorianao. Mety ho lasa mpanompon’i Jehovah mihitsy aza izy!