Inona no ‘Antom-pifalianao’?
1. Inona no antom-pifaliantsika rehefa mifarana ny volana?
1 Inona no ‘antom-pifalianao’ rehefa mamerina tatitra momba ny fanompoana isam-bolana? (Gal. 6:4) Mpisava lalana manokana manatratra 130 ora ny sasany amintsika. Ny hafa kosa tsy mahavita afa-tsy 15 minitra, satria be taona na marary ka tsy afa-manoatra. Tokony ho faly anefa isika rehetra manompo an’i Jehovah amin’ny fo manontolo.—Sal. 100:2.
2. Nahoana isika no tokony hiezaka mafy rehefa manompo an’i Jehovah?
2 Mendrika ny omena izay tsara indrindra i Jehovah, satria izy no Tompo Fara Tampony. (Mal. 1:6) Tia azy isika ka nanokan-tena hanao ny sitrapony. Tokony ho ny ‘voaloham-bokatra’ avy amin’ny fotoanantsika sy ny fahaizantsika ary ny herintsika àry no omentsika azy. (Ohab. 3:9) Hanana antom-pifaliana isika amin’izay isaky ny mifarana ny andro na ny volana. Raha tsapantsika anefa fa tsy ny tsara indrindra no nomentsika, dia miezaha hanatsara izany.—Rom. 2:15.
3. Nahoana no tsy mety ny mampitaha ny tenantsika amin’ny hafa?
3 ‘Tsy hampitaha ny tenantsika amin’ny hafa’: Tsy mety ny mampitaha ny tenantsika amin’ny hafa, na mampitaha ny zava-bitantsika ankehitriny sy taloha, tamintsika natanjaka kokoa. Mety hiova mantsy ny zava-misy, ary tsy mitovy ny zavatra mety ho vitantsika. Lasa mifaninana koa matetika ny olona tia mampitaha, na lasa mahatsiaro tena ho tsy misy ilana azy. (Gal. 5:26; 6:4) Nankasitraka izay vitan’ny olona tsirairay i Jesosy, fa tsy nampitaha izany tamin’ny an’ny olon-kafa.—Mar. 14:6-9.
4. Inona no ianarantsika avy amin’ilay fanoharan’i Jesosy momba ny talenta?
4 Nilaza i Jesosy, tao amin’ny fanoharana iray, fa nomen’ny tompony talenta “araka ny fahaizany avy” ny mpiasany. (Mat. 25:15) Nanontany izay nampiasan’izy ireo ny talenta azony avy eo ny tompony, rehefa avy nanao dia lavitra. Nisy tamin’izy ireo nampiasa tsara ny fahaizany sy nahay nanararaotra ny zava-nisy, ka nankasitrahany ary niara-nifaly taminy. (Mat. 25:21, 23) Hankasitrahan’i Jehovah koa isika ary hanana antom-pifaliana, raha be atao foana eo amin’ny fanompoana.