Mifalia Amin’ny Asa Mafy Ataonao
1. Inona no mety hahatonga antsika tsy ho be zotom-po amin’ny fanompoana intsony?
1 Noforonina mba ‘hifaly noho ny asa mafy ataony’ ny olombelona. (Mpito. 2:24) Raha tsy mahita vokatra tsara amin’ny fanompoana anefa isika, dia mety tsy ho faly sy tsy ho be zotom-po intsony. Inona àry no hanampy antsika ho faly foana?
2. Nahoana isika no tsy tokony hanantena hoe handray daholo ny olona itoriantsika?
2 Aza manantena hoe handray daholo ny olona: Tsarovy fa na vitsy aza ny olona nanaiky ny fampianaran’i Jesosy, dia nahomby foana ny fanompoana nataony. (Jaona 17:4) Efa nilaza i Jesosy fa maro no handa ny hafatra momba ilay Fanjakana, izay nampitahainy tamin’ny voa. (Mat. 13:3-8, 18-22) Na izany aza anefa, dia mbola misy vokany tsara ihany ny ezaka mafy ataontsika.
3. Nahoana isika no azo lazaina hoe “mamoa”, na vitsy amin’ny olona itoriantsika aza no mandray?
3 Ahoana no ahitana fa mahomby isika? Nilaza i Jesosy tao amin’ilay fanoharana momba ny mpamafy fa toy ny hoe “mamoa” izay manaiky an’ilay hafatra. (Mat. 13:23) Tsy tahom-bary vaovao akory no mipoitra rehefa mamoa ny vary, fa voa vaovao. Tsy voatery hoe mahazo mpianatra vaovao koa àry isika vao lazaina hoe “mamoa” na mahomby. Mahomby kosa isika rehefa mamafy foana ny voan’ilay Fanjakana, izany hoe mitory foana. Lasa ‘faly’ sy afa-po isika na mandray ny olona na tsia. Manamasina ny anaran’i Jehovah mantsy isika amin’izany. (Isaia 43:10-12; Mat. 6:9) Faly koa isika fa lasa mpiara-miasa amin’Andriamanitra. (1 Kor. 3:9) Ambonin’izany, dia tena mahafaly an’i Jehovah ny “vokatry ny molotra” ataontsika.—Heb. 13:15, 16.
4. Inona no mety ho vokatry ny fitoriantsika fa tsy hitantsika?
4 Mety ho nisy vokany koa ny fitoriana nataontsika fa tsy hitantsika ilay izy. Azo antoka fa tsy lasa mpanara-dia an’i Jesosy ny olona sasany nitoriany, raha tsy efa tatỳ aoriana be, tamin’izy efa tsy tetỳ an-tany intsony. Any aoriana koa angamba ny voan’ilay Fanjakana nafafintsika vao hamaka sy hitombo ao am-pon’ny olona nitoriantsika. Mety ho lasa Kristianina izy ireny fa tsy fantatsika. Tena misy vokany tsara àry ny fanompoantsika. Enga anie isika ka ‘hamoa be hatrany’ sy hampiseho foana fa mpianatr’i Jesosy.—Jaona 15:8.