Tahafo Ireo Mpaminany: Joela
1. Ahoana no hampisehoantsika fa manetry tena toa an’i Joela isika rehefa manompo?
1 Iza i Joela mpaminany? Tsy nilaza zavatra momba ny tenany izy afa-tsy hoe “zanak’i Petoela.” (Joela 1:1) Nanetry tena io mpaminany io ka ny hafatr’i Jehovah no nasongadiny fa tsy ilay asany hoe mpitondra hafatra. Manasongadina an’i Jehovah sy ny Baiboly koa isika rehefa manompo, fa tsy mitady voninahitra na dera ho antsika. (1 Kor. 9:16; 2 Kor. 3:5) Mampahery antsika koa ny hafatra torintsika. Inona amin’ny faminanian’i Joela no hahatonga antsika hazoto hanompo sy ho velom-panantenana?
2. Inona no tokony hataontsika noho ny andron’i Jehovah efa akaiky?
2 “Efa akaiky ny andron’i Jehovah.” (Joela 1:15): Efa an’arivony taona lasa izany no nosoratana nefa amin’izao andro izao no tanteraka farany. Efa nanomboka ny andro farany ho an’ity tontolo ratsy ity, matoa miharatsy ny fiainana ary tsy miraharaha sy maneso ny olona rehefa itoriana. (2 Tim. 3:1-5; 2 Pet. 3:3, 4) Tena tokony hanao loha laharana ny fanompoana isika rehefa misaintsaina hoe tena akaiky ny farany.—2 Pet. 3:11, 12.
3. Nahoana no zava-dehibe ny hanaovana loha laharana ny fanompoana arakaraka ny hanatonan’ny fahoriana lehibe?
3 ‘I Jehovah no ho fialofan’ny olony.’ (Joela 3:16): Milaza io andinin-teny io fa hihovotrovotra ny lanitra sy ny tany. Ny didim-pitsaran’i Jehovah mandritra ny fahoriana lehibe ihany no tiana holazaina amin’izany. Mampahery antsika ny mahalala fa hanavotra ny mpanompony tsy mivadika i Jehovah amin’izay. (Apok. 7:9, 14) Tsapantsika hoe mikarakara sy manome hery antsika i Jehovah rehefa manompo isika. Lasa matanjaka àry ny finoantsika ary lasa manam-paharetana isika. Ilaintsika izany amin’ny fahoriana lehibe ho avy.
4. Afaka ny ho faly ve isika sady tsy hatahotra ny hoavy? Hazavao.
4 Mahatonga ny vahoakan’Andriamanitra hanantena famonjena ny hafatr’i Joela, na dia lazain’ny olona sasany fa mampahatahotra aza. (Joela 2:32) Aoka àry isika tsy hatahotra ny hoavy fa hazoto hitory ny vaovao tsara momba ny Fanjakan’Andriamanitra, sady hanaraka ny voalazan’ny Joela 2:23 hoe: “Mifalia sy miravoravoa amin’i Jehovah Andriamanitrareo ianareo.”