Fantatrao Ve?

Hoatran’ny ahoana ny fitaovam-pitaterana nitaingenan’ilay Etiopianina tamin’i Filipo nanatona azy?

AZO ilazana fitaovam-pitaterana samihafa ilay teny tany am-boalohany nadika hoe “kalesy” ao amin’ny Fandikan-tenin’ny Tontolo Vaovao. (Asa. 8:28, 29, 38) Toa ngeza kokoa noho ny kalesy fitondra miady na fanaovana fifaninanana anefa ilay kalesy nitondra an’ilay Etiopianina. Nahoana? Andao isika handinika antony vitsivitsy.

Olona ambony ilay Etiopianina, ary nanao dia lavitra be. “Manam-pahefana teo ambany fifehezan’i Kandasy mpanjakavavin’ny Etiopianina izy io, ary niandraikitra ny harenany rehetra.” (Asa. 8:27) Anisan’i Etiopia fahiny i Soudan sy ny tapany atsimo indrindra amin’i Ejipta amin’izao. Tsy voatery ho kalesy iray ihany no nitaingenan’ilay Etiopianina, nandritra ny diany manontolo. Tsy maintsy hoe nitondra entana nilainy tamin’ilay dia lavitra anefa izy. Anisan’ny fitaovam-pitaterana nitondrana mpandeha tamin’ny taonjato voalohany ny kalesy misy kodiarana efatra sady mitafo. “Nahazaka entana betsaka kokoa ny kalesy hoatr’izany, nahazoana aina tsara, ary mety ho nahafahana nandeha lavitra kokoa”, araka ny boky Fanazavana ny Asan’ny Apostoly (anglisy).

Namaky teny ilay Etiopianina tamin’i Filipo nanatona azy. Milaza ilay fitantarana hoe “nihazakazaka teo akaikin’ilay kalesy i Filipo ka naheno [an’ilay tandapa] namaky mafy ny bokin’i Isaia mpaminany.” (Asa. 8:30) Tsy natao hoentina mirifatra ny kalesy fanaovana dia lavitra. Ilay izy nandeha niadana àry no nahafahan’ilay tandapa namaky teny, sy nahafahan’i Filipo nanatratra an’ilay kalesy rehefa nihazakazaka nanenjika azy izy.

“Nangataka an’i Filipo [ilay Etiopianina] mba hiakatra dia hipetraka teo akaikiny.” (Asa. 8:31) Nitsangana ny mpandeha tamin’ny kalesy fanaovana fifaninanana. Nisy toerana azon’ilay tandapa sy Filipo nipetrahana kosa tao amin’ilay kalesy fanaovana dia lavitra.

Nampifanarahina tamin’izay voalazan’ny Asan’ny Apostoly toko faha-8 sy ny voka-pikarohana hitan’ny mpahay tantara ny sary navoakantsika tao amin’ny bokintsika tato ho ato. Naseho hoe nitaingina kalesy ngeza kokoa noho ny kalesy fitondra miady na fanaovana fifaninanana ilay tandapa etiopianina.