Rahalahy Vaovao Roa Anisan’ny Filan-kevi-pitantanana
NISY fampandrenesana manokana tamin’ny fivoriana fanao isan-taona, tamin’ny 5 Oktobra 2024. Voatendry ho anisan’ny Filan-kevi-pitantanan’ny Vavolombelon’i Jehovah ny Rahalahy Jody Jedele sy Jacob Rumph. Mpanompon’i Jehovah tsy nivadika nandritra ny taona maro izy roa lahy ireo.
Jody Jedele sy Damaris vadiny
Rahalahy Jedele. Teraka tany Missouri any Etazonia izy, ary notezaina tao amin’ny fahamarinana. Nipetraka tany akaikin’ny faritany tsy voasa matetika izy mianakavy, ary nisy Vavolombelona avy any amin’ny faritra samihafa tonga nitory tany. Nifankatia sy niray saina ireny mpitory ireny, dia nisy vokany be tamin’ny Rahalahy Jedele izany. Natao batisa izy tamin’izy folo taona mahery, tamin’ny 15 Oktobra 1983. Tia nanompo izy ka nanomboka nanao mpisava lalana maharitra, tamin’ny Septambra 1989, rehefa vita ny fianarany teny amin’ny lise.
Nentin’ny ray aman-dreniny nitsidika Betela ny Rahalahy Jedele sy ny anabaviny, tamin-dry zareo mbola kely. Lasa te hanompo tao amin’ny Betela àry izy mianadahy. Nanompo tao tokoa ry zareo tatỳ aoriana. Nasaina hanompo tao amin’ny Betelan’i Wallkill ny Rahalahy Jedele, tamin’ny Septambra 1990. Tao amin’ny Sampan-draharahan’ny Fanadiovana no niasany voalohany, dia avy eo tao amin’ny Sampan-draharahan’ny Fitsaboana.
Nandroso be ireo fiangonana miteny espaniola teny akaikin’ny Betela tamin’izany, dia nila rahalahy. Nifindra tao amin’ny iray tamin’izy ireny àry ny Rahalahy Jedele ary nanomboka nianatra teny espaniola. Tsy ela taorian’izay izy dia nihaona tamin’ny Ranabavy Damaris. Mpisava lalana izy ary iray faritra ry zareo. Nivady ry zareo tatỳ aoriana, ary lasa Betelita koa Ranabavy Damaris.
Niala tao amin’ny Betela izy mivady tamin’ny 2005 mba hikarakara ray aman-dreny, izay samy mpanompon’i Jehovah. Mpisava lalana maharitra izy mivady nandritra an’izany fotoana izany. Nampianatra tamin’ny Sekolin’ny Fanompoan’ny Mpisava Lalana koa Rahalahy Jedele, sady anisan’ny Komity Mifandray Amin’ny Hopitaly sy anisan’ny Komitim-paritra Momba ny Fanorenana.
Nasaina hanompo tao amin’ny Betela indray izy mivady tamin’ny 2013, tamin’ny fanorenana an’i Warwick. Efa nanompo tao Patterson sy Wallkill koa ry zareo taorian’izay. Niasa tao amin’ny Sampan-draharaha Misahana ny Fanorenana eo An-toerana ny Rahalahy Jedele, sady niasa tao amin’ny Filan-kevitra Momba ny Hopitaly. Voatendry ho mpanampy ny Komitin’ny Fanompoana izy tamin’ny Martsa 2023. Rehefa nisaintsaina an’ireo asa nanendrena azy izy, dia izao no nolazainy: “Mahatsiaro ho tototra ianao indraindray rehefa mahazo fanendrena vaovao. Amin’iny mihitsy anefa ianao no mila mitadidy hoe tokony hiantehitra amin’i Jehovah, satria izy no mahatonga anao hahavita ny zavatra asainy ataonao.”
Jacob Rumph sy Inga vadiny
Rahalahy Rumph. Teraka tany Kalifornia any Etazonia izy. Marina hoe tsy nitory intsony ny reniny tamin’izy mbola kely, nefa niezaka nampianatra azy ny fahamarinana foana. Vavolombelona tsy nivadika koa ny bebeny, dia nitsidika azy foana ny Rahalahy Rumph isan-taona. Nanampy azy ho liana tamin’ny fahamarinana io bebeny io, ka nangataka hianatra Baiboly izy tamin’izy 13 taona. Natao batisa ny Rahalahy Rumph tamin’ny 27 Septambra 1992, tamin’izy mbola tsy ampy 20 taona. Soa fa niverina nitory indray ny reniny, ary nandroso hatramin’ny batisa ny dadany sy ny iray tam-po aminy.
Hitan’ny Rahalahy Rumph tamin’izy mbola tanora hoe tena falifaly ny mpisava lalana. Vao vita àry ny fianarany teny amin’ny lise, dia nanomboka nanao mpisava lalana izy tamin’ny Septambra 1995. Nandeha nanitatra tany Ekoatera izy tamin’ny taona 2000. Tany no nihaonany tamin’i Inga, mpisava lalana avy any Kanada. Nivady ry zareo tatỳ aoriana. Nipetraka tao amin’ny tanàna kely iray tany Ekoatera ry zareo taorian’ny mariaziny. Antoko-mpitory no tao tamin’izany, fa efa misy fiangonana mandroso be ao izao.
Voatendry ho mpisava lalana manokana izy mivady tatỳ aoriana, dia avy eo nanao ny asan’ny faritra. Nasaina hanatrika ny sekolin’i Gileada kilasy faha-132 ry zareo tamin’ny 2011. Nanompo tany amin’ny tany samihafa ry zareo rehefa nahazo diplaoma sady nahazo fanendrena isan-karazany, anisan’izany ny fanompoana tao amin’ny Betela, ny asa misionera, ary ny asan’ny faritra. Efa nampianatra tamin’ny Sekolin’ny Mpitory Ilay Fanjakana koa ny Rahalahy Rumph.
Noho ilay valanaretina COVID-19, dia niverina tany Etazonia izy mivady. Nasaina hanompo tao amin’ny Betelan’i Wallkill ry zareo, dia nahazo fampiofanana tao amin’ny Sampan-draharahan’ny Fanompoana ny Rahalahy Rumph. Voatendry tany amin’ny sampan’i Ekoatera indray ry zareo tatỳ aoriana, dia lasa anisan’ny Komitin’ny Sampana ny Rahalahy Rumph. Nasaina hanompo tao Warwick ry zareo tamin’ny 2023. Voatendry ho mpanampy ny Komitin’ny Fanompoana ny Rahalahy Rumph tamin’ny Janoary 2024. Rehefa misaintsaina ny fanendrena azony izy, dia izao no nolazainy: “Tsy ny toerana anendrena anao no mahatonga ny fanendrena anao hoe hiavaka, fa ny olona miaraka aminao.”
Mankasitraka ny asa mafy ataon’ireny rahalahy ireny isika, ary ‘tiantsika sy hajaintsika foana ny olona hoatr’ireny.’—Fil. 2:29.