Inona no Lazain’ny Baiboly?
Tianao Hadio Foana ve ny Fiarahanareo?
Mpifankatia i Faly sy Vola.a Tapa-kevitra izy ireo fa tsy hanao firaisana raha tsy efa vita mariazy. Irery anefa izy ireo indray hariva, ka saika resin’ny fakam-panahy. Soa ihany fa tonga saina ry zareo, ka tsy nanao fahadisoana goavana.
NY TENA Kristianina dia tsy hoe mandeha mivavaka isan-kerinandro fotsiny. Tsara fitondran-tena sy manaraka ny fitsipik’Andriamanitra koa izy. Nilaza i Jesosy Kristy fa mila ‘manao ny sitrapon’Andriamanitra’ isika. (Matio 7:21) Raha te hampifaly an’Andriamanitra àry ianao, dia tsy tokony hiaraka amin’ny olona iray raha tsy vonona hanambady, ary tokony hadio foana ny fiarahanareo.
Inona no azonareo atao mba hadio foana ny fiarahanareo, na dia tena sarotra aza izany? Voalohany, tadidio fa natao hahasoa antsika ny fitsipik’Andriamanitra. Faharoa, tadidio fa mora resin’ny fakam-panahy isika. Fahatelo, mifanaraha dieny mialoha hoe inona ihany no fihetsika azo atao. Fahefatra, araho foana ny torohevitr’Andriamanitra. Andeha hodinihintsika tsirairay ireo.
Fitsipika natao hahasoa antsika
Hoy ny Isaia 48:17, 18: “Izaho Jehovah no Andriamanitrao, Ilay mampianatra anao mba hahitanao soa, Ilay mampandeha anao amin’ny lalana tokony halehanao. Raha mitandrina ny didiko tokoa mantsy ianao, dia ho toy ny renirano ny fiadananao ary ho toy ny onjan-dranomasina ny fahamarinanao!”
Natao hahasoa antsika àry ny didy sy toro lalana ao amin’ny Baiboly. (2 Timoty 3:16, 17) Porofo izy ireny fa tena miahy antsika Andriamanitra sady maniry antsika ho sambatra sy hahomby foana. (Salamo 19:7-10) Manaiky izany ve ianao? Raha izany no izy, dia tena hendry ianao.
Tadidio fa mora resin’ny fakam-panahy isika
Tena namana i Jehovah ka lazainy amintsika ny marina momba antsika. Mampitandrina, ohatra, ny Teniny hoe: “Mamitaka mihoatra noho ny zava-drehetra ny fo, sady sarotra fehezina. Iza no mahalala ny aminy?” (Jeremia 17:9) Hoy koa izy: “Tsisy saina izay matoky ny fony, fa izay mandeha amim-pahendrena no ho afa-miala.”—Ohabolana 28:26.
Matoky ny fony ny mpifankatia raha tsy mandositra fakam-panahy toa an’i Faly sy Vola. Mety ho resin’ny filan’ny nofo àry izy ireo. Misy koa tsy miraharaha ny tenin’ny ray aman-dreny matahotra an’Andriamanitra. Mahalala tsara ny olon-dehibe toy ireny fa mahery toy ny omby masiaka ny filan’ny nofo, indrindra eo amin’ny tanora, ka mety hampidi-doza raha tsy voafehy.
Mankatò ny torohevitry ny ray aman-dreniny àry ny tanora “mandeha amim-pahendrena.” Mety tsy ho azoazony ny tenin’izy ireo, nefa ankatoaviny satria fantany fa fitiavana no mahatonga azy ireo hiteny. I Jehovah Andriamanitra, ilay Rainao any an-danitra no tia anao indrindra, ka manoro anao hoe: “Arovy tsy ho azom-pahoriana ny fonao, ary ampanalaviro ny nofonao ny loza.” (Mpitoriteny 11:9, 10) Inona no dikan’izany? Aza manaiky ho resin’ny filan’ny nofo.
Mifanaraha dieny mialoha
‘Hendry izay mila hevitra amin’ny hafa.’ (Ohabolana 13:10) Vao manomboka miaraka àry ianareo, dia efa tokony hifampiresaka hoe inona no fihetsika mendrika eo imason’Andriamanitra, ary tokony hiezaka hanaja izany. Toy ny hoe mirimorimo amin’ny fiara ianareo, raha tsy mifehy tena na matoky tena loatra. Tara loatra raha efa iharan-doza ianareo vao tapa-kevitra ny hitandrina.
Hoy ny Baiboly: “Malina izay mahatsinjo ny loza ka miafina, fa ny tanora fanahy kosa mbola miroso ihany ka voa.” (Ohabolana 22:3) Tsy ho resin’ny fakam-panahy ianareo raha malina, ka tsy mitokantokana fa miaraka amin’ny olona matotra iray na maromaro. Ho voa kosa izay tsy mitandrina. Mety hanenjika azy ny eritreriny atỳ aoriana, na tsy hisy vidiny aminy ny tenany sy ny olon-tiany. Ho afa-baraka koa izy sy ny havany. Aoka àry ianareo samy ho malina ka ho tapa-kevitra hanaraka ny fitsipiky ny Baiboly.
Araho foana ny torohevitr’Andriamanitra
Toy ny tady randran-telo ny fanambadiana, ka Andriamanitra no tady fahatelo. Hoy ny Mpitoriteny 4:12: “Ny tady randran-telo tsy mora tapahina.” Afaka mandray lesona avy amin’izany koa ny mpifankatia. Samy mila mankatò an’i Jehovah izy ireo raha te hotahiny. Hoy ny Salamo 1:1-3: ‘Sambatra ny olona tsy mandeha araka ny torohevitry ny ratsy fanahy. Fa ny lalàn’i Jehovah no mahafinaritra azy, eny, ny lalàny no vakiny moramora andro aman’alina. Hahomby daholo izay ataony.’
Araho àry ny tenin’i Jehovah, dia hahomby izay ataonareo, anisan’izany ny fiarahanareo sy ny fanambadianareo. Izy mantsy no nahary antsika, ary fanomezana sarobidy avy aminy ny fitiavana sy ny fanambadiana, ka mila hajaintsika.—Jakoba 1:17.
[Fanamarihana ambany pejy]
a Novana ireo anarana.
EFA NOERITRERETINAO VE IZAO:
● Inona no porofo fa mitady izay hahasoa antsika Andriamanitra?—Isaia 48:17, 18.
● Inona no mila tadidintsika momba ny tenantsika?—Jeremia 17:9.
● Inona no tokony hatao raha tiana hahomby ny fiarahana sy ny fanambadiana?—Salamo 1:1-3.
[Sary, pejy 13]
Vao manomboka miaraka ianareo, dia efa tokony hifampiresaka hoe inona no fihetsika mendrika eo imason’Andriamanitra, ary miezaha hanaja izany