Ny fikarakarana ireo olona be taona — Mitaky fiezahana amin’ny kristiana
TELO volana izay no lasa. Tsy nisy tamin’ireo zanak’ity vehivavy be taona mihitsy tonga mba hitsidika azy. Kilasimandry nanirery tao amin’ny trano iray fitokanana ao Cap, any Afrika Atsimo, izy. Ny zanany dia monina tsy lavitra eo.
Ao amin’ny trano iray mpikarakara ny be antitra ao Johannesburg, ny vehivavy anankiray dia mandany ny ankamaroan’ny fotoanany eo an-davarangan’ny efitranony. Hita matetika mitomany izy.
Mihafahita matetika ny zava-miseho mampalahelo toy izany, na dia any amin’ny firenena izay fanao aza ny mikarakara tsara ny olona be taona. Ny gazety iray dia manoratra fa ao Soweto, toerana lehibe misy ireo mainty hoditra manodidina an’i Johannesburg, “mifanohitra amin’ny fomba fanao dia mihavery ny fanajana ireo olona be taona, tsy ekana intsony ny fahefany ary tsy mikarakara azy ireny intsony ny fianakaviany”. Mitovy amin’izany ny tarehin-javatra any amin’ny karana maro ao Afrika Atsimo. Na dia malaza amin’ny fiahiany ny olona be taona aza izy ireny, ny mpiasam-panjakana iray ao amin’ny Fitantanan-draharaha dia nanazava vao haingana fa ireo mpivady tanora karana dia ‘tsy te-hiadidy ny ray aman-dreniny’.
Ny kristiana marina kosa dia mihevitra izao didy ao amin’ny Baiboly izao: “Manajà ny rainao sy ny reninao.” (Eksodosy 20:12; Efesiana 6:2). Tsy mitsahatra izany adidy izany rehefa mihantitra ny ray aman-dreny. Vakina ao amin’ny 1 Timoty 5:8 ny hoe: “Raha misy tsy mamelona ny azy, indrindra fa ny ankohonany, dia efa nandà ny finoana izy ka ratsy noho ny tsy mino aza.” Ny ray aman-dreny be taona dia anisan’ireo izay tokony hokarakarain’ny kristiana iray, na dia mitaky fahafoizana lehibe ara-pihetseham-po sy ara-bola aza izany.
Raha lazaina amin’ny ankapobeny, ny mpikambana ao amin’ny kongregasiona kristiana amin’izao androntsika izao dia manao tsara tokoa raha ny amin’ny fanomezana izay ilain’ireo ray aman-dreniny ara-pihetseham-po sy ara-nofo. Inona anefa no mitranga rehefa tsy manan-janaka na zafy matahotra an’Andriamanitra mba hanampy azy ireny ny kristiana be taona? Ahoana no anomezana ny zavatra ilainy?
Ny andraikitry ny kongregasiona
Nanoratra i Jakoba mpianatra hoe: “Izao no fivavahana madio sady tsy misy loto eo anatrehan’Andriamanitra Ray: ny mamangy ny kamboty sy ny mpitondrantena amin’ny fahoriany.” Ary lavidavitra kokoa: “Raha misy rahalahy na anabavy tsy manan-kitafy sady tsy manan-kohanina isan-andro, ka misy aminareo manao aminy hoe: Mandehana amin’ny fiadanana, mamindroa, mivokisa, kanefa tsy omenareo azy tsinona izay tandrifiny ho an’ny tenany, inona moa no soa azo amin’izany? Ary mba toy izany koa ny finoana, raha tsy misy asa, dia maty mihitsy.” — Jakoba 1:27; 2:15-17.
Araka izany, rehefa mila fanampiana ny kristiana be taona iray, ny kongregasiona iray manontolo dia miahy ny amin’izany. Afaka manome ohatra amin’izany lafiny izany ny loholona. Araka ny nolazain’i Paoly ao amin’ny 1 Timoty 5:4, dia tokony hofantariny aloha raha toa ny namany manana zanaka na zafy maniry “hamaly soa ny rainy aman-dreniny, fa izany no ankasitrahana eo anatrehan’Andriamanitra”. Raha tsy izany no miseho, dia hanontany momba ny fanampiana na vola aloan’ny Fanjakana izay ananan’ilay kristiana be taona zo izy ireo. Angamba aza ho afaka hitondra fanampiana ara-bola manokana ho azy ny mpikambana sasany eo amin’ny kongregasiona.
Rehefa tsy mety anefa ireny alaolana ireny dia tokony hojeren’ny loholona raha mahafeno ny fepetra mba hahazoana ny fanampian’ny kongregasiona mihitsy ilay olona. Hoy Paoly: “Aza soratana ho isan’ny mpitondrantena izay latsaka noho ny enim-polo taona sady efa nanam-bady indray mandeha ihany ary tsara laza amin’ny asa tsara.” — 1 Timoty 5:9, 10.
Kanefa matetika tokoa, tsy dia ny vola loatra akory no tsy ampy. Tokony hofantarin’ny loholona marina ny tena ilain’ilay Vavolombelona be taona. Moa ve izy mila fanampiana amin’ny fiantsenana? Mahatsiaro ho manirery ve izy, sa mila hampaherezina? Tokony hoentina any amin’ireo fivoriana ve izy? Mila olona mba hamaky aminy ny Baiboly sy ireo zavatra vita an-tsoratra kristiana ave izy? Raha toa izany olona be taona izany ao anatin’ny tsy fahafahana ara-batana hanatrika ireo fivoriana, azo atao ve ny mandray am-peo izany mba hahafahany mihaino azy any aminy? Angamba ilaina ny mitsidika azy sy miresaka aminy matetika alohan’ny hahafahana hamaritra tanteraka ny tarehin-javatra. Kanefa ireo loholona, izay mpiandry, dia tokony ‘hahafantatra tsara ny tarehin’ny ondry aman-osiny’. — Ohabolana 27:23.
Izay nataon’ireo kongregasiona
Rehefa avy nofantarina ireo zavatra ilain’ny olona be taona iray, dia azo atao ny manao fandaharana hentitra mba hanomezana izany. Rehefa mafana, sy be fitiavana ary tsy mitady ny tombontsoany manokana ny kongregasiona, dia tsy sarotra ny manangona rahalahy sy anabavy maromaro maniry hanampy. Izany dia manalavitra ny fizakan’ny sasantsasany enta-mavesatra. Ohatra, ny kongregasiona anankiray dia manomana fandaharam-pitsidihana an’ireo Vavolombelona be taona. Faly ny mpitory manana ny anarany voasoratra ao ary tsy misy mpikambana be taona ao amin’ny kongregasiona hadino.
Tany an-kafa dia nilaozan’ireo zanany tsy mpino ny vehivavy kristiana iray. Ny Vavolombelona tanora tao amin’ny kongregasiona anefa dia tonga nanasa ny loviany, nanao ny pasoka sy ny fanadiovan-trano ary nikarakara ny zaridainany. Nanampy azy tamin’ny fandoavana ny hofan-tranony sy ny haniny ny Vavolombelona. Nitondra azy ho any amin’ny fivoriambe sy ireo fivoriana izy ireo. Ary rehefa maty izy, dia niandraikitra ny lany sy ny zavatra rehetra natao hahatontosa ny fandevenana azy izy ireo.
Tany amin’ny kongregasiona kristiana kely iray tatsy Afrika Atsimo, ny Vavolombelona be taona mainty hoditra iray (nanana razana safiotra [metisy]) dia nalemy tanteraka taorian’ny namelezan’ny aretina azy. Koa satria tsy nisy tamin’ny fianakaviany nikarakara azy, ny vehivavy kristiana iray tao amin’ny kongregasiony, izay mpitondratena, sy ny zanany lahy dia naka azy tany aminy. Nifandimby ny lehilahy tao amin’ny kongregasiona mba hampandro azy. Ankoatra izany, ny mpitory maharitra fotsy hoditra iray dia nitondra azy nitsangatsangana tamin’ny seza mikorisa, zava-miseho tsy mahazatra any Afrika Atsimo ary somary nanaitra. Nikarakara tamim-pitiavana an’io lehilahy be taona io ny kongregasiona hatreo amin’ny fahafatesany.
Tsy milaza akory izany fa mora ny manome izay ilain’ireo rahalahy sy anabavintsika be taona. Ilaina ny mahay mitari-javatra sy maneho fahatapahan-kevitra mba handresena ny fahasahiranana izay mitranga indraindray.
Aoka hoentintsika any am-pivoriana ny Vavolombelona be taona
Ny vehivavy kristiana be taona iray, mpitondrantena sady marary fo, dia nahazo ny fitsidihan’ny loholona iray. Tamin’izay fotoana izay dia tonga ny mpifanolobodirindrina iray ka nitsetra ilay vehivavy kristiana tamin’ny filazana hoe: “Mandeha ato matetika aho ary mahita azy mitomany satria tsy nisy olona tonga mba hitondra azy ho any amin’ny Efitrano Fanjakana.” Raha ny marina, tsy dia lehibe loatra araka ny nisehoany ny zava-manahirana, satria niantoka ny fitondrana tsy tapaka an’ity vehivavy kristiana ity ny fianakaviana iray ao amin’ny kongregasiona. Indraindray anefa dia tsy tonga naka azy ilay ray satria niasa ora fanampiny izy. Ho azo natao tokoa ny nanomana olon-kafa mba hikarakara azy.
Noho izany dia tsara ny mampahatsiahy fa ireo namantsika be taona dia mila mihitsy ny hanatrika ireo fivoriana (Hebreo 10:24, 25). Ny loholona anankiray dia manara-maso foana raha toa ny vehivavy kristiana be taona toy izany ka manatrika ao amin’ny Efitrano Fanjakana. Raha tsy mahita azy ao izy satria voasembatsembana ny fandaharana, dia raisiny ny fiarany ka lasa maka azy izy. Ny tsiky miramirana mandray azy dia ampy hamalian-tsoa ny fiezahany tsy nampoizina.
Manantitrantitra amim-pahaiza-mandanjalanja
Indraindray anefa dia miseho ho mahaleotena kosa ny olona antitra sasantsasany. Mety hila fanampiana izy ireny nefa tsy tiany ny manaiky izany. Ary raha toa ny loholona, na ireo izay notendrena mba hanampy ka tsy mitandrina, ireny olona ireny dia hirona ‘hahavita tena’.
Ny mpitondrantena be taona iray dia nararin’ny homamiadana, nefa tsy niresadresaka izany tamin’iza na tamin’iza. Nila fanampiana izy mba hitaterana ny entany manokana ho any amin’ny toerana iray kilaometatra mahery avy eo amin’ny misy azy. Tsy niantso Vavolombelona hafa hanampy azy izy fa naleony naka vehivavy sakaizany 84 taona. Niaraka izy roa ka nofenoiny entana vitsivitsy ny kalesy iray izay nandramany natosika avy eo. Tsy ela anefa dia voatery niaiky izy ireo fa tsy eran’ny ainy ny raharaha ka lasa nangataka fanampiana tamin’ny loholona iray nipetraka tsy lavitra teo ilay sakaizan’izany mpitondratena izany.
Izany no antony tokony hametrahana fanontaniana amim-pahaiza-mandanjalanja angamba, nefa amim-pikirizana mba hahafahana mamantatra ny fomba fanampiana ny olona toy izany. Raha mianina fotsiny amin’ny fanolorana tsy voafaritra toy izao isika: ‘Raha mila na inona na inona, dia ilazao aho’, dia mety hahazo izao valin-teny henjana izao isika: ‘Misaotra, fa tsy mila na inona na inona aho’. Tadidio anefa Lydia: Rehefa nanolotra ny hampiantrano ny apostoly Paoly sy ny hafa izy, dia tsy nanaiky ho taitran’ny toa fandavany teo am-boalohany. Tsy izany kosa, fa ‘nanery azy izy’. (Asa. 16:15.) Manantitrantera àry. Fantaro izy ilain’ireo olona be taona sy ny faniriany alohan’ny tsy maintsy hitadiavany fanampiana.
Marina fa tokony haneho fankasitrahana noho ny fiezahan’ny hafa ny olona be taona, fa tsy ho mora tezitra, hitaky be loatra na hanakiana. Ohatra, raha iantohana ny fitaterana azy, dia hoheveriny fa mety raha manolotra ny handray anjara amin’ny lany amin’ny fandehanana izy. Ny anabavy be taona iray dia manao mofo sy manao taozavatra kely vita amin’ny korise izay omeny an’ireo izay mitondra azy ho amin’ny fivoriana. Raha ny marina, amin’ny toe-javatra maro, dia ampy ny teny fisaorana tsotra.
Amin’izao androntsika izao, ny kristiana dia miezaka ny hankatò ny didy omena ao amin’ny Levitikosy 19:32 manao hoe: “Mitsangàna raha eo anatrehan’ny fotsy volo hianao ka manajà ny tavan’ny anti-panahy.” Ny mpanompon’i Jehovah dia tsy manaraka ny fironan’izao tontolo izao tsy miraharaha ny olona be taona na miala amin’ny andraikiny amin’ny maha-zanaka. Mifanohitra amin’izany kosa, omban’ny fotoana sy ny faharetana ary ny fanampian’i Jehovah, dia miezaka hisetra ny zava-tsarotra amin’ny fikarakarana ireo olona be taona eo anivony izy ireo.
[Sary, pejy 23]
Afaka manao be matetika ny tanora ao amin’ny kongregasiona mba hanampiana ny olona be taona.