‘Mitoria ny Tenin’Andriamanitra amin’ny fahasahiana’
AFAKA manome hery ireo mpanompony mba hahafahany “mitory ny Tenin’Andriamanitra amin’ny fahasahiana” i Jehovah Andriamanitra. (Asan’ny apostoly 4:31) Na dia ireo mbola tanora raha ny amin’ny lalan’ny fahamarinan’ny Baiboly sy ireo tsy ampy fanandraman-javatra eo amin’ny asa fitoriana ny filazantsara aza dia tsy tokony hiahotrahotra hitory ny vaovao tsara amin’ny fahasahiana. Tany Côte d’Ivoire, dia nisy mpitory ny vaovao tsara roa nandray anjara tamin’ny fanompoana isan-trano, ary nahita mpampianatra tany amin’ny oniversite iray. I Seriki, ilay Vavolombelona tanora kokoa, dia nihevi-tena ho mbola tsy ampy fahaizana mba hiresaka amin’ny olona manam-pahaizana be toy izany, ary navelany ilay Vavolombelona namany hiresaka.
Sahiran-kevitra noho ny fanavakavaham-bolon-koditra ilay profesora ary nanome tsiny an’Andriamanitra noho ireo zava-manahirana ara-pirazanana misy, satria nino izy fa Andriamanitra no namorona ireo firazanana samy hafa. Rehefa naharitra ny fifanakalozan-kevitra izay toa tsy nitondra vokany, dia namory herim-po mba hiteny i Seriki tamin’ny farany, ary nanapaka ny resaka tamim-pahalalam-pomba. (1 Tesaloniana 2:2) Nahamarika i Seriki fa voaravaky ny loko voafidy tamin’ny fomba tsara ny tranon’ilay profesora, ka nanontany azy hoe: “Nahoana no tsy nasianao loko iray ihany ny tranonao rehetra?”
“Heverinao fa adala angaha aho!” hoy ny navalin’ilay profesora. Namaly i Seriki hoe: “Tsia, tompoko, fa nahoana àry isika no hanampo ny hanaovan’Andriamanitra ny olona rehetra sy ny zavatra rehetra ho loko iray ihany?” Nazava ilay teny. Hita fa nandaitra iny fanoharana tsotra iny, ary nanao fanambarana tsara i Seriki izay saro-kenatra teo aloha.