‘Hatry ny Fony vao Zazakely Ianao dia efa Nahalala’
ARAKA ny fandinihana ara-tsiansa natao vao haingana, dia misy heriny lehibe eo amin’ny fivelaran’ny atidohan’ny zazakely ny firesahana aminy, ary manorina ny fahaizany misaina sy manjohy hevitra ary mandamina zava-manahirana. Izany indrindra no izy mandritra ny taona voalohany iainan’ny zazakely iray. Nitatitra ny International Herald Tribune fa mino ankehitriny ny mpikaroka sasany fa “ny isan’ny teny ren’ny zazakely iray isan’andro dia mamaritra mialoha amin’ny fomba miavaka indrindra izay ho fahakingan-tsainy sy fahombiazany any an-tsekoly ary fahaizany mifandray amin’ny hafa any aoriana”.
Tsy maintsy avy amin’ny olona iray anefa ireo teny atao. Toa tsy afaka ny hisolo toerana amin’izany ny televiziona na ny radio.
Hoy ny nambaran’ny manam-pahaizana iray momba ny rafi-pitatitra ao amin’ny Oniversiten’i Washington any Seattle, Etazonia: “Fantatray ankehitriny fa miforona tena aloha be eo amin’ny fiainana ny fifandraisan’ireo nerônina, ary ny atidohan’ny zazakely dia miandry ara-bakiteny ireo fanandraman-javatra, mba hamaritana ny fomba hanaovana izany fifandraisana izany. Vao haingana mihitsy izao no nahatakaranay fa manomboka aloha be io fizotran-javatra io. Ohatra, efa mianatra ny feon’ny fitenin-drazany ny zazakely eo amin’ny fahenim-bolany.”
Ny fikarohana dia manohitra ilay hevitra miely patrana hoe hiroborobo ara-tsaina ny zazakely raha omena fitiavana be dia be fotsiny. Asongadiny koa ny maha-zava-dehibe ny anjara asan’ny ray aman-dreny eo amin’ny fivelaran’ny zaza.
Izany dia mampahatsiahy izao teny ao amin’ny taratasy ara-tsindrimandrin’ny apostoly Paoly ho an’i Timoty izao: “Hatry ny fony vao [zazakely, NW ] hianao dia efa nahalala ny Soratra Masina, izay mampahahendry anao ho amin’ny famonjena”. Azo inoana fa ny soratra masina noresahin’ny reniny sy ny renibeny mpino tamin’i Timoty zazakely dia nandray anjara lehibe tamin’ny fivelarany ka nahatonga azy ho mpanompon’Andriamanitra niavaka. — 2 Timoty 1:5; 3:15.