Aoka Isika ho Hendry fa efa Antomotra ny Farany
1 Imbetsaka ny Tenin’Andriamanitra no milaza fa ho avy “toy ny mpangalatra” ny andron’i Jehovah, izany hoe tampoka sy tsy ampoizina. (1 Tes. 5:2; Matio 24:43; 2 Pet. 3:10; Apok. 3:3; 16:15) Hoy i Jesosy: “Koa miomàna . . . hianareo; fa amin’izay ora tsy ampoizinareo no hihavian’ny Zanak’olona.” (Matio 24:44) Inona àry no hanampy antsika hiambina hatrany eo amin’ny lafiny ara-panahy, satria efa antomotra ny farany? Afaka manampy antsika ilay torohevitra ara-tsindrimandry hoe: “Hendre.”—1 Pet. 4:7.
2 Mitovy fomba fihevitra amin’i Jehovah ny olona hendry. (Efes. 5:17) Manampy antsika ny fahendrena mba hihevi-tena ho toy ny “vahiny sy mpivahiny” eto amin’ity tontolo ity. (1 Pet. 2:11) Manampy antsika koa izy io hahita hoe inona no tena zava-dehibe sy tokony homena ny toerana voalohany, ary manampy antsika hanao fanapahan-kevitra tsara.—Fil. 1:10.
3 Mamera tanjona ara-panahy: Manampy antsika ho hendry ny famerana sy fanatratrarana tanjona ara-panahy. Misy tanjona ara-panahy iezahanao tratrarina ve izao? Miezaka mamaky ny Baiboly isan’andro sy manatrika ny fivoriana rehetra ve ianao? Miezaka mamaky ny nomerao tsirairay amin’ny Tilikambo Fiambenana sy Mifohaza! ve ianao, na angamba miezaka ny hanompo bebe kokoa? Raha mametra tanjona sahaza anao ianao, sy milofo manatratra izany, ary mangataka amin’i Jehovah mba hitahy ny ezaka ataonao, dia ho gaga ianao amin’ny vokany.
4 Nisy anti-panahy nanontany mpivady tanora momba ny tanjon’izy ireo ara-panahy. Nanjary takatr’izy mivady tamin’izay fa afaka ny ho mpisava lalana izy ireo, raha nanatsotra ny fiainany sy nanefa ny trosa be tsy nahafahany nanao izany. Tapa-kevitra àry izy ireo fa ny asan’ny mpisava lalana no hataony tanjona. Niezaka mafy izy mivady nanefa ny trosany sy nitady fomba hampihenana ny asa tsy tena nilaina, izay nandany ny fotoanany sy nandreraka azy. Tratran’izy ireo ilay tanjona, herintaona katroka taorian’izay. Inona no vokany? Hoy ilay lehilahy: “Tsy ho toy izao mihitsy ny fiainanay raha tsy nisy tanjona noferanay. Sambatra kokoa izahay. Tena misy zava-kendrena ny fiainanay, ary milamina sy tsara kokoa.”
5 Aoka àry isika hiambina hatrany amin’ny lafiny ara-panahy, eo am-piandrasana ny andron’i Jehovah. Aoka isika ho hendry, na hanana ny fomba fihevitr’Andriamanitra, ka hifantoka hatrany amin’ny fanaovana ny sitrapony.—Tit. 2:11-13.