Mitovitovy amin’izay nosoratan’i Ezekiela mpaminany ny zavatra nasainy nosoratan’ny apostoly Petera. Hoy izy: “Tsy [tian’i Jehovah] hisy ho ringana ny olona.” (2 Pet. 3:9) Tena marina izany sady mampahery antsika! Fantatsika mantsy hoe tsy maika handringana ny olona mandrakizay i Jehovah. Faran’izay mamindra fo izy, dia mampiseho an’io toetrany io isaky ny misy hirika hanaovana an’izany.

12. Inona no fantatsika momba ny famindram-pon’i Jehovah? Manomeza ohatra.

¹² Inona kosa no fantatsika momba ny famindram-pon’i Jehovah? Ahoana no nampisehoany hoe “tsy tiany hisy ho ringana ny olona”? Diniho ny fomba nanehoany famindram-po tamin’ny olona sasany nanao fahotana lehibe. Nanao fahotana lehibe maromaro, ohatra, i Davida Mpanjaka, anisan’izany ilay hoe nijangajanga sy namono olona. Nibebaka anefa i Davida, dia namindra fo taminy i Jehovah ka namela ny helony. (2 Sam. 12:1-13) Nanao zavatra ratsy be koa i Manase Mpanjaka, efa ho nandritra ny fiainany manontolo. Na faran’izay ratsy aza anefa ny nataony, dia hitan’i Jehovah hoe mendrika ny hahazo famindram-po sy famelan-keloka izy satria nibebaka. (2 Tan. 33:9-16) Mampahatsiahy antsika ireo ohatra ireo fa mamindra fo i Jehovah, isaky ny mahita antony hanaovana an’izany. Hatsangany ny olona hoatr’izany, satria tsapan-dry zareo hoe nanao fahotana mahatsiravina izy dia nibebaka.