9. Nahoana no ampitahain’i Paoly amin’ny vatana iray ny Kristianina nateraky ny fanahy?

⁹ Vakio ny Romanina 12:4, 5, 9, 10. Ampitahain’i Paoly amin’ny rantsambatana amin’ny vatana ny Kristianina voahosotra, izay miara-manompo amim-piraisan-tsaina eo ambany fitarihan’i Kristy, Lohan’izy ireo. (Kol. 1:18) Nampahatsiahiviny an’ireo Kristianina nateraky ny fanahy, fa samy hafa ny asan’ireo rantsambatana, ka “na maro aza” izy ireo, “dia vatana iray tafaray amin’i Kristy.” Nampirisika ny tany Efesosy koa izy hoe: “Aoka [isika] hitombo amin’ny zava-drehetra amin’ny alalan’ny fitiavana mba hifanaraka amin’ny loha, dia i Kristy. Koa izy no ahafahan’ny vatana iray manontolo mandray anjara amin’ny fitomboan’ny vatana mba hiorenany ao anatin’ny fitiavana. Mahavita izany ny vatana noho izy io tafakambana mirindra tsara sady natao hiara-miasa amin’ny alalan’ny tonon-taolana rehetra mpanome izay ilaina, sy hiara-miasa araka ny tokony ho fiasan’ny rantsambatana tsirairay.”—Efes. 4:15, 16.

11. Inona no tena mampiray saina antsika, ary inona ny torohevitra nomen’i Paoly?

¹¹ Ny fitiavana no tena mampiray saina, ary “fatorana mampiray tonga lafatra” izy io. (Kol. 3:14) Nanantitrantitra an’izany i Paoly rehefa nilaza fa tokony haneho fitiavana ‘tsy misy fihatsarambelatsihy’ isika, ary “hifaneho firaiketam-po lalina raha ny amin’ny fitiavan-drahalahy.” Mifanaja ny rehetra amin’izay, araka ny tenin’i Paoly hoe: “Aoka ianareo ho loha laharana raha ny amin’ny fifanomezam-boninahitra.” Na izany aza, dia tsy baikoin’ny fo fotsiny ny fitiavana. Mila miezaka mafy isika hiaro ny fahadiovan’ny fiangonana. Nilaza koa mantsy i Paoly hoe: “Ankahalao ny ratsy, mifikira amin’ny tsara.”