24. Ahoana no tokony hiheverantsika ny fivadiham-pinoana?

²⁴ Tsara hotadidina fa saika nampidi-doza an’ilay fiangonana tany Pergamosy ny mpivadi-pinoana. Raha mitady hanimba ny fahasalamana ara-panahin’ny fiangonana misy antsika ny toe-javatra toy izany, dia aoka isika handa tanteraka ny fivadiham-pinoana, fa hanaraka hatrany ny fahamarinana. (Jaona 8:32, 44; 3 Jaona 4) Mety hanimba ny fiangonana manontolo ny mpampianatra sandoka sy ny olona mitady hivadi-pinoana. Tsy maintsy manohitra mafy ny fivadiham-pinoana àry isika, mba tsy ho resy lahatra tsy hanaiky ny marina.​—Galatiana 5:7-12; 2 Jaona 8-11.

25. Ny hafatr’i Kristy ho an’ny fiangonana taiza avy no hodinihintsika ao amin’ny lahatsoratra manaraka?

²⁵ Tena mampieritreritra mihitsy ny teny fiderana sy ny torohevitra nomen’i Jesosy Kristy an’ireo fiangonana telo tany Azia Minora ireo! Mbola betsaka anefa ny zavatra asain’ny fanahy masina holazainy amin’ireo fiangonana efatra hafa. Hodinihina ao amin’ny lahatsoratra manaraka izany hafatra ho an’ny fiangonana any Tyatira, Sardisy, Filadelfia ary Laodikia izany.

Henoy Izay Lazain’ny Fanahy!

“Izay manan-tsofina, aoka izy hihaino izay lazain’ny Fanahy amin’ny fiangonana.”​—APOKALYPSY 3:22.

1, 2. Inona no torohevitra naverimberin’i Jesosy tamin’ireo fiangonana fito ao amin’ny Apokalypsy?

TSY maintsy mihaino ny teny ara-tsindrimandry nolazain’i Jesosy Kristy tamin’ireo fiangonana fito, ao amin’ny Apokalypsy, ny mpanompon’i Jehovah. Omeny torohevitra ny tsirairay amin’ireo fiangonana ireo hoe: “Izay manan-tsofina, aoka izy hihaino izay lazain’ny Fanahy amin’ny fiangonana.”​—Apokalypsy 2:7, 11, 17, 29; 3:6, 13, 22.

² Efa nodinihintsika ny hafatr’i Jesosy ho an’ireo anjely, na mpiandraikitra, tany Efesosy sy Smyrna ary Pergamosy. Inona àry izao no soa horaisintsika, rehefa mandinika izay nolazainy tamin’ireo fiangonana efatra hafa, tamin’ny alalan’ny fanahy masina?

Ho an’ny anjely any Tyatira

3. Taiza no nisy an’i Tyatira, ary inona no tena nampahalaza azy?

³ Sady nidera no nananatra ny fiangonana tany Tyatira “ny Zanak’Andriamanitra.” (Vakio ny Apokalypsy 2:18-29.) Tany amin’ny faritra andrefan’i Azia Minora no nisy an’i Tyatira (Akhisar ankehitriny), teny amoron’ny sakelidranon’ny Ony Gediz (Hermus fahiny). Maro ny taozavatra nampahalaza azy, ary nalaza koa ilay loko volomparasy namboarina avy tamin’ny fakan-javamaniry nisy tany. ‘Mpivarotra lamba volomparasy, avy tany Tyatira’ i Lydia,