1. Inona no fikasan’Andriamanitra momba ny tany?

TENA tsara ny fikasan’Andriamanitra momba ny tany. Tiany ho feno olona sambatra sy salama tsara eto. Milaza ny Baiboly fa ‘nanamboatra zaridaina tao Edena i Jehovah Andriamanitra’, ka ‘nampaniriny tao ny hazo rehetra mahafinaritra ny maso sady mahate hihinana.’ Namorona an’i Adama sy Eva, lehilahy sy vehivavy voalohany, izy avy eo, ary napetrany tao amin’io zaridaina tsara tarehy io izy ireo. Hoy izy tamin’izy ireo: “Manàna taranaka, ary mihabetsaha ka mamenoa ny tany. Anjakao ny tany.” (Genesisy 1:28; 2:8, 9, 15) Ny fikasan’Andriamanitra àry dia hoe hiteraka ny olombelona ka hanitatra an’ilay paradisa eran-tany, ary hikarakara ny biby.

2. a) Ahoana no ahafantarantsika fa ho tanteraka ny fikasan’Andriamanitra momba ny tany? b) Iza no lazain’ny Baiboly fa hiaina mandrakizay?

² Ho tanteraka tokoa ve ilay fikasan’i Jehovah hoe hiaina ao amin’ny paradisa eto an-tany ny olona? Hoy izy: ‘Efa nolazaiko izany ka hataoko.’ (Isaia 46:9-11; 55:11) Tsy maintsy hotanterahin’Andriamanitra àry izay kasainy. Nilaza izy fa “tsy hoe tsy misy antony ny namoronany” ny tany, fa “nataony honenana.” (Isaia 45:18) Olona manao ahoana anefa no tian’Andriamanitra hiaina eto an-tany? Ary hafiriana izy ireo no tiany hipetraka eto? Hoy ny Baiboly: “Ny olo-marina no handova ny tany, ka honina eo mandrakizay.”—Salamo 37:29; Apokalypsy 21:3, 4.

3. Manao ahoana ny fiainana eto an-tany amin’izao, ary inona ny fanontaniana mila eritreretintsika?

³ Hitantsika anefa fa mbola tsy tanteraka izany. Mbola misy olona marary sy maty mantsy izao, ary misy aza miady sy mifamono ho faty mihitsy. Tsy izao mihitsy anefa ny zavatra nokasain’Andriamanitra, tamin’ny voalohany. Nahoana àry no tsy tanteraka ny fikasany? Tsy hahita ny valin’izany ao amin’ny boky nosoratan’olombelona isika, satria tany an-danitra ilay olana no nanomboka.

LASA NANANA FAHAVALO ANDRIAMANITRA

4, 5. a) Iza ilay nampiasa bibilava mba hiresahana tamin’i Eva? b) Nahoana no mety ho lasa mpangalatra ny olona iray, na dia tsara toetra sy nanao ny marina aza?

⁴ Milaza ny boky voalohany ao amin’ny Baiboly fa nisy nanohitra Andriamanitra tao amin’ny zaridainan’i Edena. Antsoina hoe “menarana” izy io, na dia tsy biby aza. Lazain’ny boky farany ao amin’ny Baiboly fa izy “ilay antsoina hoe Devoly sy Satana, izay mamitaka ny tany rehetra misy mponina.” Atao hoe “menarana tany am-boalohany” koa izy. (Genesisy 3:1; Apokalypsy 12:9) Anjely mahery sy tsy hita maso no niresaka tamin’i Eva, raha ny marina, fa mody nataony hoatran’ny hoe miteny ilay menarana. Azo antoka fa efa teo io zavaboary io, rehefa namorona ny tany sy ny olona Andriamanitra.—Joba 38:4, 7.

⁵ Fantatsika fa lavorary daholo ny zavatra noforonin’i Jehovah. Iza àry no nanao ny “Devoly”, na “Satana”? Raha tsorina, dia nivadika ho Devoly ny iray tamin’ny zanak’Andriamanitra tany an-danitra. Ahoana no nahatonga an’izany? Mety ho lasa mpangalatra ny olona iray, na dia tsara toetra sy nanao ny marina aza. Nahoana? Satria mety hanana fanirian-dratsy izy. Vao mainka hihamafy io faniriany io, raha eritreretiny foana. Mety hotanterahiny mihitsy ilay izy amin’ny farany, rehefa tojo fakam-panahy izy.—Vakio ny Jakoba 1:13-15.

6. Ahoana no nahatonga ny iray tamin’ny zanak’Andriamanitra ho lasa Satana Devoly?

⁶ Izany no nitranga tamin’i Satana Devoly. Azo inoana fa henony ilay tenin’Andriamanitra tamin’i Adama sy Eva hoe miteraha ary mamenoa ny tany. (Genesisy 1:27, 28) Mety ho nieritreritra àry izy hoe: ‘Raha mba izaho izao no ivavahan’ny olona, fa tsy Andriamanitra an!’ Nitombo tao am-pony izany fanirian-dratsy izany, ka notanterahiny. Namitaka an’i Eva izy sady nilaza lainga momba an’Andriamanitra. (Vakio ny Genesisy 3:1-5.) Izany no nahatonga azy ho lasa “Devoly”, izany hoe “Mpanendrikendrika”, ary koa “Satana”, izany hoe “Mpanohitra.”

7. a) Nahoana i Adama sy Eva no maty? b) Nahoana ny taranak’i Adama rehetra no mihantitra sy maty?

⁷ Lasa tsy nankatò an’Andriamanitra i Adama sy Eva, satria voafitak’i Satana Devoly. (Genesisy 2:17; 3:6) Maty izy ireo tamin’ny farany. Izay no efa nolazain’Andriamanitra fa hitranga raha tsy mankatò izy. (Genesisy 3:17-19) Tsy lavorary intsony i Adama rehefa nanota, ka nandova ota daholo koa ny taranany. (Vakio ny Romanina 5:12.) Azo oharina amin’ny lasitra fanaova-mofo izany. Raha pempo ilay lasitra, dia pempo daholo koa ny mofo amboarina amin’ilay izy, sa tsy izany? Hoatr’izany koa ny olona rehetra, satria nandova ota avy tamin’i Adama. Izany no mahatonga antsika taranany hihantitra sy ho faty.—Romanina 3:23.

8, 9. a) Inona ny fiampangana nataon’i Satana? b) Nahoana Andriamanitra no tsy tonga dia namono an’i Adama sy Eva ary Satana?

⁸ Nitaona ny hafa hikomy i Satana, raha ny marina, rehefa nampirisika an’i Adama sy Eva tsy hankatò an’Andriamanitra. Nokianiny ny fomba fitondran’i Jehovah. Te hilaza izy hoe: ‘Tsy mahay mitondra Andriamanitra, fa mandainga. Misy zavatra tsara tokony ho an’ny olony nefa tsy omeny azy ireo. Tsy mila an’Andriamanitra hitondra azy ny olombelona. Ry zareo ihany dia efa mahay manavaka an’izay tsara sy ratsy. Ho sambatra kokoa ry zareo raha izaho no mitondra azy.’ Nanevateva sy niampanga an’Andriamanitra i Satana. Ahoana àry no nandaminan’Andriamanitra an’izany? Misy milaza fa tokony ho novonoiny ho faty fotsiny i Adama sy Eva ary Satana. Ho nanaporofo ve anefa izany fa diso ny fiampangan’i Satana? Ho voaporofo ve hoe ny fitondran’Andriamanitra no tsara?

⁹ Tena manao ny rariny Andriamanitra, ka tsy tonga dia namono an’ireo mpikomy. Navelany handeha ny fotoana, mba hanaporofoana tsara hoe mpandainga i Satana Devoly, ary diso ny fiampangany. Navelan’Andriamanitra hanangana fitondrana aloha ny olombelona, ka i Satana no filohan’izy ireo. Hohazavaina ao amin’ny Toko faha-11 hoe nahoana i Jehovah no nanao an’izany, ary nahoana izy no miandry ela, fa tsy tonga dia nandamina an’ilay olana. Tokony hieritreritra anefa isika hoe: Rariny ve raha ny tenin’i Satana no ninoan’i Adama sy Eva, nefa izy aza mbola tsy nanao soa ho azy ireo mihitsy? Rariny ve raha nino izy ireo hoe mpandainga ratsy fanahy i Jehovah, nefa izy no nanome ny zava-drehetra ho azy mivady? Inona no ho nataonao, raha ianao no teo amin’ny toeran’izy ireo?

10. Ahoana no anaporofoanao fa miandany amin’i Jehovah ianao ary diso ny fiampangan’i Satana?

¹⁰ Mila eritreretina ireo fanontaniana ireo, satria miatrika zavatra mitovy amin’ireo isika tsirairay. Tena afaka miandany amin’i Jehovah ianao, ka manaporofo hoe diso ny fiampangan’i Satana. Asehonao fa mpandainga i Satana, raha manaiky an’i Jehovah ho Mpitondra ianao. (Salamo 73:28; vakio ny Ohabolana 27:11.) Mampalahelo fa vitsy amin’ireo olona an’arivony tapitrisa eran-tany no manao an’izany. Izao àry no fanontaniana lehibe mipetraka: Milaza tokoa ve ny Baiboly fa i Satana no mitondra an’izao tontolo izao?

IZA NO MITONDRA AN’IZAO TONTOLO IZAO?

11, 12. a) Hazavao fa i Satana no mpitondra an’izao tontolo izao, raha jerena ny fakam-panahy nahazo an’i Jesosy. b) Inona koa no manaporofo fa i Satana no mpitondra an’izao tontolo izao?

¹¹ Tsy nisalasala mihitsy i Jesosy hoe i Satana no mpitondra an’izao tontolo izao. Nisy fotoana i Satana nanao fahagagana mba hampisehoana taminy “ny fanjakana rehetra eo amin’izao tontolo izao sy ny voninahitr’ireny fanjakana ireny.” Nilaza tamin’i Jesosy izy avy eo hoe: “Homeko anao ireo rehetra ireo, raha miankohoka indray mandeha eto anatrehako ianao.” (Matio 4:8, 9; Lioka 4:5, 6) Eritrereto àry izao: Tena fakam-panahy ho an’i Jesosy ve izany, raha tsy i Satana akory no mpitondra an’ireo fanjakana ireo? Tsy nanda koa i Jesosy hoe an’i Satana ireo fanjakana rehetra ireo. Tsy maintsy ho nanda mantsy izy, raha tsy nanana fahefana tamin’ireo i Satana.

¹² Marina fa i Jehovah no Andriamanitra Mahery Indrindra sy Mpamorona an’izao rehetra izao. (Apokalypsy 4:11) Tsy miresaka mihitsy anefa ny Baiboly hoe i Jehovah Andriamanitra na i Jesosy Kristy no mpitondra an’ity tontolo ity. Nilaza mazava kosa i Jesosy fa i Satana no “mpitondra an’izao tontolo izao.” (Jaona 12:31; 14:30; 16:11) Antsoin’ny Baiboly hoe “andriamanitr’ity tontolo ity” koa i Satana Devoly. (2 Korintianina 4:3, 4) Hoy ny apostoly Jaona, momba an’i Satana: ‘Izao tontolo izao manontolo dia eo ambany fahefan’ilay ratsy.’—1 Jaona 5:19.

HOFOANANA NY TONTOLON’I SATANA

13. Nahoana isika no mila tontolo vaovao?

¹³ Vao mainka miharatsy foana izao tontolo izao isan-taona. Maro ny tafika miady, ny mpanao politika manao ny tsy marina, ny mpitondra fivavahana mihatsaravelatsihy, ary ny mpanao heloka bevava. Tsy ho avotra intsony ity tontolo ity. Milaza ny Baiboly fa efa kely sisa dia handringana an’ity tontolo ity Andriamanitra, amin’ilay ady atao hoe Hara-magedona. Hisy tontolo vaovao hitoeran’ny fahamarinana aorian’izay.—Apokalypsy 16:14-16.

14. Iza no nofidin’Andriamanitra ho Mpitondra ny Fanjakany, ary inona no efa nolazain’ny Baiboly momba an’izany?

¹⁴ Nifidy an’i Jesosy Kristy i Jehovah, mba ho Mpitondra an’ilay Fanjakany any an-danitra. Efa ela ny Baiboly no nilaza hoe: ‘Misy zaza teraka ho antsika, zazalahy no homena antsika, ary ho eo an-tsorony ny fahefan’andriana. Ny anarany dia hatao hoe Andrianan’ny Fiadanana. Tsy hanam-pahataperana izany fahefana lehibe ananany izany ary tsy hisy farany koa ny fiadanana.’ (Isaia 9:6, 7) Nampianarin’i Jesosy hivavaka momba an’io Fanjakana io ny mpanara-dia azy, hoe: “Ho tonga anie ny fanjakanao! Hatao etỳ an-tany anie ny sitraponao, tahaka ny any an-danitra!” (Matio 6:10) Hianarantsika any aoriana fa kely sisa dia hanafoana ny fitondrana rehetra eto an-tany ny Fanjakan’Andriamanitra, ka hisolo azy ireo. (Vakio ny Daniela 2:44.) Hanova ny tany ho paradisa io Fanjakana io aorian’izay.

KELY SISA DIA HISY TONTOLO VAOVAO!

15. Inona no atao hoe “tany vaovao”?

¹⁵ Milaza ny Baiboly fa ‘misy lanitra vaovao sy tany vaovao hitoeran’ny fahamarinana, ary izany no andrasantsika’, araka ny fampanantenan’Andriamanitra. (2 Petera 3:13; Isaia 65:17) Ny olona miaina eto an-tany indraindray no antsoina hoe “tany” ao amin’ny Baiboly. (Genesisy 11:1) Ilay hoe “tany vaovao” hitoeran’ny fahamarinana àry dia ny vahoaka ankasitrahan’Andriamanitra.

16. Inona ny fanomezana faran’izay tsara homen’Andriamanitra ny olona ankasitrahany, ary inona no tsy maintsy ataontsika mba hahazoana an’izany?

¹⁶ Nampanantena i Jesosy fa ‘hiaina mandrakizay’ ny olona ankasitrahan’Andriamanitra. (Marka 10:30) Fanomezana faran’izay tsara avy amin’Andriamanitra ny fiainana mandrakizay. Jereo ao amin’ny Jaona 3:16 sy ny Jaona 17:3 hoe inona no nolazain’i Jesosy fa tsy maintsy ataontsika raha te hahazo an’izany isika. Be dia be ny fitahiana ho azon’ireo olona hiaina ao amin’ilay paradisa eto an-tany. Andeha hodinihintsika izany.

17, 18. Ahoana no ahazoantsika antoka fa hiadana ny olona eran-tany ary tsy hatahotra intsony?

¹⁷ Tsy hisy intsony ny olona ratsy, ady, heloka bevava, ary herisetra. ‘Tsy hisy intsony ny ratsy fanahy. Fa ny mpandefitra kosa no handova ny tany.’ (Salamo 37:10, 11) Hiadana ny olona satria ‘hampitsahatra ady hatrany amin’ny faran’ny tany’ Andriamanitra. (Salamo 46:9; Isaia 2:4) “Hiroborobo ny olo-marina, ary ho be ny fiadanana raha mbola misy koa ny volana”, izany hoe mandrakizay.—Salamo 72:7.

¹⁸ Tsy hisy zavatra hampatahotra intsony. Tsy nisy zavatra nampatahotra an’ireo Israelita mihitsy fahiny, rehefa nankatò an’Andriamanitra izy ireo. (Levitikosy 25:18, 19) Hoatr’izany koa any amin’ny Paradisa, ka tena hahafinaritra ny fiainana.—Vakio ny Isaia 32:18; Mika 4:4.

19. Ahoana no ahafantarantsika fa hisy sakafo tondraka ao amin’ny tontolo vaovao?

¹⁹ Tsy hisy mosary. Hoy ny mpanao salamo: “Hahavokatra be ny tany, ary na eny an-tampon-tendrombohitra aza dia ho be ny vokatra.” (Salamo 72:16) Hotahin’i Jehovah ny olo-marina ka ‘hahavokatra ny tany.’—Salamo 67:6.

20. Ahoana no ahazoantsika antoka fa ho lasa paradisa ny tany manontolo?

²⁰ Ho lasa paradisa ny tany manontolo. Ho feno trano sy zaridaina mahafinaritra ity tany nosimban’ny olona mpanota ity. (Vakio ny Isaia 65:21-24; Apokalypsy 11:18) Hovolena ny tany, ka ho tsara tarehy sy hahavokatra toy ny zaridainan’i Edena izy manontolo, rehefa ela ny ela. ‘Hanokatra ny tanany’ foana Andriamanitra, ka ‘hanome fahafaham-po ny fanirian’ny zavamananaina rehetra.’—Salamo 145:16.

21. Inona no porofo fa tsy hasiaka intsony ny biby?

²¹ Tsy hasiaka intsony ny biby. Hiaraka hisakafo ny bibidia sy ny biby fiompy. Na ny zazakely aza tsy hatahotra an’ireny biby masiaka hitantsika amin’izao ireny. (Vakio ny Isaia 11:6-9; 65:25) Ny olona koa tsy hampijaly biby intsony.

22. Hatao ahoana ny aretina?

²² Hofoanana ny aretina. Hanasitrana olona be lavitra noho ny tamin’izy teto an-tany i Jesosy, satria izy no Mpanjakan’ny Fanjakan’Andriamanitra any an-danitra. (Matio 9:35; Marka 1:40-42; Jaona 5:5-9) Tsy hisy olona hilaza intsony amin’izay hoe: Marary aho.—Isaia 33:24; 35:5, 6.

23. Nahoana no tena hahafaly antsika ny fitsanganan’ny maty?

²³ Hatsangana ny havantsika efa maty, ary hiaina mandrakizay. Hovelomina indray ny olona maty rehetra ao amin’ny fitadidian’Andriamanitra. Hisy tokoa ny “fitsanganan’ny marina sy ny tsy marina.”—Asan’ny Apostoly 24:15; vakio ny Jaona 5:28, 29.

24. Ahoana no fahitanao an’izany hoe hiaina ao amin’ny Paradisa eto an-tany izany?

²⁴ Tena ho sambatra tokoa ny olona mianatra momba an’i Jehovah, ilay Mpamorona Be Voninahitra, sy mifidy ny hanompo azy! Ilay Paradisa eto an-tany amin’ny hoavy no tian’i Jesosy horesahina rehefa nampanantena an’ilay jiolahy teo akaikiny izy hoe: “Hiaraka amiko any amin’ny Paradisa ianao.” (Lioka 23:43) Tena mila mianatra momba an’i Jesosy àry isika, satria tsy hahazo an’ireo fitahiana ireo isika raha tsy noho izy.

1. Inona ilay vavaka malaza hodinihintsika?

SAIKA ny olona eran-tany no mahay an’ilay vavaka hoe Rainay Izay any An-danitra na ilay Vavaka Nampianarin’ny Tompo. Vavaka modely nataon’i Jesosy Kristy izy io, ary tena misy dikany. Handinika an’ireo zavatra telo voalohany ao amin’io vavaka io isika. Hanampy antsika hahalala tsara an’izay lazain’ny Baiboly izany.

2. Inona ny zavatra telo nasain’i Jesosy nangatahin’ny mpianany?

² Izao no nasain’i Jesosy nolazaina tao amin’ilay vavaka: “Rainay izay any an-danitra, hohamasinina anie ny anaranao! Ho tonga anie ny fanjakanao! Hatao etỳ an-tany anie ny sitraponao, tahaka ny any an-danitra!” (Matio 6:9-13) Inona ny dikan’ireo zavatra telo ireo?

3. Inona no mila fantatsika momba ny Fanjakan’Andriamanitra?

³ Efa nianatra zavatra betsaka momba ny anaran’Andriamanitra hoe Jehovah isika. Efa nodinihintsika koa ny sitrapony, anisan’izany ny zavatra efa nataony sy mbola hataony ho an’ny olona. Inona àry no tian’i Jesosy holazaina rehefa nasainy nivavaka isika hoe: “Ho tonga anie ny fanjakanao”? Inona ny Fanjakan’Andriamanitra? Nahoana no lazaina hoe rehefa tonga izy io, dia hohamasinina ny anaran’Andriamanitra ary hatao ny sitrapony?

INONA NY FANJAKAN’ANDRIAMANITRA?

4. Inona ny Fanjakan’Andriamanitra, ary iza no Mpanjakan’izy io?

⁴ Izy io dia fitondram-panjakana natsangan’i Jehovah Andriamanitra, ary Mpanjaka nofidiny no mitantana azy. Iza io Mpanjaka io? I Jesosy Kristy. Ambony noho ny mpitondra olombelona rehetra izy, ary antsoina hoe “Mpanjakan’izay manjaka sy Tompon’ny tompo.” (1 Timoty 6:15) Tsara lavitra ny zavatra vitany mihoatra noho izay vitan’ny mpitondra olombelona, na iza izany na iza, na izay mahay indrindra aza.

5. Avy aiza ny Fanjakan’Andriamanitra no hitondra ny vahoakany, ary aiza ny faritra hanjakany?

⁵ Avy aiza ny Fanjakan’Andriamanitra no hitondra ny vahoakany? Fantatsika fa natsangana ho any an-danitra i Jesosy, rehefa avy novonoina teo amin’ny hazo fijaliana. (Asan’ny Apostoly 2:33) Any an-danitra àry no misy an’ilay Fanjakan’Andriamanitra. Izany no iantsoan’ny Baiboly azy io hoe ‘fanjakana any an-danitra.’ (2 Timoty 4:18) Hanjaka amin’ny tany manontolo anefa izy io.—Vakio ny Apokalypsy 11:15.

6, 7. Nahoana no Mpanjaka tena miavaka i Jesosy?

⁶ Mpanjaka tena miavaka i Jesosy. Tsy ho faty mihitsy mantsy izy. Raha ampitahaina amin’ny mpitondra olombelona izy, hoy ny Baiboly, dia “izy irery ihany no tsy mety maty, ary mitoetra ao amin’ny hazavana tsy hay hatonina.” (1 Timoty 6:16) Midika izany fa haharitra ny zavatra tsara rehetra hataony, ary tena hanao zavatra mahagaga sy mahasoa antsika izy.

⁷ Izao, ohatra, no nolazain’ny Baiboly momba an’i Jesosy: “Hitoetra eo aminy ny fanahin’i Jehovah, dia fanahy manome fahendrena sy fahiratan-tsaina sy torohevitra sy hery sy fahalalana, ary tahotra an’i Jehovah. Hahafaly azy ny fahatahorana an’i Jehovah. Tsy hitsara araka izay hitan’ny masony fotsiny izy, na hananatra araka izay ren’ny sofiny, fa araka ny rariny no hitsarany ny mahantra, ary araka ny hitsiny no hananarany ny olona ho tombontsoan’ny mpandefitra eto an-tany.” (Isaia 11:2-4) Midika izany fa hanao ny marina sy hangoraka i Jesosy, rehefa hanjaka etỳ an-tany. Tsy mahafinaritra ve raha izany no mpitondra antsika?

8. Iza no hiara-manjaka amin’i Jesosy?

⁸ Tsy hanjaka irery i Jesosy, fa hisy olon-kafa hiara-manjaka aminy. Nilaza tamin’i Timoty, ohatra, ny apostoly Paoly hoe: “Raha miaritra foana isika, dia ho mpanjaka hiara-mitondra aminy.” (2 Timoty 2:12) Hiara-manjaka amin’i Jesosy any an-danitra tokoa ry Paoly sy Timoty, ary ny olon-kafa tsy mivadika izay nofidin’Andriamanitra. Firy ny isan’izy ireo?

9. Firy no hiara-manjaka amin’i Jesosy, ary oviana Andriamanitra no nanomboka nifidy azy ireo?

⁹ Efa hitantsika fa nahazo fahitana ny apostoly Jaona hoe: “Ny Zanak’ondry [Jesosy Kristy] nitsangana teo amin’ny Tendrombohitra Ziona [toerana ambony nomena azy any an-danitra], ary nisy efatra arivo sy efatra alina sy iray hetsy niaraka taminy, nanana ny anaran’ny Zanak’ondry sy ny anaran’ny Rainy voasoratra teo amin’ny handrin’izy ireo.” Iza ireo 144 000 ireo? Hoy ihany i Jaona: “Izy ireo no nanaraka foana ny Zanak’ondry na taiza na taiza nalehany. Novidina avy teo amin’ny olombelona izy ireo ho voaloham-bokatra ho an’Andriamanitra sy ny Zanak’ondry.” (Apokalypsy 14:1, 4) Nanara-dia an’i Jesosy Kristy foana izy ireo, ary nofidina manokana hiara-manjaka aminy any an-danitra. “Ho mpanjaka hitondra ny tany” hiaraka amin’i Jesosy izy ireo, rehefa hatsangana amin’ny maty ho any an-danitra. (Apokalypsy 5:10) Efa tamin’ny andron’ny apostoly no nanomboka nifidy Kristianina tsy nivadika Andriamanitra, mba hamenoana an’ilay isa 144 000.

10. Hazavao fa tena tia antsika Andriamanitra matoa nifidy an’i Jesosy sy ireo 144 000 mba ho mpanjakantsika.

¹⁰ Hita hoe tena tia ny olombelona Andriamanitra, rehefa nifidy an’i Jesosy sy ireo 144 000 mba ho mpanjakantsika. Efa olombelona mantsy i Jesosy, ary fantany ny hoe mijaly. Nilaza i Paoly fa “tsy mba mpisoronabe tsy mahay mangoraka antsika amin’ny fahalementsika” i Jesosy, fa “efa notsapaina tamin’ny lafiny rehetra toa antsika koa, nefa tsy nanota.” (Hebreo 4:15; 5:8) Efa niaritra fijaliana ihany koa ireo hiara-manjaka aminy. Tsy lavorary izy ireo ka niady mafy mba tsy ho resin’ny fakam-panahy. Efa tratran’ny aretina isan-karazany koa izy ireo, ary azo antoka fa ho fantany tsara ny olana mahazo ny olombelona.

INONA NO HATAON’NY FANJAKAN’ANDRIAMANITRA?

11. Nahoana ny mpianatr’i Jesosy no nasainy nangataka mba hanaovana ny sitrapon’Andriamanitra any an-danitra?

¹¹ Tsy ny hahatongavan’ny Fanjakan’Andriamanitra ihany no nasain’i Jesosy nangatahin’ny mpianany, fa ny hanaovana ny sitrapon’Andriamanitra ‘etỳ an-tany, tahaka ny any an-danitra’ koa. Any an-danitra Andriamanitra, ary efa manao ny sitrapony foana ny anjely tsy mivadika. Nianarantsika tao amin’ny Toko faha-3 anefa fa nisy anjely anankiray tsy nanao ny sitrapony intsony, fa nitaona an’i Adama sy Eva hanota. I Satana Devoly io anjely ratsy io, ary mbola hianatra momba azy isika any amin’ny Toko faha-10. Nisy anjely hafa atao hoe demonia koa nanaraka an’i Satana. Navela hijanona kelikely tany an-danitra aloha izy ireo. Tsy hoe nanao ny sitrapon’Andriamanitra daholo àry ny tany an-danitra tamin’izay. Niova anefa izany rehefa nanomboka nitondra ny Fanjakan’Andriamanitra. Niady tamin’i Satana mantsy i Jesosy Kristy, raha vao lasa Mpanjaka.—Vakio ny Apokalypsy 12:7-9.

12. Inona ny zava-nitranga roa tena niavaka resahin’ny Apokalypsy 12:10?

¹² Izao no nitranga: “Nahare feo mafy tany an-danitra aho, nanao hoe: ‘Ankehitriny dia tonga ny famonjen’Andriamanitsika sy ny heriny ary ny fanjakany sy ny fahefan’ny Kristiny, satria natsipy ilay mpiampanga ny rahalahintsika [Satana], dia ilay miampanga azy ireo andro aman’alina eo anatrehan’Andriamanitsika!’” (Apokalypsy 12:10) Nisy zava-nitranga roa tena niavaka resahiny eo. Voalohany, nanomboka nitondra ny Fanjakan’Andriamanitra, ka i Jesosy Kristy no Mpanjaka. Faharoa, noroahina avy any an-danitra i Satana, ary natsipy tetỳ an-tany.

13. Inona ny vokany rehefa noroahina avy any an-danitra i Satana?

¹³ Inona ny vokatr’ireo zava-nitranga roa ireo? Hoy ny Apokalypsy 12:12: “Noho izany, dia mifalia ry lanitra sy ianareo izay monina ao aminy!” Faly tokoa ny any an-danitra, satria tsy any intsony i Satana sy ny demoniany. Anjely tsy mivadika amin’i Jehovah daholo izao no any, ary milamina sy miray saina tsara. Efa atao any an-danitra àry ny sitrapon’Andriamanitra.

14. Inona no nitranga rehefa nazera tetỳ an-tany i Satana?

¹⁴ Nanao ahoana kosa ny tetỳ an-tany? Hoy ny Baiboly: “Loza ho an’ny tany sy ny ranomasina, fa nidina any aminareo ny Devoly sady tezitra mafy, satria fantany fa fohy ny fotoana ananany.” (Apokalypsy 12:12) Tezitra i Satana satria noroahina avy any an-danitra, sady fohy ny fotoana ananany. Ataony àry izay hisian’ny “loza” na fahoriana etỳ an-tany. Mbola hianarantsika ao amin’ny toko manaraka izany. Ahoana àry no hanatanterahan’ilay Fanjakana ny sitrapon’Andriamanitra etỳ an-tany?

15. Inona ny sitrapon’Andriamanitra momba ny tany?

¹⁵ Tadidinao ve ny sitrapon’Andriamanitra momba ny tany? Nanazava izany ny Toko faha-3. Hita tamin’izay nataon’Andriamanitra tany Edena fa tiany ho paradisa ny tany, ary ho feno olo-marina tsy ho faty mihitsy. Nitarika an’i Adama sy Eva hanota i Satana, ka lasa tsy tanteraka ny sitrapon’Andriamanitra. Tsy niova anefa ny sitrapony. Mbola tiany “handova ny tany” ihany ny olo-marina, ka “honina eo mandrakizay.” (Salamo 37:29) Ny Fanjakan’Andriamanitra no hanatanteraka an’izany. Amin’ny fomba ahoana?

16, 17. Inona no ianarantsika avy amin’ny Daniela 2:44, momba ny Fanjakan’Andriamanitra?

¹⁶ Izao no voalazan’ny Daniela 2:44: “Amin’ny andron’ireo mpanjaka ireo, dia hanorina fanjakana tsy ho rava mandrakizay ilay Andriamanitry ny lanitra, ary tsy ho lasan’olon-kafa izany fanjakana izany. Hotorotoroin’izy io sy hofoanany ireo fanjakana rehetra ireo, fa izy kosa haharitra mandritra ny fotoana tsy voafetra.” Inona no ianarantsika avy amin’izany, momba ny Fanjakan’Andriamanitra?

¹⁷ Voalohany, “amin’ny andron’ireo mpanjaka ireo” no hatsangana ny Fanjakan’Andriamanitra, izany hoe amin’ny fotoana mbola isian’ny fitondran’olombelona. Faharoa, haharitra mandrakizay ilay Fanjakana. Tsy hisy fitondram-panjakana handresy na handimby azy io. Fahatelo, hiady ny Fanjakan’Andriamanitra sy ny fanjakana rehetra eto an-tany. Ny Fanjakan’Andriamanitra no handresy, ary izy irery no hitondra ny olombelona. Hiadana ny olona satria io no fitondram-panjakana tsara indrindra hatramin’izay.

18. Inona no iantsoana an’ilay ady hifanaovan’ny Fanjakan’Andriamanitra sy ny fanjakan’olombelona eto an-tany?

¹⁸ Betsaka ny zavatra lazain’ny Baiboly momba an’ilay ady hifanaovan’ny Fanjakan’Andriamanitra sy ny fanjakan’olombelona eto an-tany. Hisy anjely ratsy, ohatra, hanely lainga mba hamitahana ny “mpanjakan’ny tany rehetra misy mponina”, rehefa manakaiky ny farany. Nahoana? ‘Mba hanangonana an’ireo mpanjakan’ny tany ireo ho amin’ny adin’ilay andro lehiben’ilay Andriamanitra Mahery Indrindra.’ Hangonina any “amin’ilay toerana antsoina amin’ny teny hebreo hoe Hara-magedona” izy ireo. (Apokalypsy 16:14, 16) Antsoina hoe Hara-magedona àry ilay ady hifanaovan’ny Fanjakan’Andriamanitra sy ny fanjakan’olombelona.

19, 20. Nahoana no mbola tsy tanteraka etỳ an-tany ny sitrapon’Andriamanitra?

¹⁹ Nahoana no tena ilaina ny ady Hara-magedona? Eritrereto indray ny sitrapon’Andriamanitra momba ny tany. Tiany ho paradisa ny tany, ka ho feno olo-marina sy lavorary ary manompo azy. Nahoana anefa izany no mbola tsy tanteraka? Satria mpanota isika, ka marary sy maty. Efa hitantsika anefa fa afaka ny hiaina mandrakizay isika, satria maty ho antsika i Jesosy. Tadidinao angamba ilay teny ao amin’ny Jaona 3:16 hoe: “Lehibe tokoa ny fitiavan’Andriamanitra an’izao tontolo izao, ka nomeny ny Zanany lahitokana mba tsy ho ringana izay rehetra maneho finoana azy, fa hanana fiainana mandrakizay.”

²⁰ Nahoana koa ny sitrapon’Andriamanitra no mbola tsy tanteraka? Satria be dia be ny olona manao ratsy, ka mandainga sy mamitaka ary ratsy fitondran-tena. Tsy te hanao ny sitrapon’Andriamanitra izy ireo, ka ho ringana amin’ny Hara-magedona. (Vakio ny Salamo 37:10.) Mbola tsy atao etỳ an-tany koa ny sitrapon’Andriamanitra, satria tsy mampirisika ny olona hanao an’izany ny fitondram-panjakana. Maro ny fitondrana tsy mahay mitantana sy manao didy jadona ary tsy manao ny marina. Milaza ny Baiboly fa “nanjakazaka tamin’ny namany ny olona ka nampiditra loza taminy.”—Mpitoriteny 8:9.

21. Ahoana no hanatanterahan’ilay Fanjakana ny sitrapon’Andriamanitra etỳ an-tany?

²¹ Ny Fanjakan’Andriamanitra ihany sisa no hitondra ny olombelona, aorian’ny Hara-magedona. Hanatanteraka ny sitrapon’Andriamanitra izy io, ary hanao zavatra tsara be dia be. Hogadraina, ohatra, i Satana sy ny demoniany. (Apokalypsy 20:1-3) Hitondra fitahiana ny soron’i Jesosy, ka tsy harary na ho faty intsony ny olona tsy mivadika, fa ho afaka hiaina mandrakizay. (Vakio ny Apokalypsy 22:1-3.) Ho lasa paradisa koa ny tany. Rehefa hanao an’izany àry ilay Fanjakana, dia ho tanteraka etỳ an-tany ny sitrapon’Andriamanitra ary hohamasinina ny anarany. Midika izany fa hanome voninahitra an’ilay anarana hoe Jehovah daholo ny vahoakan’ilay Fanjakana.

OVIANA NO NANOMBOKA NIASA NY FANJAKAN’ANDRIAMANITRA?

22. Inona no manaporofo fa tsy tamin’i Jesosy tetỳ an-tany, na tamin’izy vao niakatra tany an-danitra, no tonga ny Fanjakan’Andriamanitra?

²² Mbola tsy tonga tamin’ny andron’i Jesosy ilay Fanjakana, matoa ny mpianany nasainy nivavaka hoe: “Ho tonga anie ny fanjakanao!” Mbola tsy tonga koa izy io tamin’i Jesosy lasa tany an-danitra. Samy nilaza mantsy i Petera sy Paoly fa rehefa natsangana tamin’ny maty i Jesosy, dia tanteraka taminy ilay faminaniana ao amin’ny Salamo 110:1 hoe: “Hoy i Jehovah tamin’ny Tompoko: ‘Mipetraha eto ankavanako mandra-panaoko ny fahavalonao ho fitoeran-tongotrao.’” (Asan’ny Apostoly 2:32-35; Hebreo 10:12, 13) Midika izany fa tsy tonga dia nanjaka i Jesosy fa mbola niandry.

23. a) Oviana no nanomboka nanjaka ny Fanjakan’Andriamanitra? b) Inona no hianarana ao amin’ny toko manaraka?

²³ Oviana no tapitra ilay fotoana niandrasan’i Jesosy? Tamin’ny 1914, araka ny kajy nataon’ireo mpianatra Baiboly taorian’ny 1870. Manamarina an’izany ny zava-nitranga nanomboka tamin’ny 1914. (Manazava an’io daty io ny Fanazavana Fanampiny, “1914: Taona Miavaka ao Amin’ny Faminanian’ny Baiboly.”) Tanteraka ny faminanian’ny Baiboly, ka voaporofo fa lasa Mpanjaka i Kristy tamin’ny 1914, ary nanomboka nanjaka ny Fanjakan’Andriamanitra any an-danitra. Efa ao anatin’ilay ‘fotoana fohy’ ananan’i Satana àry isika izao. (Apokalypsy 12:12; Salamo 110:2) Azontsika antoka koa fa tsy ho ela dia hanao zavatra ny Fanjakan’Andriamanitra, mba ho tanteraka etỳ an-tany ny sitrapon’Andriamanitra. Tsy vaovao tsara tokoa ve izany? Mino an’izany ve ianao? Ho hitanao ao amin’ny toko manaraka fa izany tokoa no ampianarin’ny Baiboly.