Mitantara ireo mpitory ny Fanjakana
Zavatra hita teny am-pitoriana avy any Tuvalu
NY VAOVAO tsaran’ny Fanjakana dia torina any amin’ireo nosy kanton’i Tuvalu, any Pasifika Atsimo, ary nisy aza olona manana toerana ambony nanaovana fanambarana tsara. Ny Vavolombelona aostraliana iray izay mpiandraikitra mpitety faritany any amin’ireny nosy ireny dia nanao izao fitantarana izao:
“Nasaina hisakafo tany amin’ny praiministr’i Tuvalu izahay mivady, sakafo natao ho fanomezam-boninahitra ny minisitra aostraliana momba ny Raharaham-bahiny, tonga nanao fitsidihana tany amin’ireo nosy ireo. Nandritra ny fisakafoana dia nanana fahafahana tsara dia tsara hanao fanambarana tamin’ilay minisitra aostraliana sy ny vadiny izahay mivady. Rehefa nampahafantatra anay ny praiministra dia nohazavainy fa nanao asa mahavariana any amin’ny fitambaran’ireo nosy ny Vavolombelon’i Jehovah, indrindra raha ny amin’ny fandikana ireo bokintsika amin’ny fiteny Tuvalu. ‘Izaho dia manana ao amin’ny fitehirizam-bokiko tsirairay avy amin’ny bokin’izy ireo; tsara dia tsara izy ireny!’ hoy izy. Liana tamin’ny fitantarana ny fandrosoan’ny asantsika eto Tuvalu ilay minisitra aostraliana sy ny vadiny.
“Nony harivan’iny, dia nanatrika fampisehoana dihy vako-drazana izahay. Avy eo dia nanatona anay ny governora jeneralin’i Tuvalu ary nilaza taminay fa tamin’ny herinandro lasa dia nandalo tao aminy ny Vavolombelona ka namelany gazety Ny Tilikambo Fiambenana sy Réveillez-vous! vitsivitsy izy. Tao amin’ny pejy farany amin’ny iray amin’ireo gazety ireo, dia nanamarika fampahafantarana ny Soratra Masina — Fandikan-tenin’izao tontolo izao vaovao, izy ary ta-hahafantatra ny fomba hahazoany iray amin’izay eo an-toerana. Nolazainay taminy fa ho faly izahay hitondra anankiray ho azy. Ny alahady manaraka àry aho dia nankany aminy nitondra Baiboly iray ary nanao resadresaka tsara teo amin’ny adiny iray izahay. Io lehilahy io dia nilaza taminay fa ankasitrahany be dia be ny asantsika sy ireo bokintsika. Tamin’ny nahatongavanay koa, dia teo am-pamakiana ny boky Hiaina mandrakizay amin’ny fiteny Tuvalu ny vadiny. Toy izany no nahitanay fifaliana tamin’ny nanaovana fanambarana tamin’ny sasantsasany amin’izay manana fahefana’.” — 1 Timoty 2:1-4.
Tamin’ny fotoana hafa indray dia nankany amin’ireo nosy Salomon ny praiministr’i Tuvalu. Ny fitambaran’ireo mponina avy any Tuvalu teo an-toerana dia nanao fanasana lehibe ho fanomezam-boninahitra azy. Tamin’ireo nasaina dia nisy vehivavy kristiana iray Vavolombelon’i Jehovah, izay tatỳ aoriana dia nanao izao fitantarana manaraka izao:
“Rehefa vita ny sakafo, dia nasain’ny praiminisitra izay naniry hanao izany, hametraka aminy fanontaniana momba ny vaovao any Tuvalu. Tamin’ny fanontaniana hoe ‘Misy fivavahana vaovao ve any Tuvalu?’ dia namaly izy fa ‘i Tuvalu dia nanaiky handray ny fivavahana vaovao vitsivitsy, izay ny iray aminy ihany no tsara’. Rehefa nanontaniana izy hoe iza moa izany dia namaly izy hoe: ‘Ny an’ny Vavolombelon’i Jehovah.’
“Nanaitra ny olona rehetra ny valin-teniny. Tonga teo am-bavan’ny maro avy hatrany ny fanontaniana hoe: Nahoana ny Vavolombelon’i Jehovah no ‘hany fivavahana tsara’? Dia novalian’ilay praiminisitra hoe: ‘Satria ireo mpitandrintsika dia mijanona any an-tranony mandritra ny andro ary mianina amin’ny fampanenoana lakolosy fotsiny isaky ny alahady mba handehanantsika mihaino azy. Ny Vavolombelon’i Jehovah kosa dia misahirana manatona anao, ary na dia tsy mandeha any am-piangonana aza ianao, dia vonona hampianatra Baiboly anao any an-tokantrano izy.”
Araka izany àry, raha misy ny manakiana ny asantsika isan-trano, ny hafa kosa dia miharihary fa mankasitraka ny fitondrantsika ny hafatra hatrany an-tranony. — Asa. 5:42.