“Ny Asany Manaraka Azy”

TAMIN’NY 8.50 maraina ny alakamisy 28 Jolay 1994, dia nahavita ny fihazakazahany teto an-tany i George D. Gangas. Valo amby sivifolo taona izy. Iray amin’ny voahosotra i George Gangas sady anisan’ny Fitambara-mpitantan’ny Vavolombelon’i Jehovah hatramin’ny 15 Oktobra 1971.

Izay rehetra nahalala manokana ny Rahalahy Gangas dia nahafantatra ny fitiavany ny fahamarinana sy ny fankahalany ny faharatsiana. Tadidin’izy ireo tsara ny fomba nilazalazany niverimberina an’i Satana ho mpandainga miharihary, mahatsiravina, ratsy fanahy sy ambany saina ary maharikoriko. Mifanohitra amin’izany, izy dia niresaka momba an’i Jehovah ho Ray be fitiavana sy hatsaram-panahy sy fangorahana sy fahalemem-panahy ary fiahiana. Maro koa no mahatadidy ny fitiavany nanao fanontaniana ara-baiboly. Na inona na inona resaka ifanaovana, izy dia azo antoka fa hanao fanontaniana ara-baiboly — ny sasany tamin’izy ireny dia tsotra, ny hafa sarotra kokoa. Eny tokoa, tiany ny fahamarinana ao amin’ny Baiboly.

Vita batisa tamin’ny 15 Jolay 1921 ny Rahalahy Gangas. Nanomboka ny asany tao amin’ny fanompoana manontolo andro (asan’ny mpisava lalana) izy tamin’ny Martsa 1928. Koa amin’izany, dia tao amin’ny fanompoana manontolo andro izy nandritra ny 66 taona amin’ny fitambarany. Tonga anisan’ny mpiasan’ny foiben’ny Watch Tower Bible and Tract Society any Brooklyn izy tamin’ny 31 Oktobra 1928.

Hita ao amin’ny Ny Tilikambo Fiambenana (frantsay) tamin’ny 1 Septambra 1967 ny tantaram-piainany. Izy io dia manome filazalazana ny amin’ny olon’Andriamanitra iray tena araka ny fanahy tokoa. Ao amin’io lahatsoratra io, dia nanao izao filazana manafana ny fo manaraka izao izy: “Tiako ny fiainana ary iriko ireo rahalahiko hahazo ny fiainana. Ataoko, sahala amin’ny nataon’ny apostoly Paoly, fa ny zavatra hafa rehetra dia ‘fatiantoka avokoa noho ny fihoaran’ny hatsaran’ny fahalalana an’i Kristy Jesosy’ ”. — Filipiana 3:8.

Nasehon’ny Rahalahy Gangas tamin’ny asany fa tia ny fiainana tokoa izy, ary nizara ny ‘fahalalany an’i Kristy Jesosy’ tamim-pahadodonana tamin’ny hafa. Ho tsapa ny tsy maha-eo azy intsony, kanefa toy inona moa ny fifaliantsika fa nandray ny valisoany any an-danitra izy ankehitriny! Ankehitriny, dia “hitsahatra amin’izay nisasarany izy; fa ny asany manaraka azy”. — Apokalypsy 14:13.

[Sary, pejy 31]