Ny fanapahan’Andriamanitra — Ny fanafodiny tsara indrindra
NY TANTARAN’NY politika dia manaporofo fa ny olombelona tsy lavorary dia tsy afaka manapaka amin’ny fomba mety ny namany. Izany no nambaran’ny lehilahy anglisy iray, Lord Acton, tamin’izao teny izao: “Mitarika ho amin’ny fanimbana ny fahefana, ary ny fahefana tsy refesi-mandidy dia manimba tanteraka.” Eny, araka ny ilazan’ny Baiboly azy, dia “misy andro anapahan’ny olona ny namany ka ampidirany loza aminy”. — Mpitoriteny 8:9.
Tany am-boalohany dia nomen’i Jehovah Andriamanitra fahefana teo amin’ny biby ny olona fa tsy teo amin’ny olombelona hafa. Hoy izy tamin’ny Zanany lahy, ilay noharìny voalohany tany an-danitra: “Andeha Isika hamorona olona tahaka ny endritsika, araka ny tarehintsika; ary aoka izy hanjaka amin’ny hazandrano ao amin’ny ranomasina sy ny voro-manidina sy ny biby fiompy sy ny tany rehetra ary ny biby rehetra izay mandady na mikisaka amin’ny tany.” (Genesisy 1:26). Ny olona àry izany dia nanana ny Mpamorona azy ho Filohany. Ahoana no niovan’izany tarehin-javatra izany?
Rehefa nikomy ny olona tao amin’ny zaridainan’i Edena dia nolaviny ny fahefan’Andriamanitra ka hatramin’izay dia nanohy nanao izany foana izy (Genesisy, toko faha-3). Niharihary izany fihetsika izany teo amin’ny Isiraely fahiny, firenena nofidin’Andriamanitra ho azy. Rehefa nangataka mpanjaka olombelona iray ny Isiraelita dia hoy Jehovah tamin’i Samoela mpaminany: “Tsy hianao no laviny, fa Izaho no laviny tsy hanjaka aminy.” — 1 Samoela 8:7.
Ny fanapahana nampiharin’Andriamanitra tamin’ny Isiraelita dia nahasoa azy ireo. Tamin’ny alalan’i Mosesy solontenany Jehovah dia nanome azy ireo lalàna izay nampiseho ny fiheverana feno fitiavana ny fahasambarany. Ireny lalàna ireny dia niaro azy tamin’ny aretina maro ary namporisika ny fanajana ireo be taona sy mpitondratena ary kamboty. Ny Lalàna dia nitaky ny hanajana ny fananan’ny hafa ary ny fanaovana ny marina amin’ny fifanarahana ara-barotra. Nanameloka ny fizahan-tavan’olona sy ny fanaovana vavolombelona mandainga ary ny fandraisana kolikoly izy. Nampihatra ny fahefana tamin’ny fomba marina tanteraka Andriamanitra.
Jehovah dia nampanantena fa hanapaka ny olombelona rehetra fa tsy ny Isiraely ihany. Nilaza izy fa hanala amin’ny olombelona tsy tanteraka ny fahefana ampihariny amin’ny olombelona hafa ka hanome izany ho an’ny Zanany lahy tokana. Nanambara izany tao amin’ny faminanian’i Ezekiela tamin’izao teny izao izy: “Fa izany koa aza dia tsy mba haharitra mandra-pahatongan’izay tena tompony tokoa, ka homeko azy izany.” — Ezekiela 21:32.
Jesosy Kristy no nomen’i Jehovah ny zo ara-dalàna hanapaka ny olombelona amin’ny maha-solontenan’ny Fiandrianany. Koa satria ny Fanjakan’Andriamanitra eo an-tanan’i Kristy no fitondram-panjakana tsara indrindra afaka hitarika ny olombelona rehetra, dia nampianatra ny mpihaino azy i Jesosy mba hivavaka ho an’ny fahatongavany. “Koa amin’izany mivavaha toy izao hianareo, hoy i Jesosy: “Rainay Izay any an-danitra, hohamasinina anie ny anaranao. Ho tonga anie ny fanjakanao. Hatao anie ny sitraponao etỳ an-tany tahaka ny any an-danitra.” — Matio 6:9, 10.
Tamin’ny fomba nitondrany ny hafa dia nasehon’i Jesosy hoe karazana filoha hanao ahoana izy. Tsy isalasalana fa nampiseho fangorahana i Kristy. “Ary nony nahita ny vahoaka Jesosy, hoy ny vakintsika, dia nahonena Azy ny fijeriny ireo, satria nampahantraina ireo ka nafoy toy ny ondry tsy misy mpiandry.” (Matio 9:36). Noporofoin’i Jesosy ny halalin’ny fitiavany an’ireo mpianany rehefa nilaza izy hoe: “Didy vaovao no omeko anareo, dia ny mba hifankatiavanareo; eny, aoka ho tahaka ny nitiavako anareo no mba hifankatiavanareo kosa.” (Jaona 13:34). Ampy fitiavana ny olombelona izy ka nomeny ny ainy ho avotra. Izany sorona izany dia mamela an’ireo izay manaiky izany ho afaka amin’ny fahotana sy ny aretina ary na dia amin’ny fahafatesana mihitsy aza. — 1 Jaona 2:1, 2; Apokalypsy 21:1-4.
Raha nanambara mialoha Isaia mpaminany fa ny fitondram-panjakan’Andriamanitra eo an-tanan’i Jesosy Kristy dia ho marina sy hitondra fiadanana, dia izao no nosoratany teo ambany tsindrimandrin’Andriamanitra: “Fa Zaza no teraka ho antsika, Zazalahy no omena antsika; ary ny fanapahana dia eo an-tsorony, ary ny anarany atao hoe Mahagaga, Mpanolo-tsaina, Andriamanitra Mahery, Rain’ny mandrakizay, Andrian’ny fiadanana. Ny handrosoan’ny fanapahana sy ny fiadanana dia tsy hanam-pahataperana, eo amin’ny seza fiandrianan’i Davida sy ny fanjakany, mba hampiorenana sy hampitoerana azy amin’ny rariny sy ny hitsiny hatramin’izao ka ho mandrakizay; ny fahasaro-piaron’i Jehovah, Tompon’ny maro, no hahatanteraka izany.” — Isaia 9:5, 6.
Ny solontenan’io fitondram-panjakan’Andriamanitra io eto an-tany dia hitovy amin’ireo lehilahy izay manome taratra dieny izao ireo toetra tsaran’i Jesosy ka manompo amin’ny maha-mpiandraikitra ao amin’ny tena kongregasiona kristiana. Tsy mba tahaka ny klerjy masiaka ireny lehilahy ireny, fa mampiseho fiheverana voamariky ny fitiavana kosa ho an’ny andian’ondry, tahaka ny nataon’i Jesosy Kristy. Momba ireny lehilahy tia fivavahana ireny dia nanoratra toy izao Isaia mpaminany: “Indro fa araka ny fahamarinana no hanjakan’ny mpanjaka, ary ny lehibe hanapaka araka ny rariny.” (Isaia 32:1). Ireny solontenan’ny fanapahan’Andriamanitra ireny dia hiasa ho an’ny tombontsoan’Andriamanitra koa ao amin’izao tontolo izao vaovao. — Salamo 45:16.
Akaiky ny fiovana lehibe!
Alohan’ny handraisan’ny Fanjakan’Andriamanitra ny fahefana tsy azo toherina eo amin’ny olombelona, dia tsy maintsy hisy fiovana lehibe hiseho. Io fiovana io dia hamarana ny fizarazaram-pirenena. Ho solon’ireo fitondram-panjakan’olombelona maro misaratsaraka, dia hisy fitondram-panjakana marina tokana any an-danitra, izay hampiray ny olombelona ho vahoaka iray izay hiaina amim-piadanana. Izany no nambaran’ny mpaminany Daniela tamin’ireto teny ireto: “Ary amin’ny andron’ireo mpanjaka ireo Andriamanitry ny lanitra dia hanorina fanjakana izay tsy havela ho an’ny olon-kafa, fa ireo fanjakana rehetra ireo [ny fitondram-panjakan’olombelona] dia hotorotoroiny sy holevoniny, fa izy kosa hitoetra mandrakizay.” — Daniela 2:44.
Ny fanapahan’Andriamanitra ihany no handamina ireo fahasahiranana ara-politika mampahory ny olombelona amin’izao androntsika izao. Ny tarehin-javatra misy ny olombelona ankehitriny dia mahatandindomin-doza hatramin’ny fiainany mihitsy! Ary anefa tsy misy fanafodiny mahafa-po atolotry ny olombelona mihitsy. Ho fanehoana fahendrena àry ny hiheverana ny fanafodiny asehon’ny Baiboly ka miandry amim-pitokiana ny fotoana tsy ho ela izay hiainan’ny olo-mahitsy amim-pahasambarana eo ambany fanapahan’Andriamanitra tsy hay tohaina sy mitondra soa.
[Sary, pejy 6]
“Araka ny fahamarinana no hanjakan’ny mpanjaka.”