Vonona ho amin’ny fidiran’ny mpianatra ve ireo zanakao
1 Rehefa afaka herinandro vitsivitsy monja dia hiverina any an-tsekoly ireo tanora kristiana. Miteraka fahataitairana kely ary angamba koa tahotra kely ao amin’izy ireo izany. Vokatry ny fahatsinjovana fisehoan-javatra sy fahasahiranana vaovao ireo fihetseham-po ireo. Hifankahalala amin’ny mpiara-mianatra sy mpampianatra vaovao ny sasany. Takatr’ireo tanora kristiana koa fa isaky ny taom-pianarana vaovao dia sedraina ny finoany, ny tsy fivadihany ary ny fitiavany an’i Jehovah. Ry tanora, vonona ho amin’ny fidiran’ny mpianatra ve ianareo? Ary ianareo, ry ray aman-dreny, ahoana no azonareo hanatanjahana ny zanakareo ho amin’ny fitsapana ho avy?
AMPIASAO NY BOKIKELY NY SEKOLY
2 Natonta ho an’ny ray aman-dreny kristiana sy ireo zanany mbola mianatra indrindra ny bokikely Ny sekoly tamin’ny 1983. Natao mba hahafahana manazava tsara amin’ireo mpampianatra sy ireo mpiasa ao amin’ny fitantanana ny zavatra inoana sy ny toeran’ny Vavolombelon’i Jehovah momba ny zavatra atao sasany ao an-tsekoly izy io. Manome fanazavana ny amin’ny toerana tanan’ny Vavolombelon’i Jehovah rehetra koa raha ny amin’ny fitondrantena izy io.
3 Niseho ho fiarovana marina tokoa ho an’ny tanora maro io bokikely io. Ohatra, ny reny Vavolombelon’i Jehovah iray dia nandre fa hisy taranja momba ny fampianarana ny amin’ny maha-lahy sy maha-vavy homen’olona fantatra amin’ny fitondrantenany tsy mendrika ao amin’ny kilasy misy ny zanany vavy. Tamin’ny alalan’ilay bokikely dia nohazavainy ny fomba fijeriny miorina amin’ny Soratra Masina ary nekena ny hitondrana fiovana mety ao amin’ny fandaharam-potoanan’ny zanany vavy.
4 Alohan’ny fidiran’ny mpianatra dia afaka manatanjaka ny saina sy ny fon’ireo zanany ny ray aman-dreny amin’ny fakana fotoana hiaraha-mijery amin’izy ireo ny ao anatin’ilay bokikely. Mifanaraka amin’ny taona, ny fari-pahaizana ary ny sekoly alehan’ny zanany, dia afaka mampisongadina hevitra samy hafa izay mety hahasoa azy ireo manokana mandritra ny taona ao amin’ilay bokikely ny ray aman-dreny (Ohab. 14:15; 22:3). Omany ny zanakareo amin’ny fisehoan-javatra samy hafa mety ho hitany ary asehoy azy hoe amin’ny ahoana ireo hevitra natolotra no hanampy azy ‘hanao làla-mahitsy halehan’ny tongony’.—Heb. 12:13.
5 Afaka manao zavatra betsaka ny ray aman-dreny mba hanampiana ny zanany ho “vonona mandrakariva hamaly” izay manontany azy ny heviny sy ny fanantenany (1 Pet. 3:15; jereo kmMG 5/90, p. 2). Amin’ny toe-javatra sasany, dia hifidy ny hiresaka manokana amin’ny mpampianatra angamba izy ireo. Nisy ray aman-dreny sasany nihevitra ny hankany amin’ny toeram-pianarana tsy tapaka, ka izany dia mandray anjara amin’ny fampitomboana fifandraisana tsara amin’ny mpampianatra. Ny mariky ny fahalianana toy izany koa dia manamafy ny fifandraisan’ny ray aman-dreny sy ny zanaka. Ny sasany aza dia manatrika mihitsy ireo fivorian’ny ray aman-drenin’ny mpianatra, ka indraindray izany dia nanampy ireo ray aman-dreny hahafantatra tsara kokoa ny manodidina itomboan’ny zanany sy ny hery mitaona izay iaretany isan’andro.—1 Petera 3:8.
6 Marina fa ny taom-pianarana vaovao dia harahin’ny fotoana mampanahy sy mampitebiteby. Kanefa, ny fomba fijery mihevitra ny lafitsaran-javatra sy ny fiomanana amim-pitandremana dia hanampy ireo ray aman-dreny sy ireo tanora ‘hampisikina ny sainy’ ho fiderana an’i Jehovah mandritra ny taom-pianarana ho avy.—1 Petera 1:13.