Fanolorana ny Boky Fahatanoranao Amin’ny Novambra
1 Araka ny asehon’ny Baiboly, ny “andro farany” dia hisy vokany ratsy eo amin’ny firaisan-tsain’ny fianakaviana. (2 Tim. 3:1-4, NW; Apok. 12:12). Na dia ireo fianakaviana teokratika aza matetika dia mahita zava-manahirana eo amin’ny fitaizana ny zanany ao amin’ny finoana. Tsy mahagaga àry raha fianakaviana maro eo amin’izao tontolo izao no miady mafy ary mila fanampiana amin’io lafiny io. Tsy isalasalana fa hisy an’arivony maro amin’izy ireo hankasitraka ny fanampiana hatolotra azy amin’ny Novambra, rehefa hanolotra azy ny boky Ny Fahatanoranao — Ny Fomba Handraisan-tsoa Be Indrindra avy Amin’izany, isika.
2 Matetika isika no mahita tanora eny am-baravarana. Tanora maro no mankasitraka ny hiresahantsika aminy. Ary raha manaja azy ireny isika ka tsy miresaka aminy “toy ny olon-dehibe manao teniko fe lehibe”, dia matetika tokoa izy ireny no mandray tsara ny hafatra entintsika. Ho azontsika atao, ohatra, ny hiteny hoe: “Faly aho fa manana fahafahana hiresaka aminao, satria maniry hahafantatra izay heverin’ny tanora. Milaza zavatra iray izay natao manokana ho an’ny tanora tahaka anao izao Andriamanitra ao amin’ny Baiboly. [Vakio Mpitoriteny 12:1.] Izany dia mampiseho fa, mandritra ny fahatanorantsika, dia tokony hieritreritra an’Andriamanitra isika raha maniry hanana hoavy sambatra. Mino ve ianao fa tokony haneho fiheverana an’Andriamanitra, ilay Mpamorona antsika, ny tanora iray? [Avelao izy hamaly.] Azoko atao ve ny mamaky zavatra aminao avy amin’ity boky ity?” Sokafy eo amin’ny pejy faha-191, ilay boky, ary vakio ny fehezanteny roa voalohany amin’ny fehintsoratra faha-15. Avy eo dia asehoy ny fanondroam-pejin’ilay boky ary tonòny ny foto-kevitra sasany mety hahaliana ny tanora, ka hankasitrahany ny hahazoana fanazavana tsy misy fihambahambana ny amin’izany. Atolory amin’ny sarany 1 000 FMG ilay boky Fahatanoranao. Mety ho hitanao fa hanampy io fanoloran-kevitra io, na mety ho tianao ny hampiasa iray hafa.
3 Misy mpitory nahita fahombiazana tamin’ny fanolorana ny boky Fahatanoranao tamin’ny tanora teny an-dalana ho any am-pianarana na hody avy any am-pianarana. Afaka miresaka amin’ireo mpampianatra sy ny mpiasa hafa any am-pianarana koa ianao. Mazava ho azy fa mpianatra maro no hanana fahafahana hanao fanambarana amin’ny mpiara-mianatra aminy ary koa amin’ireo mpampianatra azy. Tany amin’ny Repoblika Dominikana, ohatra, ny mpianatra iray dia nametraka boky Fahatanoranao iray teo ambony latabany, ka izany dia nanaitra ny fahalianan’ireo mpianatra sy mpampianatra nahita azy io. Inona no vokany? Nahapetraka 75 tamin’ny boky Fahatanoranao izy tao anatin’ny 2 volana monja!
4 Ahoana no tokony hataontsika rehefa mahita olon-dehibe na olona efa be taona eny am-baravarana isika? Ny ankamaroan’ny olona dia manana zanaka, zanaky ny iray tam-po aminy, na zafikely, izay tiany. Azontsika atao ny manolotra ny hamakian’ny tenan’izy ireo io boky io, kanefa azontsika atao koa ny manipy hevitra amim-panajana ny hakany io boky io mba hataony fanomezana ho an’ireo havany tanora ireo.
5 Maniry hanolotra fanampiana ho an’ny olona rehetra isika, na firy taona izy na firy taona, ary ireo zavatra vita an-tsoratra ananantsika dia natao ho an’izany zava-kendrena izany indrindra. Noho izany, dia aza misalasala ny manolotra izay zavatra vita an-tsoratra misy rehetra, mandritra ny volana Novambra, raha heverinao fa hahitan’ilay tompon-trano soa izany. Kanefa, amin’ny fomba mety araka izay azo atao, dia tiantsika ny hanampy ireo tanora sy ireo fianakaviana mba hiady amin’ny hery mitaonan’i Satana Devoly. Ampy ny porofo manamarina fa ny fanazavana hita ao amin’ny boky Fahatanoranao dia manampy indrindra mba hahatratrarana izany zava-kendrena izany. Enga anie àry isika hanohana amin’ny fontsika rehetra ny fanolorana ny boky Fahatanoranao amin’ny volana Novambra.