Vaovao Momba ny Fanorenana ny Biraon’ny Sampana eto Madagasikara
1 ‘Manao ahoana ny asa fanorenana ao?’ Izany no fanontanian’ireo rahalahy matetika. Faly izahay manome anareo vaovao momba ny fizotran’ny asa farany.
2 Faly aoka izany izahay naharay ny permis de construire (fahazoan-dalana hanorina avy tamin’ny fanjakana) tamin’ny Aprily 1994. Raha vantany vao azo izy io, dia afaka nanomboka ny asa fanorenana izahay.
3 Misy fandrosoana tsara eny amin’ny toeram-panorenana. Voaorina ny tamboho manodidina ireo tany vao azo farany. Vita koa ireo ateliers, na trano fiasana, rehetra ary samy efa miasa avokoa. Nahazo fitaovana sasantsasany koa izahay. Ny iray amin’ireo fitaovana lehibe indrindra ilaina dia la grue (milina fampakarana enta-mavesatra) iray. Naneho fahalalahan-tanana aoka izany ny Fikambanana nandefa ho antsika la grue lehibe iray, afaka manainga 50 taonina. Tsy mora ny nitondra azy io avy tany Toamasina, nefa noho ny fanampian’ireo rahalahintsika avy any ivelany sy eto an-toerana, dia tonga soa aman-tsara eny amin’ny toeram-panorenana izy io.
4 Mba hanorenana ny Biraon’ny Sampana eto amintsika, dia ilaina ny fanampian’ireo Mpiasa Iraisam-pirenena. Fifaliana sy fitahiana toy inona moa no tsapa, manana 24 amin’izy ireo efa miasa sahady eny amin’ny toeram-panorenana! (Sal. 133:1). Avy amin’ny tany samy hafa ireo rahalahy sy anabavy ireo ary havanana amin’ny lafiny samy hafa amin’ny fanorenana. Ny fiarahana amin’izy ireo dia tena mandrisika ireo rahalahintsika eto an-toerana, izay tena miasa tsara koa ary mahazo fampiofanana tsara dia tsara.
5 Isaky ny faran’ny herinandro, dia misy kongregasiona tonga manampy anay. Mahafaly sy mampahery aoka izany ny mahita rahalahy sy anabavy, vahiny sy teratany, tanora sy antitra, miara-miasa mba hanorenana ny ‘Tranon’Andriamanitra’. Noho ny fitiavana sy ny firaisan-tsaina kristiana toy izany, ary koa noho ny fanampian’ny fanahin’i Jehovah, dia mandroso tsara ny asa.
6 Eo am-panaovana azy izao ilay trano voalohany hisy efitrano 18. Tsy misy biriky na dia iray aza ampiasaina amin’izany, fa rindrina rihibato kosa no omanina eo ambony gorodona rihibato. Ny rindrina tsirairay dia milanja taonina maromaro ary hingain’ilay la grue dia hatambatra. Antenaina fa hisy rindrina sasantsasany ho tafatsangana hatramin’ny faran’itỳ volana itỳ. Araka ny fanantenana, dia ho vonona mba hipetrahana io trano io amin’ny Janoary 1995. Avy eo, dia hanomboka ny fanorenana ireo trano efatra hafa.
7 Fantatray fa liana amin’io fandaharam-panorenana io ianareo rahalahinay sy anabavinay. Araka ny voalaza tao amin’ny Ny Fanompoantsika Ilay Fanjakana tamin’ny Febroary 1994, izay rehetra mahafeno fepetra dia afaka mangataka ny handray anjara amin’ny asa fanorenana. Ny fomba hafa iray anohanana azy io dia amin’ny fandefasana fanomezana an-tsitrapo. Raha misy maniry hanao izany, dia afaka mandefa izany amin’ny Ny Fikambanan’ny Mpianatra ny Baiboly eto Madagasikara, B.P. 511, 101 Antananarivo. Mba tadidio ao amin’ny vavaka ataonareo koa io asa fanorenana io.
8 Farany, dia tianay ny haneho ny fankasitrahana avy amin’ny fonay, noho izay rehetra efa ataonareo mba hanampiana anay amin’io asa io. Enga anie isika rehetra hanohy hanohana ny asa mifandray amin’ny Fanjakan’i Jehovah.