Fampandrenesana

◼ Zavatra vita an-tsoratra atolotra mandritra ny Oktobra: Famandrihana amin’ny Ny Tilikambo Fiambenana sy Réveillez-vous! no hatolotra. Novambra: Ny Fahatanoranao — Ny Fomba Handraisan-tsoa Be Indrindra avy Amin’izany. Desambra: Ilay Lehilahy Niavaka Indrindra Teto An-tany. Janoary: Ny Fahatanoranao — Ny Fomba Handraisan-tsoa Be Indrindra avy Amin’izany. FANAMARIHANA: Ireo kongregasiona izay hila an’ireo zavatra hatolotra eny amin’ny asa fanompoana voalaza eo ambony ireo dia tokony hanafatra azy ireo amin’ny Taratasy Fanafarana Zavatra Vita An-tsoratra (S-AB-14) halefany manaraka.

◼ Ny takelaka fanampiny amin’itỳ Ny Fanompoantsika Ilay Fanjakana itỳ dia ny “Fandaharana Amin’ny Sekolin’ny Fanompoana Teokratika Amin’ny 1995”. Tokony hotahirizintsika mba hahafahantsika hijery azy mandritra ny taona 1995 manontolo izy io.

Fampiasana Ilay Bokikely Vaovao Amin’ny Fomba Mandaitra

¹ Tamin’ny fivoriamben’ny distrikantsika vao haingana, dia faly aoka izany isika nahazo ilay bokikely vaovao hoe Rehefa Nody Mandry ny Olona Iray Tianao. Tokony hanintona ny olona avy amin’ny fari-piainana rehetra izy io, satria maro aoka izany no efa azon’alahelo noho ny famoizana olon-tiana iray. Noho ireo sary manaitra ny maso ao aminy dia tokony ho mora ny fametrahana azy io amin’ny olona. Eo amin’ny pejy faha-29, ilay sary hoso-doko mampihetsi-po lalina momba an’i Lazarosy atsangana amin’ny maty dia mampiseho ny ‘fanirian’i Jesosy mafy hanafoana ny fandravan’ny fahafatesana’. Ilay sary mameno ilay pejy manaraka dia mampiseho fitsanganana amin’ny maty falifaly ao amin’ny tontolo vaovao. Tokony hanafana ny fon’ireo izay azon’alahelo toy inona moa izany!

² Io bokikely io dia afaka ny ho fanampiana tsy misy ohatra izany mba hampiononana ireo nidonam-pahoriana. Novolavolaina mba ho toy ny resaka ifanaovana izy io. Misy fanontaniana natao mba hampisehoana ireo hevitra misongadina ao amin’ny faritra voafefy iray amin’ny faran’ny fizarana tsirairay, fa tsy amin’ny faran’ny pejy tsirairay akory. Afaka mampiasa ireo “Fanontaniana Hosaintsainina” ireo ianao amin’izay fomba rehetra heverinao fa hanampy indrindra ny mpianatrao.

³ Rehefa manao fitsidihana ianao, dia mahaiza mifantina ireo hevitra tianao horesahina, hita ao amin’ilay bokikely. Mety ho tsapanao fa hety ny hampisehoana ireo loha hevitra ao anatiny eo amin’ny pejy faha-2 sy ny hangatahana an’ilay tompon-trano hilaza aminao izay mahaliana azy. Fantaro ny zavatra ilain’ny olona tsirairay. Avelao izy hilaza ny fihetseham-pony, ary avy eo dia asehoy ny fomba anoloran’ilay bokikely fampiononana. Ny fizarana tsirairay dia mampiasa andinin-teny ao amin’ny Baiboly be dia be izay manome ny fototry ny fanantenantsika.

⁴ Ilay lohatenikely eo amin’ny pejy faha-5 hoe “Misy ny Tena Fanantenana”, dia manasongadina ilay fanantenana feno fampiononana miorina amin’ny Baiboly ho an’ireo maty. Izany dia tokony hahatonga haniry hiresaka momba ny “Fanantenana Azo Antoka Iray ho An’ireo Nody Mandry”, hita eo amin’ny pejy 26-31. Ny faritra voafefy eo amin’ny pejy faha-27 dia manome “Andinin-teny Izay Mampionona” fanampiny. Tsy ho ela ny tompon-trano iray azon’alahelo dia hahita fa tena “Andriamanitry ny fampiononana rehetra” tokoa i Jehovah. — 2 Kor. 1:3-7.

⁵ Amin’ny fomba feno fahaiza-mandanjalanja, ireo fizarana eny anelanelany dia mahafaoka ireo fihetsika maro samy hafa eo anoloan’ny fahafatesan’ny olon-tiana iray. Asehon’izy ireo ny fomba handresena ny alahelo sy ny fomba ahafahan’ny hafa manampy amin’ireny fotoana mampahory ireny. Misy faritra voafefy iray eo amin’ny pejy faha-25 mitondra ny lohateny hoe “Fanampiana ny Ankizy Hiatrika ny Fahoriana Ateraky ny Fahafatesana”. Izany dia tokony ho tena fanampiana ho an’ireo ray aman-dreny izay tsy maintsy mandresy io zava-manahirana io.

⁶ Mihazòna bokikely iray fanampiny eny aminao, hampiasainao eo amin’ny fanaovana fanambarana tsy ara-potoana. Mety ho tianao ny hitsidika toeram-paty eo amin’ny faritaninao mba hahitana raha ho tian’ny mpiandraikitra azy ireo ny hanana bokikely sasantsasany mba hampiononana ireo fianakaviana nidonam-pahoriana. Na koa, mety hanatona amim-pahaiza-mandanjalanja ireo azon’alahelo any amin’ny toeram-pandevenana ianao amin’ny fotoana iverenan’izy ireny hitsidika ny fasan’ny olon-tiana iray.

⁷ Faly isika satria i Jehovah dia ilay Andriamanitra “Izay mampionona ny mpandefitra”. (2 Kor. 7:6). Raisintsika ho tombontsoa ny mandray anjara amin’ny ‘fampiononana ny malahelo rehetra’. — Isaia 61:2.

Fomba Sasantsasany Hiadiana Amin’ny Faharerahana Ara-panahy

Famantarana ny Faharerahana

◻ Tsy fisian’ny fifehezan-tena eo amin’ny fihinanana sy ny fisotroana ary ny fikatsahana fahafinaretana

◻ Famoizana ny hafanam-po ho an’ny fahamarinana; toe-tsaina mampiseho fahafaham-po amin’ny tena

◻ Fanolokoloana fisalasalana lehibe sady maharitra

◻ Fanaovana tsirambina ny fifaneraserana any amin’ireo fivorian’ny kongregasiona

◻ Tsy fisian’ny zotom-po sy fifaliana eo amin’ny asa fanompoana

◻ Fahatongavana ho be fanakianana loatra an’ireo loholona sy ny fandaminana

Fanampiana mba Hiaretana

◻ Vavaka mba hahazoana ny fanampian’ny fanahy masina — Lioka 11:13; Gal. 5:22, 23; 1 Pet. 4:7

◻ Fianarana manokana — Sal. 1:1, 2

◻ Fisaintsainana zavatra araka ny Soratra Masina — Sal. 77:12

◻ Fanatrehana fivoriana sy fivoriambe tsy tapaka — Neh. 8:1-3, 8, 10; Heb. 10:23-25

◻ Fandraisana anjara tsy tapaka amin’ny asa fitoriana — Asa. 20:18-21

◻ Fanampiana ara-panahy avy amin’ireo loholon’ny kongregasiona, mpiandraikitra mpitety faritany — Rom. 1:11, 12; Heb. 13:17