Ny Fomba Ahitana Fifaliana Amin’ny Fanaovana Mpianatra
IRAY amin’ny fifaliana lalina mety ho tsapan’ny olona iray ny hoe maha-mpiara-miasa amin’Andriamanitra. Amin’izao andro izao, ny asan’Andriamanitra dia mahafaoka ny fanangonana ho ao anatin’ny kongregasiona kristiana ireo olona mirona hanao ny marina, sy ny fampiofanana azy ireo ho amin’ny fiainana amin’ny maha-Kristiana dieny izao, ary koa ho amin’ny fahatafitana velona mba hiditra ao amin’ny tontolo vaovao iray. — Mika 4:1-4; Matio 28:19, 20; 2 Petera 3:13.
Loharanom-pifaliana lehibe ho an’ny Vavolombelon’i Jehovah any Amerika Latina ny nahita olona iray tapitrisa tonga mpianatr’i Jesosy Kristy hatramin’ny 1980. Ao amin’io saha mahavokatra io, izay anajana sy inoan’ny olona maro ny Baiboly, dia nisy minisitra manontolo andro afaka nanampy olona am-polony maro hanokana ny fiainany ho an’i Jehovah. Angamba amin’ny fananana fanandraman-javatra be dia be toy izany izy ireo dia afaka milaza zavatra amintsika momba ny fifaliana amin’ny fanaovana mpianatra. Ny sasany amin’ireo fanoloran-keviny dia mety hanampy anao hahita fifaliana amin’ny fanaovana mpianatra any amin’izay misy anao.
Fahafantarana ireo mety ho “ondry”
“Izay tanàna na vohitra hiakaranareo, dia fantaro tsara izay mendrika ao”, hoy i Jesosy fony izy naniraka ny apostoliny hitory. (Matio 10:11). Rehefa mandeha mitsidika ny olona ianao, ahoana no ahafahanao mahafantatra ireo izay azo ampiana amin’ny lafiny ara-panahy? Hoy i Edward, minisitra manontolo andro efa nandritra ny 50 taona: “Izy ireo dia mampiseho izany amin’ireo fanontaniana lehibe apetrany sy amin’ny fahafaham-pony rehefa omena ny valiny avy ao amin’ny Soratra Masina.” Nanampy teny toy izao i Carol: “Raha misy olona mamboraka amiko zava-manahirana na fanahiana manokana, izany dia tena fitalahoana fanampiana. Miezaka aho hahita fanazavana mahasoa ao amin’ireo zavatra vita an-tsoratry ny Fikambanana Watch Tower. Ny fiahiana manokana toy izany matetika dia mitarika ho amin’ny fampianarana Baiboly.” Kanefa, tsy mora fantarina foana akory ireo olona tso-po. Mitantara toy izao i Luis: “Ny sasany izay toa tena liana dia hita tamin’ny farany fa tsy liana mihitsy, nefa ny hafa izay toa nanohitra kosa tamin’ny voalohany dia niova rehefa nandre izay tena lazain’ny Baiboly.” Koa satria manaja ny Baiboly ny Amerikana tatsimo maro, dia nanampy teny toy izao izy: “Fantatro ireo izay azo ampiana amin’ny lafiny ara-panahy rehefa manaiky tsy amim-pisalasalana izay ampianarin’ny Baiboly aorian’ny nampisehoako izany taminy.” Ny fanampiana olona “mendrika” toy izany mba handroso ara-panahy dia mitondra fifaliana sy fahafaham-po marina. Ahoana no ahafahanao manao izany?
Fanaovana izay hanombohana fampianarana Baiboly
Ny fampiasana ireo boky fianarana Baiboly navoakan’ny “mpanompo mahatoky sy malina” dia mazàna ny fomba tsara indrindra hanampiana ny olona hahazo ny hevitry ny fahamarinana ao amin’ny Baiboly. (Matio 24:45, NW ). Ahoana no ahafahanao mampitombo ny fankasitrahana ny hasarobidin’ny boky fianarana Baiboly toy izany? Hoy i Edward: “Koa satria samy hafa aoka izany ny toe-javatra sy ny toetra ary ny fomba fihevitry ny olona, dia miezaka aho mba hahay hampifanara-javatra rehefa manomboka fampianarana.” Tsy afaka mampiasa ny fomba fanaovan-javatra iray ihany amin’ny olon-drehetra ianao.
Amin’ny sasany, dia mety hilaina ny resadresaka tsotra maromaro momba ny Soratra Masina alohan’ny hampidirana boky fianarana Baiboly iray. Na dia izany aza, dia manao tatitra toy izao ny mpivady misionera iray: “Mazàna izahay dia manolotra fampianarana amin’ny fitsidihana voalohany.” Tahaka izany koa, hoy ny Vavolombelona iray izay nanampy olona 55 ho tonga hatramin’ny fanoloran-tena: “Ny fomba fanombohako fampianarana Baiboly voalohany indrindra dia ny mandinika avy hatrany ny fanazavana ao amin’ny boky Azonao Atao ny Hiaina Mandrakizay ao Amin’ny Paradisa eto An-tany.” Na dia tsy mahafinaritra ny sasany aza ny hoe mianatra na inona izany na inona, ny hafa kosa dia dodona hianatra izay rehetra inoany fa hanampy azy ireo eo amin’ny fiainana. Ny fanolorana fampianarana Baiboly maimaim-poana any an-tokantrano matetika dia hitan’izy ireo ho manintona. Manazava io fanolorana io ny misionera sasany, ary avy eo dia hoy izy ireo: “Ho tiako ny hampiseho anao ny fomba fanaovanay izany. Raha tianao dia afaka manohy ianao. Raha tsy izany, dia anao ny safidy.” Rehefa atolotra amin’izany fomba izany izy io, dia tsy matahotra ny hanaiky ny olona.
Hoy ny Vavolombelona hafa iray izay nanampy olona maro tsy nanana firy sy tsy nahita fianarana firy: “Hitako ho manampy indrindra ireo taratasy mivalona amin’ny fanombohana fampianarana Baiboly.” Na inona na inona zavatra vita an-tsoratra ampiasainy, ny mpampianatra manontolo andro dia miezaka manasongadina voalohany indrindra ny Baiboly. Hoy i Carola: “Amin’ny fianarana voalohany aho dia mampiasa ireo sary ary andinin-teny dimy eo ho eo monja mba hihariharin’ireo hevi-dehibe ary mba tsy hanasarotana ny Baiboly.”
Fihazonana ho velona hatrany ny fahalianana
Ny olona dia faly mahatsapa fa mandroso, koa manoro hevitra toy izao i Jennifer: “Ataovy izay hahavelombelona ny fianarana. Hazony ho mandroso ny fianarana.” Ny fitarihana tsy tapaka ilay fampianarana isan-kerinandro dia manampy ny mpianatra Baiboly koa hahatsapa fa manao fandrosoana ny tenany. Manazava toy izao ny mpisava lalana manokana iray, izay notezaina tany ambanivohitra momba ny maha-zava-dehibe ny fanazavana notsorina sy ny fifantohana amin’ireo hevi-dehibe, mba hahafahan’ireo izay, na dia tsy nahita fianarana firy aza, handroso. Hoy izy: “Tany amin’ny vohitra nisy anay, dia tsy maintsy lemana kely amin’ny rano ny tany aorian’ny famafazam-boa. Raha saforana rano be ny saha dia hahaforona sosona henjana ny tany, izay tsy hahafahan’ireo voa nitsimoka hiditra, ka dia ho faty izy ireo. Tahaka izany koa, raha saforana hevitra maro be ireo olona vao liana, dia mety ho toa sarotra loatra izany, ka hijanona izy ireo.” Na dia ny olona manana saina tia karokaroka aza dia tsy maintsy mianatra mifantoka amin’ny foto-kevitra iray isaky ny mandeha, raha ta handroso amin’ny fahazoana hevi-javatra izy. Hoy i Jesosy tamin’ny apostoliny: “Mbola manana zavatra maro holazaina aminareo Aho, nefa tsy zakanareo ankehitriny.” — Jaona 16:12.
Ny fomba hafa iray hihazonana ho velona ny fahalianana dia ny mampirisika ireo izay tsidihinao hanohy hieritreritra momba ny Tenin’Andriamanitra rehefa lasa ianao. Manoro hevitra toy izao i Yolanda: “Avelao hisy fanontaniana iray hihantona. Omeo enti-mody hataony izy ireo, toy ny famakiana tapany amin’ny Baiboly na famotopotorana foto-kevitra iray mahakasika azy.”
Fampitomboana fitiavana an’i Jehovah
Hitombo ny fifalianao rehefa manampy ireo mpianatrao ho tonga ‘mpankatò ny teny fa tsy mpihaino fotsiny’ ianao. (Jakoba 1:22). Ahoana no ahafahanao manao izany? Ny Kristiana marina dia atosiky ny fitiavana an’i Jehovah. Manazava toy izao i Pedro izay avy any Meksika: “Tsy afaka ho tia olona iray tsy fantany ny olona, koa hatrany am-piantombohan’ilay fianarana mihitsy dia ampianariko azy ireo avy ao amin’ny Baiboly ny anaran’Andriamanitra, ary mitady ireo fahafahana hanasongadinana ireo toetran’i Jehovah aho.” Rehefa miresaka, dia afaka mampitombo ny fankasitrahana an’i Jehovah ianao, amin’ny fanehoanao ny fihetseham-ponao ny aminy. Hoy i Elizabeth: “Miezaka foana aho hilaza ny hatsaram-pon’i Jehovah. Mandritra ny fampianarana ataoko, raha mahita voninkazo tsara tarehy iray aho, na voronkely mahafatifaty, na zana-tsaka mifalihavanja, dia milaza foana aho fa asa tanan’i Jehovah izany.” Manolo-kevitra toy izao i Jennifer: “Resaho ho toy ny zavatra tena izy ny tontolo vaovao ampanantenain’Andriamanitra, araka ny fantatrao ho maha-izany azy io tokoa”. “Anontanio izay mba ho tian’izy ireo hatao ao amin’ny tontolo vaovao.”
Rehefa misaintsaina amim-pankasitrahana ny amin’izay ianarany momba an’i Jehovah ny olona iray, dia milentika ao am-pony izany ka manosika azy hanao zavatra. Tsy afaka misaintsaina anefa izy raha tsy mitadidy. Ny famerenana fohy hevi-dehibe telo na efatra isaky ny avy manao fianarana dia fanampiana ny fitadidiana. Mpampianatra Baiboly maro no mangataka amin’ireo vaovao mba hanoratra ireo andinin-teny fototra miaraka amin’ny fanamarihana kely eo amin’ny faran’ny Baiboliny. Manazava ny soa hafa iray azo avy amin’ny famerenana ny misionera iray avy any Angletera: “Manontany azy ireo aho ny amin’ny fomba nandraisany soa tamin’ny fanazavana. Mahatonga azy ireo hisaintsaina amim-pankasitrahana ny amin’ireo lalana sy ireo lalàn’i Jehovah izany.”
Hoy ny Vavolombelona mahatoky iray, izay nahazo diplaoma avy tamin’ny kilasy fahatelon’i Gileada: “Tsy maintsy maneho hafanam-po isika. Ireo mpianatsika dia tsy maintsy mahatakatra fa mino izay ampianarintsika isika.” Ny finoana izay nahatonga anao ho “mpanao ny asa” sambatra dia mety mifindra raha mampiseho azy io ianao. — Jakoba 1:25.
“Hitako fa mahatsiaro tena ho akaiky kokoa an’Andriamanitra ny olona rehefa manampy azy aho hahafantatra ireo valim-bavaka ataony”, hoy ny Vavolombelona iray izay nanampy olona maro hanolotra fanompoam-pivavahana amin’i Jehovah. “Omeko ohatra avy amin’ny fanandraman-javatra hitan’ny tenako izy ireo, toy itỳ iray itỳ: Rehefa tonga tany amin’ny toerana vaovao nanendrena tamin’ny naha-mpisava lalana izaho sy ilay niara-niasa tamiko, dia tsy nanana afa-tsy legioma vitsivitsy monja, fonosana margarine iray izahay, sady tsy nanam-bola. Laninay tamin’ny sakafo hariva ny hanina ary hoy izahay hoe ‘Tsy manana na inona na inona ho an’ny rahampitso isika izao.’ Nivavaka momba izany izahay ary nandeha natory. Vao maraina be ny ampitson’io, dia tonga nitsidika anay sady nampahafantatra ny tenany ny Vavolombelona iray teo an-toerana, nanao hoe: ‘Nivavaka aho mba hanirahan’i Jehovah mpisava lalana. Afaka miaraka aminareo anio tontolo andro aho izao, nefa satria aho mipetraka any ambanivohitra, dia ho voatery hiara-misakafo antoandro aminareo, koa nitondra itỳ sakafo itỳ aho mba ho antsika rehetra.’ Henan’omby sy legioma be dia be izany. Milaza foana amin’ireo mpianatro aho fa tsy mandao antsika na oviana na oviana i Jehovah raha mikatsaka voalohany indrindra ny Fanjakany isika.” — Matio 6:33, NW.
Manolora fanampiana azo ampiharina
Misy zavatra bebe kokoa voafaoka amin’ny fanaovana mpianatra ho an’i Kristy noho ny fitarihana fampianarana Baiboly fotsiny. Hoy ny misionera iray izay nanompo nandritra ny taona maro tamin’ny naha-mpiandraikitra mpitety faritany: “Omeo fotoana izy ireo. Aza maika ny handeha rehefa vita ilay fampianarana. Raha mety, dia mijanòna ka miresadresaha fotoana kelikely.” Hoy i Elizabeth: “Maneho fiahiana azy ireo aho satria aina no voakasika. Imbetsaka aho no manahy ny aminy toy ny hoe zanako izy ireo.” Nanao izao fanoloran-kevitra izao ny Vavolombelona hafa: “Tsidiho izy ireny rehefa marary.” “Rehefa mandalo eo akaikin’ny trano fonenany ianao, ohatra amin’ny fanompoana eny amin’ny saha, dia manaova fitsidihana fohy azy ireny mba hampifankahalala Vavolombelona hafa aminy.” Hoy i Eva: “Mihainoa amim-pitandremana mba hahatakarana ny fanabeazana azony sy ny fiaviany ary ny tarehin-javatra misy azy eo amin’ny fiainana. Ireny dia misy fiantraikany eo amin’ny fomba fihetsiky ny olona eo anoloan’ny fahamarinana ary mety hanakantsakana ny fandrosoany. Aoka ianao ho tonga sakaizany, mba hananany fatokiana hiresaka momba ny zava-manahirana azy.” Nanampy teny toy izao i Carol: “Zava-dehibe ny fiahiana marina ilay olona satria ireo fiovana hoentin’ny fahamarinana eo amin’ny fiainany indraindray dia midika ho famoizana fianakaviana sy sakaiza. Amin’ny ankapobeny, dia tsara raha mahalala ilay mpianatra hoe aiza isika no mipetraka, ary tsara ny hananany fatokiana hanatona antsika na amin’ny fotoana inona na amin’ny fotoana inona.” Ampio izy hihevitra ny kongregasiona ho toy ny fianakaviany vaovao. — Matio 10:35; Marka 10:29, 30.
“Aoka ianao ho mailaka hanolotra fanampiana azo ampiharina. Miaraha mipetraka aminy any am-pivoriana, ary ampio izy amin’ireo zanany”, hoy i Yolanda. Ny fampisehoana amin’ireo vaovao ny fomba hampiofanana ny zanany, hanatsarana ireo fari-pitsipi-pahadiovana arahiny, hanomanana valin-teny amin’ireo fivoriana, sy hanaovana anjara amin’ny Sekolin’ny Fanompoana Teokratika, dia anisan’ny asa fanaovana mpianatra avokoa. Nanampy teny toy izao ny anabavy hafa iray: “Zava-dehibe ny hampiofanana ireo vaovao ho amin’ny fanompoana. Rehefa atao tsirambina io lafiny amin’ny fampiofanana io, dia matahotra ny asa fitoriana hatrany ny sasany sy mamoy ny fifaliany amin’ny fanompoana an’i Jehovah, ary tsy mahavita miaritra.” Koa manomeza fampiofanana amim-pitandremana amin’ny asa isan-trano sy amin’ny fanaovana fiverenana mitsidika, ary amin’ny fanombohana fampianarana Baiboly. Ho lehibe ny fifalianao rehefa mahita ny mpianatrao mandroso noho ny fanampianao sy ny tari-dalana nomenao ianao.
Hatanjaho izy ireo mba hiaritra
“Misy fironana hanao tsirambina ny fianarana raha vantany vao vita batisa ilay mpianatra”, hoy ny fampitandreman’ny olona za-draharaha iray amin’ny fanaovana mpianatra. Ilay mpampianatra sy ilay mpianatra dia samy tsy maintsy mitadidy fa tsy efa matotra ara-panahy akory ny Kristiana vao vita batisa iray. Be dia be ny tokony hataony mba hitomboana amin’ny finoana sy amin’ny fankasitrahana ny lalàn’Andriamanitra ary amin’ny fitiavana an’i Jehovah. Zava-dehibe ny hampirisihana azy hamboly fahazarana tsara eo amin’ny fianarana manokana mba hanohizany hanao fandrosoana. — 1 Timoty 4:15.
Ilay vaovao dia mety hila fanampiana mba handrosoana sy mba hahatongavana ho mpikambana mahay mandray ny fitambaran’ireo rahalahy. Mety hila tari-dalana izy amin’ny fizakana ireo tsy fahalavorarian’ireo rahalahy, arakaraka ny hanatonany akaiky kokoa azy ireny. (Matio 18:15-35). Mety hila fanampiana izy mba ho tonga mpampianatra mahay, afaka manao fikarohana ho an’ny tenany. Mitantara toy izao ny misionera iray: “Naniry hanatsara ny fahaizany amin’ny maha-mpampianatra ny mpianatra iray rehefa vita batisa, koa hoy izy tamiko: ‘Tsy maintsy mitarika fampianarana vaovao iray aho amin’ny herinandro ambony, nefa mila ny mahatsiaro ireo toko voalohandohany izay nianarako aho. Afaka miara-mamerina amiko ireo toko ireo indray ve ianao, iray isaky ny mandeha, mba hahafahako handray an-tsoratra ny fanazavana ireo andinin-teny sy ireo fanoharana, ary mba hahafahako hampiasa azy ireny avy eo, rehefa hitarika ny fampianarako aho?’ Tonga mpampianatra tsara dia tsara izy, nanana efatra tamin’ireo mpianany natao batisa tamin’ny fivoriambe iray.”
Ny antony mampisy vidiny ny ezaka atao amin’ny fanaovana mpianatra
“Ny fanaovana mpianatra dia midika ho mpidera an’i Jehovah maro kokoa. Midika ho fiainana ho an’ireo izay manaiky ny fahamarinana izy io”, hoy i Pamela. “Tena tiako ny mampianatra ny fahamarinana amin’ny hafa — mahafinaritra aoka izany izy io! Mahita ireo mpianatra mitombo tsikelikely, manao fiovana eo amin’ny fiainany sy mandresy ireo vato misakana izay toa tsy azo ihoarana raha tsy noho ny fanahin’i Jehovah ny tena. Maro amin’ireo izay nanjary tia an’i Jehovah no tonga sakaiza tsy foiko tokoa.”
“Rehefa misaintsaina ireo izay nampiako ho tonga mpianatra aho”, hoy ny tantarain’ny misionera iray avy any Alemaina, “dia mahita olona tena saro-kenatra izay manao fandrosoana betsaka aoka izany amin’ny maha-minisitr’Andriamanitra, ka toa tsy mampino. Mahita aho, olona izay nandresy vato misakana tena lehibe, miharihary fa noho ny fanampian’i Jehovah. Mahita aho, fianakaviana izay tafasaraka teo aloha, nefa ankehitriny dia tafaray — ankizy sambatra miaraka amin’ny ray aman-dreny mandray andraikitra. Mahita aho, olona manana fiainana misy heviny, midera an’i Jehovah. Izany no fifaliana azo amin’ny fanaovana mpianatra.”
Eny, loharanom-pifaliana tsy manam-paharoa ny hoe maha-mpiara-miasa amin’i Jehovah Andriamanitra amin’ny asa fanaovana mpianatra. Manaporofo izany ny fanandraman-javatra hitan’ireo misionera sy mpisava lalana. Afaka mahita fifaliana sy fahafaham-po mitovy amin’izany ianao raha mampihatra ireo fanoloran-kevitra, ka miezaka mafy amin’izany amin’ny fanahinao rehetra. Ho feno ny fifalianao noho ny fitahian’i Jehovah. — Ohabolana 10:22; 1 Korintiana 15:58.