Fampiononana sy Fampaherezana — Vatosoa Misy Lafiny Maro

NY ANKAMAROANTSIKA dia efa nandalo fotoana nahatsiarovantsika tena ho faran’izay nahantra — tsy voatery hoe nahantra ara-bola fa nahantra ara-tsaina. Kivy tanteraka na ketraka mafy mihitsy aza isika. Kanefa amin’ny fotoana toy izany isika dia tena mety hanana fahafahana hampiasa zavatra sarobidy izay afaka mitondra soa lehibe dia lehibe ho antsika. Izany “vatosoa” izany dia ny fampaherezana.

Ao amin’ny Baiboly, dia teny grika iray ihany no ampiasaina amin’ny hoe “mampahery” sy “mampionona”. Ireo teny roa ireo dia samy mitondra ilay hevitra hoe manome herim-po, tanjaka, na fanantenana. Mazava àry, fa rehefa mahatsiaro tena ho osa na kivy isika, dia ny fampiononana sy ny fampaherezana no ilaintsika indrindra. Aiza no mety hahitana azy ireo?

Manome toky antsika ny Baiboly fa i Jehovah dia “Andriamanitry ny fampiononana rehetra”. (2 Korintiana 1:3). Milaza amintsika koa izy io fa “tsy mba lavitra antsika rehetra Izy”. (Asan’ny Apostoly 17:27). Koa misy azo raisina àry ny fampiononana sy ny fampaherezana. Aoka isika handinika faritra ankapobe efatra izay amin’ny alalany no anomezan’i Jehovah fampaherezana.

Amin’ny alalan’ny fifandraisana manokana aminy

Ny loharanom-pampiononana lehibe indrindra dia ny fifandraisana manokana amin’i Jehovah Andriamanitra. Na dia ny fetezan’ny fifandraisana toy izany hisy fotsiny aza dia efa mampahery. Raha dinihina tokoa, mpanapaka iza eo amin’izao tontolo izao no hanaiky ny antso an-telefaonina ataontsika na haneho fahalianana manokana amin’ireo zava-manahirana antsika? Faran’izay mahery lavitra noho ireny lehilahy ireny i Jehovah. Kanefa dia manetry tena izy — bebe kokoa noho ny hoe vonona ny hifampiraharaha amin’olombelona ambany sy tsy lavorary. (Salamo 18:35). Nanao ny dingana voalohany mihitsy aza i Jehovah tamin’ny fanehoana fitiavana tamintsika. Hoy ny 1 Jaona 4:10: “Izao no fitiavana: tsy ny nitiavantsika an’Andriamanitra, fa ny nitiavany antsika, ka nirahiny ny Zanany ho avotra noho ny fahotantsika.” Ankoatra izany, dia mitaona antsika amim-pitiavana ho amin’ny Zanany i Jehovah. — Jaona 6:44.

Moa ve ianao nanaiky ny fisakaizana amin’Andriamanitra ka nitady fampiononana avy amin’izany? (Ampitahao amin’ny Jakoba 2:23.) Raha manana sakaiza tiana sy akaiky anao ianao, ohatra, moa ve tsy fahafinaretana ny mandany fotoana sasany miaraka aminy irery, miresaka aminy malalaka ny amin’ireo tebitebinao sy ireo fanahianao, ny amin’ny fanantenanao sy ny fifalianao? Manasa anao hanao toy izany aminy, i Jehovah. Tsy mametra ny halavan’ny fotoana ahafahanao miresaka aminy amin’ny vavaka izy — ary tena mihaino izy. (Salamo 65:2; 1 Tesaloniana 5:17). Nivavaka tsy tapaka sy tamin-kafanam-po i Jesosy. Raha ny marina, talohan’ny nifidianany ireo apostoliny 12, dia nandany ny alina manontolo tamin’ny vavaka izy. — Lioka 6:12-16; Hebreo 5:7.

Indraindray dia mety hahavita ny hitoetra ho irery miaraka amin’i Jehovah ny tsirairay amintsika. Ny fipetrahana milamina tsara fotsiny eo am-baravarankely na ny fanaovana dia miadana dia afaka manome fahafahana tsara hanokatra ny fontsika amin’i Jehovah ao amin’ny vavaka. Ny fanaovana toy izany dia mety ho loharanom-panamaivanana sy fampiononana lehibe dia lehibe. Raha misy lafiny amin’ny zavatra noforonin’i Jehovah azontsika jerena mandritra ny fisaintsainantsika — na dia sombin-danitra fotsiny aza, na hazo na vorona sasany — dia mety ho hitantsika ao amin’izy ireny ny fampahatsiarovana mampionona sasany momba ny fitiavan’i Jehovah sy ny fiahiany antsika. — Romana 1:20.

Amin’ny alalan’ny fianarana manokana ny Tenin’Andriamanitra

Amin’ny alalan’ny fianarana manokana ny Baiboly anefa no tena ihariharian’ireo toetran’i Jehovah amintsika. Imbetsaka ny Baiboly no mampiharihary an’i Jehovah ho “Andriamanitra mamindra fo sy miantra, mahari-po sy be [hatsaram-panahy miharo fitiavana, NW ]”. (Eksodosy 34:6; Nehemia 9:17; Salamo 86:15). Tapany raikitra amin’ny toetra maha-izy an’i Jehovah ny faniriana hampionona ny mpanompony eto an-tany.

Diniho, ohatra, ny tenin’i Jehovah ao amin’ny Isaia 66:13: “Tahaka ny olona ampiononin-dreniny no hampiononako anareo”. I Jehovah dia nanao ny fitiavan-dreny ny zanany ho feno fahafoizan-tena sy tsy mivadika. Raha mba efa nahita reny be fitiavana iray nampionona ny zanany naratra ianao, dia fantatrao ny tian’i Jehovah holazaina rehefa milaza izy fa hampionona ny olony.

Fitantarana maro ao amin’ny Baiboly no mampiseho ny fampiononana toy izany eo am-perinasa. Rehefa nahazo fandrahonana ho faty avy tamin’i Jezebela, mpanjakavavy ratsy fanahy, i Elia mpaminany, dia very ny herim-pony ka nandositra noho ny ainy izy. Kivy tanteraka tokoa izy ka nandeha nankany an’efitra nandritra ny indray andro naninjitra, miharihary fa tsy nitondra rano na vatsy niaraka taminy. Tao anatin’ny tebiteby mafy no nilazan’i Elia tamin’i Jehovah fa naniry ny ho faty izy. (1 Mpanjaka 19:1-4). Inona no nataon’i Jehovah mba hampiononana sy hampaherezana ilay mpaminaniny?

Tsy niteny mafy an’i Elia noho izy nahatsiaro tena ho irery, ho tsy nisy vidiny sy natahotra, i Jehovah. Nifanohitra tamin’izany fa nandre “feo nitsoka malemy” ilay mpaminany. (1 Mpanjaka 19:12). Raha mamaky ny 1 Mpanjaka toko faha-19 ianao, dia ho voamarikao ny fomba nampiononan’i Jehovah an’i Elia, nampitoneny azy ary nanorenany ny finoany. Tsy ivelany fotsiny io fampiononana io. Tonga hatrany amin’ny fon’i Elia nikorontana ilay izy, ka nampahery ilay mpaminany mba hanohy ny asany. (Ampitahao amin’ny Isaia 40:1, 2.) Tsy ela izy dia niverina tamin’ny asany indray.

I Jesosy Kristy dia mampionona sy mampahery toy izany koa ireo mpanara-dia azy tsy mivadika. Raha ny marina, i Isaia dia naminany toy izao momba ny Mesia: “Jehovah Tompo no (...) naniraka Ahy hahasitrana ny torotoro fo (...) hampionona ny malahelo rehetra”. (Isaia 61:1-3). Nandritra ny androm-piainany, dia nasehon’i Jesosy mazava tsara fa nihatra taminy ireo teny ireo. (Lioka 4:17-21). Raha mahatsiaro tena ho mila fampiononana ianao, dia saintsaino ny amin’ireo fifampiraharahana feno fahalemem-panahy sy fitiavana nananan’i Jesosy tamin’ny olona izay nijaly sy sahirana. Tsy azo lavina fa ny fianarana amim-pitandremana ny Baiboly dia loharanom-pampiononana sy fampaherezana lehibe.

Amin’ny alalan’ny kongregasiona

Manjelajelatra amin’ireo lafiny maro ny vatosoan’ny fampiononana sy ny fampaherezana ao amin’ny kongregasiona kristiana. Nahazo tsindrimandry mba hanoratra toy izao ny apostoly Paoly: “Mifananara sy mifampahatanjaha”. (1 Tesaloniana 5:11). Ahoana no mety hahitana fampiononana sy fampaherezana any amin’ireo fivorian’ny kongregasiona?

Voalohany indrindra, dia mazava ho azy fa manatrika ireo fivoriana kristiana isika mba “hampianarin’i Jehovah”, mba handray fampianarana momba azy sy ireo lalany. (Jaona 6:45, NW ). Ny fampianarana toy izany dia natao mba hampahery sy hampionona. Izao no vakintsika ao amin’ny Asan’ny Apostoly 15:32: “Joda sy Silasy, dia namporisika ny rahalahy tamin’ny teny maro (...) ka nampahery azy.”

Efa mba nitranga taminao ve ny hoe nankany amin’ireo fivoriana kristiana fony ianao kivy tanteraka, ary niverina tany an-trano nahatsiaro tena ho metimety kokoa? Angamba nisy zavatra nolazaina tao amin’ny lahateny iray, na tao amin’ny valin-teny iray, na tao amin’ny vavaka iray, izay nanohina ny fonao sy nanome fampiononana sy fampaherezana nilaina. Koa aza mitoetra lavitra ireo fivoriana kristiana. — Hebreo 10:24, 25.

Mety hisy vokany mitovy amin’izany ny fifaneraserana amin’ireo rahalahintsika sy anabavintsika eo amin’ny fanompoana sy amin’ny toe-javatra hafa. Amin’ny fiteny hebreo, dia matoanteny maromaro midika hoe “mamatotra miaraka” no nanjary nanondro koa ny hoe “tanjaka” na “manatanjaka” — toa manome ilay hevitra hoe, manjary matanjaka kokoa ny zavatra rehefa afatotra miaraka. Marina io fotopoto-pitsipika io ao amin’ny kongregasiona. Ampiononina sy ampaherezina, eny, hatanjahina isika noho ny fifaneraserantsika miaraka. Ary voafatotra miaraka isika noho ny fitiavana, dia ny fatorana matanjaka indrindra. — Kolosiana 3:14, NW.

Indraindray dia ny fahatokian’ireo rahalahintsika na anabavintsika ara-panahy no mampahery antsika. (1 Tesaloniana 3:7, 8). Indraindray izany dia ny fitiavana izay asehon’izy ireo. (Filemona 7). Ary indraindray ilay izy dia ny fiarahana miasa fotsiny, ny iray eo anilan’ny iray, eo am-piresahana ny amin’ny Fanjakan’Andriamanitra amin’ny hafa. Raha mahatsiaro tena ho osa sy mila fampaherezana ianao mahakasika ny fanompoana, nahoana raha manao fandaharana mba hiasana miaraka amin’ny mpitory ilay Fanjakana be taona kokoa na ampy fanandraman-javatra kokoa? Azo inoana fa hahita fampiononana betsaka ianao amin’ny fanaovana toy izany. — Mpitoriteny 4:9-12; Filipiana 1:27.

Amin’ny alalan’ny “mpanompo mahatoky sy malina”

Iza no mandamina ireo lafiny mampionona amin’ny fanompoam-pivavahantsika? I Jesosy dia nanendry kilasy iray izay notondroiny hoe “mpanompo mahatoky sy malina” mba hanome ‘sakafo ara-panahy amin’ny fotoana mety’. (Matio 24:45, NW ). Efa niasa sahady io fitambarana Kristiana voahosotry ny fanahy io tamin’ny taonjato voalohany am.f.i. Ilay fitambara-mpitantana nisy loholona tany Jerosalema dia nandefa taratasy nisy toromarika sy tari-dalana nankany amin’ireo kongregasiona. Inona no vokany? Asehon’ireo firaketana an-tsoratry ny Baiboly ny fihetsik’ireo kongregasiona teo anatrehan’ny taratasy toy izany: “Nony efa namaky izany ny olona, dia nifaly noho ny anatra tsara [“fampaherezana”, NW ].” — Asan’ny Apostoly 15:23-31.

Toy izany koa fa, amin’izao andro farany sarotra izao, ny mpanompo mahatoky sy malina dia manome sakafo ara-panahy izay mitondra fampiononana sy fampaherezana lehibe ho an’ny vahoakan’i Jehovah. Mandray anjara amin’izany sakafo izany ve ianao? Azo raisina mora foana izy io ao anatin’ireo zavatra vita pirinty izay ataon’ilay kilasin’ny mpanompo ho azo raisina manerana izao tontolo izao. Nitondra fampiononana ho an’ny mpamaky tsy tambo isaina ny gazety Ny Tilikambo Fiambenana sy Mifohaza! ary koa ireo boky sy bokikely ary taratasy mivalona avoakan’ny Fikambanana Watch Tower.

Nanoratra toy izao ny mpiandraikitra mpitety faritany iray: “Maniry hanao izay mety ny ankamaroan’ireo rahalahintsika sy anabavintsika, saingy matetika izy ireo no miady mafy amin’ny fahakiviana sy ny tahotra ary ilay fahatsapana ho tsy manan-kery hanampiana ny tenany. Ireo lahatsoratra ao amin’ireo gazetintsika dia manampy olona maro mba hahazo indray ny fifehezana ny fiainany sy ny fihetseham-pony. Ireo lahatsoratra koa dia manome zavatra atolotra bebe kokoa ho an’ireo loholona, fa tsy fampaherezana ivelany fotsiny.”

Ampiasao amin’ny fomba feno ireo zavatra vita an-tsoratra avy amin’ilay kilasin’ny mpanompo mahatoky. Afaka manampy antsika hahita fampiononana amin’ny fotoan-tsarotra ireo gazety sy boky ary zavatra vita an-tsoratra tonga amin’ny fotoana ilana azy. Etsy an-danin’izany, raha eo amin’ny toerana ahafahanao manome fampaherezana olona iray ketraka ianao, dia ampiasao ilay fanazavana araka ny Soratra Masina ao anatin’ireny gazety ireny. Ireo lahatsoratra dia nosoratana tamim-pitandremana fatratra, matetika taorian’ny herinandro na volana maro nanaovana fikarohana sy fianarana ary vavaka tamim-pahazotoana fatratra. Ilay torohevitra dia miorina amin’ny Baiboly sy efa nandramana ary marina. Nisy nahita fa tena mahasoa ny mamerina mamaky lahatsoratra mifanentana iray na roa amin’olona iray izay mahatsiaro tena ho kivy. Izany dia mety hitondra fampiononana sy fampaherezana betsaka.

Raha mahita vatosoa sarobidy ianao, hitana izany ho an’ny tenanao irery ve ianao, sa hizara amim-pahalalahan-tanana ny sasany amin’ilay harena amin’ny hafa? Ataovy ho tanjona ny ho loharanom-pampiononana sy fampaherezana ho an’ireo rahalahinao sy anabavinao ao amin’ny kongregasiona. Raha mampahery ianao fa tsy manaratsy, midera fa tsy manakiana, miteny amin’ny “lelan’ny efa nampianarina” fa tsy amin’ny ‘teny tsy tsaroana toy ny fanindron’ny sabatra’, dia mety ho zava-dehibe eo amin’ny fiainan’ny hafa ianao. (Isaia 50:4, fanamarihana ambany pejy; Ohabolana 12:18). Azo inoana tokoa fa ianao mihitsy no hoheverina ho vatosoa — loharanon’ny fampiononana sy fampaherezana marina!

[Efajoro, pejy 20]

Fampiononana ho An’ireo Sahirana

MARO no nanazava ny fomba nahatonga ny fifandraisan’izy ireo manokana tamin’i Jehovah ho lalina kokoa noho ny lahatsoratra sasany tao amin’ny Ny Tilikambo Fiambenana sy Mifohaza! Hoy ny iray: “Rehefa avy namaky itỳ lahatsoratra itỳ aho, dia nahatsapa fa i Jehovah tao amin’ny heriny sy ny fahamboniany rehetra no niaraka tamiko teo. Tsapako fa persona tena misy izy.” Milaza toy izao ny taratasy hafa iray: “Niova tamin’ny fomba nanaitra aoka izany ny fonay sy ny sainay raha ny amin’ny fiheveranay an’i Jehovah, hany ka tsy mitovy amin’ny teo aloha intsony izahay. Izany dia toy ny hoe nisy olona namafa ny solomasonay ho madio, ary izao izahay dia afaka mahita ny zavatra rehetra mazava tsara.”

Ny sasany dia manoratra mba hilazana ny fomba nanampian’ireo gazety azy ireo mba handamina olana na zava-tsarotra voafaritra tsara, ka izany dia nanome toky azy ireo ny amin’ny fiahian’i Jehovah manokana azy ireo. Nilaza izany toy izao ny mpamaky iray: “Misaotra betsaka noho ny famelana anay hahita indray ny fikarakarana sy ny fitiavana lehibe aoka izany asehon’i Jehovah ny vahoakany.” Ny vehivavy iray tany Japon izay namoy ny zanany tao amin’ny fahafatesana dia niteny toy izao momba ny lahatsoratra tao amin’ny Mifohaza! mahakasika io foto-kevitra io: “Niraraka avy tao amin’ireo pejy ny halalin’ny famindram-pon’Andriamanitra, ary dia nitomany aho, nitomany, nitomany. Ireny lahatsoratra ireny dia napetrako teo amin’ny toerana izay ahafahako mamaky azy avy hatrany na oviana na oviana aho mahatsiaro tena ho fadiranovana sy manirery.” Nanoratra toy izao ny vehivavy hafa iray nidonam-pahoriana: “Ireo lahatsoratra tao amin’ny Ny Tilikambo Fiambenana sy Mifohaza! ary ilay bokikely hoe “Rehefa Nody Mandry ny Olona Iray Tianao” dia nanome ahy ny tanjaka nilaiko mba hiaretana ny fotoam-palahelovako.”

Ny Soratra Masina no loharanom-pampiononana voalohany indrindra. (Romana 15:4). Mifikitra amin’ny Baiboly ho toy ny fahefana raisiny Ny Tilikambo Fiambenana, ary manao toy izany koa ilay gazety namany hoe Mifohaza! Noho izany, dia voaporofo fa fampiononana sy fampaherezana ho an’ireo mpamaky azy ireny gazety ireny.

[Sary, pejy 23]

Ilay Andriamanitry ny fampiononana rehetra no ilay Mpihaino vavaka ihany koa