faritany io, tamin’ny fatokiana fa hanao izay hitomboan’izany i Jehovah. — 1 Korintiana 3:6.

Fanantenana fitomboana mamirapiratra

Noho ireo fiaro voly vita plastika na fitaratra, nohafanain’ny angôvo avy amin’ny hafanan’ny tany sy ny fanazavana voatr’olombelona, dia afaka namboly karazany be dia be tamin’ny voankazo sy anambazaha ary zavamaniry hafa ireo mpamboly islanday. Toy izany koa, ireo Vavolombelona ampy fitaovana amin’ny fahamarinana ara-panahy sy ny hafanan’ny fahaizana mampiaiky amim-pahamendrehana ary ny fitahiana avy amin’ny fanahy masin’i Jehovah, dia nahita vokatra mahatalanjona teo amin’ny saha islanday.

Tamin’itỳ taona itỳ dia olona 542 no nanatrika ny Fahatsiarovana ny nahafatesan’i Kristy, ary fampianarana Baiboly any an-tokantrano efa ho 200 izao no tarihina. Ankoatra izany, ny famaliana amim-panekena ny fampirisihana hanompo any amin’ireo faritany mbola tsy nanendrena olona dia manome toky anay fa handre ny feon’ilay Mpiandry Tsara, i Jesosy Kristy, avokoa ireo olona tahaka ny ondry any amin’io nosy midadasika io. (Jaona 10:14-16). Endre izany fiafaran-javatra mahafaly ho an’ireo mpitory ilay Fanjakana mahatoky ireo, izay naneho faharetana sy fiaretana be dia be teo amin’ny fitoriana ny vaovao tsara tany amin’ilay tanin’ny ranomandry sy afo, nandritra ireo 64 taona lasa!

Mahareta ao Amin’ny Asan’ny Mpisava Lalana

VAVOLOMBELON’I Jehovah 4 500 000 eo ho eo no mitory ny vaovao tsara maneran-tany. Misy mpisava lalana, na mpitory ilay Fanjakana manontolo andro maherin’ny 600 000 eo anivon’izy ireo. Ireo anisan’io tafika lehibe voaforon’ny mpisava lalana io dia manomboka amin’ireo mbola tsy mahatratra ny taona maha-zatovo ka hatramin’ireo efa misotro ronono eo amin’ny faha-90 taonany. Avy amin’ny fiaviana sy ny fari-piainana rehetra izy ireo.

Tsy misy isalasalana fa maniry ny hahomby eo amin’ny fanompoan’ny mpisava lalana avokoa ireo mpitory manontolo andro ireo. Maro be no maniry hanao izany ho ny asa fidiny hatao eo amin’ny fiainana. Misy tsy afaka manao izany noho ny antony sasany. Kanefa ny hafa kosa afaka nanohy nanao ny asan’ny mpisava lalana na dia teo aza ny fahasahiranana ara-bola, ny tsy fahasalamana, ny fahakiviana, sy ny zava-manahirana hafa. Koa ahoana no ahafahan’ireo mpitory manontolo andro miatrika amim-pahombiazana zava-manahirana toy izany sady mbola maharitra ao amin’ny asan’ny mpisava lalana ihany?

Fahitana izay ilaina ara-bola

Amin’ny ankapobeny, dia manao asa ivelan’ny fivavahana ireo mpisava lalana mba hisahanana ny fandaniany, toy ny nataon’ny apostoly Paoly. (1 Tesaloniana 2:9). Any amin’ny ankamaroan’ny faritra amin’ny tany, dia miatrika fidangan’ny vidin-tsakafo, fitafiana, fialofana, sy fitaterana izy ireo. Matetika no sarotra ny mahita ny asa tapa-potoana ilain’izy ireo. Raha misy aza ny asa toy izany dia matetika no tsy manome afa-tsy ny karama farany ambany, tsy misy fiantohana ara-pahasalamana akory.

Raha ‘tsy mitsahatra mikatsaka voalohany indrindra ny Fanjakan’Andriamanitra sy ny fahamarinany’ isika, dia afaka manana finoana fa hanome izay ilaintsika ara-nofo i Jehovah. Noho izany, rehefa eo ambany fanerena ara-bola ireo mpisava lalana dia tsy voatery ‘hanahy ny amin’ny ampitso’. (Matio 6:25-34, NW ). Raha mbola eo am-panaovana ezaka amim-pahatsorana mba handaminana zava-manahirana toy izany izy ireo, dia hiaro azy ireo amin’ny fanahiana tsy ilaina ny fananana finoana matanjaka an’i Jehovah.

Rehefa miatrika fahasahiranana ara-bola ny olona iray dia angamba azo ahena ny fandaniana. Amin’ny fanovana ny teti-bola, dia mety ho azo atao ny hahita izay ilaina, fa tsy izay zavatra ara-nofo irina ho azo akory. Mba hampihenana ny fandaniana, dia miara-manofa trano amina Kristiana hafa ny mpisava lalana sasany. Mba hanampiana ireo zanany hanao ny asan’ny mpisava lalana, indraindray ny ray aman-dreny dia manome trano maimaim-poana na amin’ny hofany faran’izay mora. Ny hafa manampy ireo mpisava lalana eo amin’ny sakafo sy ny saran’ny fitaterana. Tsy ho tian’ireo mpisava lalana anefa ny ho enta-mavesatra ho an’ny hafa, satria manana andraikitra araka ny Soratra Masina hamelon-tena izy ireo. — 2 Tesaloniana 3:10-12.

Azo ahena ny saran’ny fitaterana, amin’ny fiaraha-mandoa ny lany amin’ny mpisava lalana hafa. Raha misy mpisava lalana roa manana fiara, dia mety hiara-manao ny asa fitoriana any amin’ny faritra iray ihany izy ireo, amin’ny fampiasana fiara tokana ka amin’izany dia manafoana ny fandaniana amin’ny fampiasana fiara roa. Ireo mpisava lalana tsy manana fiara indray dia mety ho afaka hikambana amin’ireo manana ary handray anjara amin’izay lany amin’ny fitaterana. Mbola azo ahena koa ny fandaniana amin’ny fivezivezena, amin’ny fiasana ireo faritany akaiky amin’ny fandehanana an-tongotra indrindra. Any amin’ny tany maro dia mampiasa fitateram-bahoaka tsy dia andaniam-bola be ireo mpisava lalana.

Anisan’ireo naharesy ny zava-nanahirana ara-bola sy naharitra tao amin’ny fanompoana manontolo andro i Newton Cantwell sy ny vadiny. Nivarotra ny toeram-piompiany izy ireo ary nanomboka nanao ny asan’ny mpisava lalana niaraka tamin’ny enina tamin’ireo zanany fito tamin’ny 1932, nandritra ny Fitambotsorana Ara-toe-karena Lehibe. “Tsy ela akory dia laninay avokoa izay rehetra azonay tamin’ny nivarotana ny toeram-piompianay — ny ankamaroan’izany tamin’ny faktioran’ny dokotera”, hoy ny nosoratan’ny Rahalahy Cantwell. “Tadidinay fa rehefa nifindra tany amin’ny toerana nanendrena anay fanindroany izahay, dia tsy nanana afa-tsy izay ampy handoavana mialoha ny hofantrano tapa-bolana, niampy dimy dolara hampiasaina. Na dia izany aza, dia fantatray fa hanampy i Jehovah raha mbola manatanteraka amim-paharisihana ny fanompoanay koa izahay. (...) Nianatra nitsitsy tamin’ny fomba maro samihafa izahay. Tamin’ny fifindrana ho any amin’ny faritany vaovao iray, ohatra, dia niresaka tamin’ny sasany tamin’ireo tompon-toerana fivarotan-dasantsy aho ary nanazava fa fiara telo no ampiasainay isan’andro amin’ny asa kristiana ataonay. Mazàna izany no niafara tamin’ny fahazoanay lasantsy nisy fihenam-bidy. Tsy ela ireo zanakay lahy dia nianatra nanamboatra ny simba tamin’ny fiaranay, ka izany dia nitsimbina betsaka anay tamin’ny faktioran’ny garazy.” Tamin’izany no niatrehan-dry Cantwell tamim-pahombiazana ny zava-tsarotra ara-bola sy naharetany tao amin’ny fanompoana manontolo andro. Mbola tao amin’ny lisitry ny mpisava lalana ny Rahalahy Cantwell fony izy maty teo amin’ny faha-103 taonany.

Fahazoana asa tapa-potoana

Mpisava lalana maro be no manohan-tena ara-bola amin’ny alalan’ny asa tapa-potoana. Mba hanohanany ny tenany teo amin’ny fanompoany tany Korinto, dia niasa tamin’ny naha-mpanamboatra lay niaraka tamin’i Akoila sy i Prisila, mpiray finoana taminy, i Paoly. (Asan’ny Apostoly 18:1-11). Amin’izao andro izao, dia matetika ireo rahalahy ara-panahy no faly manolotra asa tapa-potoana ho an’ireo mpisava lalana. Ny mpisava lalana hafa dia mahazo asa toy izany amin’ny alalan’ireo masoivohon’ny fitadiavana asa, izay manolotra asa vonjimaika. Tena zava-dehibe ny finoana an’Andriamanitra, ary toy izany koa ny vavaka amim-pahatsorana mba hahazo ny fitarihany eo amin’ny fanaovana fanapahan-kevitra momba ny asa. — Ohabolana 15:29.

“Rehefa avy nanovo tanjaka be dia be avy tamin’ny fandinihana tamim-bavaka aho”, hoy ny mpisava lalana iray, “dia nampahafantatra tamin’ny lehibeko fa andraikitra manokana tena lehibe ny asa fanompoako ary tsy ho afaka ny hanaiky ny toeran’ny mpiasa manontolo andro aho. Ny alarobia nanaraka, dia nasaina nandinika indray ny amin’ilay asa aho, saingy tapa-potoana. Nanaiky tamim-pifaliana aho.” Aza manamaivana mihitsy ny herin’ny vavaka, ary araho asa ny vavaka ataonao.

Mety ho hitan’ny mpisava lalana fa tsara ny hiresahana amin’izay ho mpampiasa azy fa ny zava-kendreny amin’ny fitadiavana asa tapa-potoana dia ny mba hanohanany ny tenany eo amin’ny fanompoana. Mety hilaza ny andro mampahalalaka azy sy ny isan’ny ora azony atokana ho amin’ny asa iray isan-kerinandro izy ireo. Nisy mpirahavavy ara-nofo afaka nifampizara asa tapa-potoana tao amin’ny kompania iray mpanome torohevitra momba ny lalàna, ka izany dia namela ny tsirairay avy taminy hiasa roa andro sy tapany isan-kerinandro. Nanampy azy ireo tamin’ny naha-mpisava lalana izany mandra-panatrehany ny Sekoly Ara-baibolin’i Gileada An’ny Watchtower ka nandraisany ny fanendrena ho misionera.

Azo atao ny mahita karazana asa maro azo ekena araka ny Soratra Masina, amin’ny firesahana amin’ny mpiray finoana sy ny hafa na amin’ny fijerena ireo tolotr’asa ao amin’ny gazety. Manampy ny fanetren-tena satria afaka mitana ny mpisava lalana tsy ho fatra-pifantina karazana asa hatao izany. (Ampitahao amin’ny Jakoba 4:10.) Mba hanohizana manao ny asan’ny mpisava lalana, dia mety hilain’izy ireo ny manao asa ivelan’ny fivavahana izay heverin’ny olona sasany ho tsotra na ambany. Raha manaiky asa toy izany ny tena nefa maniry asa hafa, dia mety ho azo atao ny miova asa rehefa ela ny ela.

Tsy fahasalamana sy fahakiviana

Misy ny sasany tsy maintsy manapaka ny asany amin’ny maha-mpisava lalana noho ny zava-manahirana ara-pahasalamana lehibe. Raha tsy maika ny hanao izany anefa ny mpisava lalana, dia mety ho hitany fa azo sitranina ihany ny aretina iray na mety hihatsara amin’ny fomba antonony ihany ny fahasalamany mba hanohizana ny asan’ny mpisava lalana. Maro no afaka manao ny asan’ny mpisava lalana ihany na dia eo aza ny zava-manahirana ara-pahasalamana satria mahazo fitsaboana izy, manaraka tsara fandaharan-tsakafo mety aminy, sy manana ny fialan-tsasatra sy fampiasan-tena ilaina. Ny mpiandraikitra mpitety faritany iray dia nahatsikaritra anabavy mpisava lalana iray nijaly mafy noho ny aretin’ny tonon-taolana, hany ka nila fanampiana izy io mba handehanana an-tongotra isan-trano teo amin’ny fanompoana. (Asan’ny Apostoly 20:20). Kanefa dia nitarika fampianarana Baiboly tany an-tokantrano 33 io anabavy io sy ny vadiny ary nanampy olona 83 mba hanaiky ny fahamarinana momba an’Andriamanitra. Nihatsara ny fahasalamany rehefa nandeha ny fotoana, ary nanatrika ny Sekolin’ny Mpisava lalana izy rehefa afaka 11 taona tatỳ aoriana.

Mety hahatonga ny sasany hiala amin’ny fanompoana amin’ny maha-mpisava lalana ny fahakiviana. (Ohabolana 24:10). Nilaza toy izao tamin’ny mpiandraikitra mpitety faritany ny mpisava lalana iray: “Hampitsahatra ny asako amin’ny maha-mpisava lalana aho. (...) Manana faktiora tsy maintsy haloa mantsy aho.” Nila solomaso mitentina 20 dolara izy. “Hiala amin’ny asan’ny mpisava lalana amin’izay vola 20 dolara ve ianao?” hoy ilay mpiandraikitra. Notoroana hevitra ilay mpisava lalana mba hiasa tao amin’ny fambolen-kafe teo an-toerana mandritra ny indray andro, mba hahazoana 20 dolara ka hividy solomaso ary hanohy ny asan’ny mpisava lalana. Ny resadresaka fanampiny natao dia nampiharihary fa ny fahakiviana noho ny fanamboarana fiara lafo vidy no tena zava-nanahirana fototra. Nasaina nahenan’ilay mpisava lalana ny fandaniany tamin’ny fandehanana isan’andro tamin’ny elanelana kilaometatra vitsivitsy ihany fa tsy handeha any amin’ny faritra midadasika. Notoroana hevitra koa izy mba hitana fahasalamana tsara ara-panahy. Nampihatra ny torohevitra ilay mpisava lalana ary rehefa afaka enim-bolana tatỳ aoriana, dia naharay fiantsoana hanatrika ny Sekolin’i Gileada izy. Rehefa nahazo diplaoma izy dia voatendry ho any amin’ny tany hafa ary nanompo tamim-pahatokiana tany nandritra ny taona maro mandra-pahafatiny. Eny, fitahiana lehibe matetika no vokany raha tsy manaiky ho resin’ny fahakiviana isika fa mitadidy an-tsaina hoe momba antsika i Jehovah.

Hevero ho sarobidy ny tombontsoam-panompoanao

Na dia teo aza ny fisedrana, toy ny tsy fahampiana sy ny fotoana tsy nisian’ny sakafo, dia noheverin’i Paoly ho harena ny fanompoany. (2 Korintiana 4:7; 6:3-6). Eo anatrehan’ny adim-piainana sy ny fanenjehana amin’izao andro izao, dia maro be amin’ireo mpanompon’i Jehovah any Afrika, Azia, Eoropa Atsinanana, sy any amin’ny faritra hafa, no mihazona ny tombontsoany amin’ny maha-mpisava lalana. Noho izany, rehefa tojo fisedrana dia manaova ny fiezahana rehetra mba haharetana ao amin’io fanompoana misy tombontsoa io ho fiderana an’i Jehovah.

Ny ankamaroan’ireo mpisava lalana dia tsy afaka nirotsaka ho ao amin’ny asa fitoriana manontolo andro raha tsy nanatsotra ny fomba fiainany. Sahala amin’i Paoly, dia nanohitra ny fanintonana ho amin’ny zavatra ara-nofo izy ireo ary namboly fahaiza-mianina amin’ny ‘hanina sy fitafiana’. Mba haharetana amin’ny asan’ny mpisava lalana, dia ilain’izy ireo ny mitoetra ho mianina amin’izay zavatra tena ilaina ihany. (1 Timoty 6:8). Fifaliana no vokatry ny fiheverana ny tombontsoa nomen’Andriamanitra ho sarobidy, amin’ny fametrahana azy ireny eo ambonin’ny fananana ara-nofo.

Misy ohatra iray itỳ mba hanazavana izany: Nanana tombontsoa hanambara ny tombontsoan’ilay Fanjakana tany amin’ireo mpitondra fanjakana any Washington, D.C., i Anton Koerber. Nanompo tamin’ny naha-mpisava lalana nandritra ny fotoana sasany izy ary efa mpiandraikitra ny fizaran-tany tany amin’ireo taona 1950. Nisy sasany tamin’ireo mpiombon-draharaha taminy taloha nanatona azy indray mandeha mba hanolotra asa izay ho namela azy hahazo iray tapitrisa dolara. Mba hanaovana izany anefa, dia tsy maintsy nila ny hanokana ny fotoanany rehetra izy mba hanaovan-draharaha mandritra ny herintaona eo ho eo. Rehefa avy nivavaka mba hangataka fitarihana sy saina mahay mitsara zavatra izy, dia nilaza hoe: “Tsy hety amiko ny hiala amin’ny tombontsoa mahatalanjona ananako amin’ny fanompoana an’i Jehovah eto na dia mandritra ny herintaona monja aza, tsia, na dia hahazoana ny vola rehetra eo amin’izao tontolo izao aza. Sarobidy kokoa amiko ny fanompoana ireo rahalahiko eto Washington, ary fantatro fa mahazo ny fitahian’i Jehovah aho eto. Tsy isalasalana fa hahazo iray tapitrisa dolara aho, nefa amin’ny fiafaran’ny taonan’izany karazam-piainana izany, hanao ahoana ny fiainako ara-panahy, na ny ara-batana koa aza?” Noho izany dia nolaviny ilay fanolorana. Ny fiheverana ny tombontsoany ho sarobidy amin’ny fomba toy izany dia manampy olona maro be haharitra ao amin’ny asan’ny mpisava lalana.

Fitahiana miavaka toy inona moa no ananan’ny mpisava lalana! Fitahiana ny mandany ora maro hiresahana momba ny maha-mpanjaka be voninahitra an’i Jehovah. (Salamo 145:11-13). Noho izy ireo manokana fotoana maro be aoka izany ho amin’ny fanompoana, ny mpisava lalana dia manana ny tombontsoa hitondra fampiononana ara-panahy ho an’ny mahantra sy ny ampahorina, ny marary na ny zoim-pahoriana, ary ireo hafa ory mafy sy mila fanantenana azo antoka. Noho izany, raha mamela antsika hirotsaka ao amin’ny asa fitoriana manontolo andro ny toe-javatra, dia hanana fitahiana maro be tokoa isika. Ny “fitahian’i Jehovah no mampanan-karena”. (Ohabolana 10:22). Ary noho ny fanampiany sy ny fitahiany no haharetan’ireo mpitory ilay Fanjakana maro be amim-pifaliana ao amin’ny asan’ny mpisava lalana.

Fanontanian’ny Mpamaky

Nanoratra toy izao ny apostoly Paoly ao amin’ny Romana 9:3: “Efa saiky niriko aza ho voaozona ho afaka tamin’i Kristy ny tenako mba hahavonjeko ny rahalahiko, havako araka ny nofo”. Te hilaza ve izy tamin’izany fa ho nanao sorona ny ainy izy mba hamonjena ireo Jiosy toa azy?

Namela ny ohatra ambony indrindra ny amin’ny fitiavana i Jesosy. Vonona ny hanolotra ny fanahiny (âme), na ainy, ho an’ny olombelona mpanota izy. Nandritra ny fanompoany ampahibemaso, dia nikely aina ho an’ireo mpiray firenena — Jiosy — taminy izy mba ho betsaka araka izay azo atao ireo anisan’izay handray soa avy amin’ny sorom-panavotany. (Marka 6:30-34). Ny tsy faneken’izy ireo sy ny fanoherany ilay hafatra momba ny famonjena dia tsy nampihena na oviana na oviana ny fiahian’i Jesosy tamim-pitiavana ny vahoaka jiosy. (Matio 23:37). Ary namela ‘fianarana ho antsika izy, mba hanarahantsika ny diany’. — 1 Petera 2:21.

Afaka manaraka ny oha-pitiavan’i Jesosy ve ny olombelona tsy tanteraka? Eny, ary afaka mahita ohatra ny amin’izany isika eo amin’ny apostoly Paoly. Niahy aoka izany ny amin’ireo Jiosy nitovy taminy izy, hany ka, noho ny fitiavana azy ireo, dia nilaza izy fa niriny “ho voaozona ho afaka tamin’i Kristy” mihitsy ny tenany ho azy ireo.

Teo i Paoly dia nampiasa karazana teny fanitarana, na fampitomboana fomba filaza, mba hampisehoana ny tiany holazaina. Nampiasa fampitomboana fomba filaza toy izany i Jesosy ao amin’ny Matio 5:18 rehefa nilaza hoe: “Mandra-pahafoan’ny lanitra sy ny tany, dia tsy hisy ho foana akory amin’ny lalàna, na dia litera iray na tendron-tsoratra iray aza, mandra-pahatanterak’izy rehetra.” Fantatr’i Jesosy fa tsy ho foana ny lanitra sy ny tany. Toy izany koa, i Paoly dia tsy ho voaozona, ary tsy ny Jiosy rehetra no hanaiky ny Kristianisma. Fa ny tian’i Paoly holazaina dia hoe vonona ny hanao saika na inona na inona izy mba hanampiana ireo Jiosy ireo hahay hanararaotra ny fomba famonjen’Andriamanitra amin’ny alalan’i Jesosy Kristy. Tsy mahagaga raha afaka nampirisika ireo Kristiana namany toy izao ilay apostoly: “Aoka hanahaka ahy hianareo, dia tahaka ny anahafako an’i Kristy”! — 1 Korintiana 11:1.

Amin’izao andro izao, ny Kristiana dia tokony hanana fiahiana ny tsy mpino mitovy amin’ny an’i Jesosy sy i Paoly. Na oviana na oviana isika dia tsy tokony hamela ny tsy fisian’ny fahalianana, na ny fanoherana mivantana ataon’ny olona eny amin’ny faritany itoriantsika hampihena ny fitiavantsika ny mpiara-belona amintsika sy ny zotom-pontsika eo amin’ny fanampiana azy ireo hianatra ny lalan’ny famonjena. — Matio 22:39.