Ry tanora, ahoana no hampiasanareo ny fiainanareo?

“Mba tsy ho velona ho an’ny tenany intsony izay velona, fa ho an’izay efa maty sy nitsangana hamonjy azy.” — II KORINTIANA 5:15.

1. Teny ahoana moa no nanehoan’ny olona sasany ny fankasitrahany, ary nahoana?

‘MISAOTRA! Ianao no namonjy ahy tsy ho faty!’ Izany no nolazain’ny olona tamin’ireo izay nanavotra azy tamin’ny hain-trano na ny fahafatesana an-drano. Tamin’ireo teny ireo koa no nanehoan’ny tanora kristiana ny fankasitrahany an’ireo ray aman-dreniny. Tsy misaotra azy ireny noho ny fiainana ara-batana azony avy aminy fotsiny izy ireo, fa koa, ary indrindra, noho ny fitandremana sy ny fanabeazana voamariky ny fitiavana, izay nametraka azy ireo teo amin’ny lalana mitondra ho amin’ny “teny fikasana izay nataony tamintsika, dia ny fiainana mandrakizay”. — I Jaona 2:25.

2. Amin’ny fahazavan’ny toe-javatra inona moa no tokony hameran’ny tanora izay hampiasany ny fiainany?

² Noho ny fitiavany, Jehovah Andriamanitra dia nanao izay hahatratraran’ny tsirairay avy amintsika ny fiainana mandrakizay, “ny tena fiainana”. ‘Tiany isika ka nirahiny ny zanany ho avotra noho ny fahotantsika.’ (I Timoty 6:19; I Jaona 4:10). Aoka hoheverintsika koa ny fitiavana nasehon’i Jesosy Zanany tamin’ny fanekena ho faty tao anatin’ny fijaliana mafy mba hahazoantsika ny fiainana mandrakizay (Jaona 15:13)! Noho ireo antony ireo, dia mipetraka ny fanontaniana hoe: Ahoana no hampiasanao ny fiainanao?

3. Inona moa matetika no manapaka izay ampiasan’ny olona ny fiainany?

³ Io fanontaniana io, lazaina amin’ny fomba iray na hafa, dia fametraky ny mpanolo-tsaina ny amin’ny asa fidina hatao na olon-kafa miahy ny amin’ny ho aviny, amin’ireo tanora. Inona no hanapaka izay ho valinteninao? Ny fitiavanao manokana fotsiny ve? Ny hevitr’ireo olona maniry hahita anao ho tonga eo amin’ny toerana iray eo amin’izao tontolo izao ve? Sa hanapa-kevitra hampiasa ny fiainanao kosa ianao amin’ny fiheverana anton-javatra ambony kokoa? Aoka hoheverintsika izao fampahatsiahivana ara-tsindrimandrin’Andriamanitra izao: “Ary maty hamonjy ny olona rehetra izy, mba tsy ho velona ho an’ny tenany intsony izay velona, fa ho an’Izay efa maty sy nitsangana hamonjy azy.” (II Korintiana 5:15). Eny, tsara aoka izany ny manana fiainana izay manome taratry ny fankasitrahantsika izay nataon’i Jesosy Kristy sy ny Rainy any an-danitra ho antsika!

Ireo izay alain’izao tontolo izao ho ohatra

4. Karazan’olona manao ahoana matetika no raisin’ny tanora indrindra ho ohatra amin’izao andro izao?

⁴ Fa iza moa ireo olona izay mahita fahombiazana indrindra ankehitriny, ireo izay alain’ny tanora betsaka tahaka? Ny olona manan-karena sy malaza, na manao ahoana na manao ahoana toetrany ara-pitondrantena, sa tsy izany? Ary rehefa miditra ao an’efitranon’ny tanora maro ianao, karazan-tsary lehibe inona moa no hita eny amin’ny rindrina? Matetika izany dia ny an’ireo mpahay zava-maneno, na ireo mpilalao ao amin’ny sarimihetsika sy mpanao fanatanjahan-tena. Ny ankamaroan’ny tanora tokoa dia manonofy hahita fahombiazana mitovy amin’ny an’ireny olona ireny indray andro any, na hanambady olona iray, izay manana bika soa sahala amin’izy ireny. Ary ianao? Inona no andrasanao avy amin’ny fiainana?

5, 6. a) Nahoana no azo lazaina fa ny fahombiazana atolotr’izao tontolo izao ankehitriny dia tsy mitondra fahafaham-po marina? b) Inona no loharanon’ny fahafaham-po marina?

⁵ Raha toa ianao mahita fahombiazana sahala amin’ireo olo-malaza eo amin’izao tontolo izao, moa ve izany hitondra ho anao ny fahasambarana sy ny fahafaham-po marina? Indray andro ny anankiray amin’ireo vehivavy mpilalao ao amin’ny sarimihetsika fanta-daza indrindra tao Hollywood dia nanambara izao: “Ampoky ny harena sy ny fananana ara-nofo isan-karazany aho. Nefa tsy misy vidiny akory izany. Betsaka toy ireo toerana filomanosana misy ao amin’ny faritany ny fisian’ny mpitsabo areti-tsaina, tsy resahina intsony ny amin’ny fisaraham-panambadiana sy ireo zanaka mankahala ny ray aman-dreniny.” — Mpitoriteny 5:10; I Timoty 6:10.

⁶ Ny zazavavy mpanao fanatanjahan-tena malaza iray, mbola mpianatra, izay nandresy tamin’ny fihazakazahana malaza teo amin’ny halavirana 10 kilaometatra natao tao New York tamin’ny 1981 ho an’ny vehivavy, dia tonga hatramin’ny fahadisoam-panantenana aoka izany ka nanandrana namono tena. “Nianatra zavatra maro momba ny fiainana aho nandritra ireo volana faramparany, hoy ny nosoratany tatỳ aoriana. Nianarako, ohatra, fa tsy ahazoana fahafaham-po ireo fomba ampiasain’ny maro mba hahatratrarana ny fahatsarana tonga lafatra sy ny fahombiazana. Raha ny amiko, ny maha-mpianatra mahay ahy, na ny maha-tompon-daka amin’ny hazakazaka an-tongotra na ny maha-tovovavy mahasodoka, dia tsy nitondra ho ahy ny fahafaham-po.” Ny olombelona dia tokony hahatakatra fa tsy azo atao ny mahita ny tena fahafaham-po raha tsy amin’ny fitanana fifandraisana manokana amin’Andriamanitra, ilay hany afaka manome ny fiadanana sy ny fahasambarana marina. — Salamo 23:1, 6; 16:11.

7. Zava-dehibe ve ny fanaovana fianarana ambony sy ny hahombiazana mba hahatsapana ny tena fahafaham-po?

⁷ Miharihary àry fa tsy tokony hitady hanahaka ireo izay mikokotra mba hahazoana laza sy harena fotsiny ianao. Nisy aza mpanoratra ivelan’ny fivavahana manamarika fa ny fahombiazana ara-tsosialy dia tsy mitondra ny tena fahafaham-po. Nanoratra toy izao Bill Reel, mpanao gazety: “Nahazo diplaoma teny amin’ny oniversite ianao ary manonofinofy ny amin’ny ho avinao. Mampalahelo anefa fa tsy ho tanteraka ny ankamaroan’ny fanirianao. Tsy ta-hanakivy anao aho, nefa tokony ho fantatrao ny marina: Rehefa ho azonao ireo fananana tsiriritinao, raha toa ka ho azonao ireny, ary rehefa ho tratranao ny zava-kendrena noferanao, raha toa ka ho tratranao izany indray andro any, dia tsy ho afa-po ianao. Raha ny marina, amin’ny fotoana hiheveranao indrindra fa nahomby ianao, dia hahatsiaro banga ianao fa tsy fahafenoana, fahaketrahana fa tsy fifaliana, fanahiana fa tsy filaminana.” — New York Daily News, 26 may 1983.

8. Antony lehibe inona no tsy hitadiavantsika hanana toerana eo amin’izao tontolo izao?

⁸ Isika kosa izay mahafantatra ny hevitr’ireo fisehoan-javatra maneran-tany amin’ny fahazavan’ny faminaniana ao amin’ny Baiboly, dia manana antony mbola lehibe lavitra isika tsy hitadiavana toerana eo amin’ity izao tontolo izao ity (Matio 24:3-14). Ho azontsika atao ny hanohatra ny tenantsika amin’olona izay mahita soratra mipetaka amin’ny trano lehibe iray manao hoe: “Orinasa eo am-pikatonana.” Hitady hahazo toerana ao ve izy? Mazava ho azy fa tsia! Ary izay miasa ao amin’io orinasa io dia hihevitra amim-pahendrena hitady asa any an-kafa. Ny fikambanana rehetra eo amin’ity izao tontolo izao ity anefa dia toy ny manisy petadrindrina ahitana izao hafatra izao: “Eo am-pikatonana — Hifarana tsy ho ela!” Eny, manome antoka ho antsika ny Baiboly fa “mandalo izao fiainana izao”. (I Jaona 2:17.) Mampiseho fahendrena àry isika amin’ny tsy fakana ho ohatra, olona izay mifikitra lalina aminy.

Torohevitra mendrika arahina

9. Torohevitra inona mifanaraka amin’ny lalan’izao tontolo izao moa indraindray no omen’ny olona toa mitady izay hahasoa ny zatovo?

⁹ Ny fiainanao dia tsy voavolavolan’ny olona hajainao ihany, fa ny ray aman-dreny sy ny sakaiza koa izay araka ny filazany angamba, dia ‘mitady izay hahasoa anao’. ‘Tsy maintsy mamelon-tena’, hoy ny sasany amin’ireo manoro hevitra ny zatovo mba hanohizany fianarana ambony ka hahazoany amin’izany asa iray be karama. ‘Mpitsabo Lioka mpanoratra ao amin’ny Baiboly, hoy ny fanamarihana ataony, ary ny apostoly Paoly dia nampianarin’i Gamaliela, mpampiana-dalàna.’ (Kolosiana 4:14; Asan’ny apostoly 5:34; 22:3). Nefa aoka hofakafakaintsika amim-pitandremana ireny torohevitra ireny.

10. Ohatra inona moa no navelan’i Lioka sy Paoly, ary inona no azo lazaina ny amin’ny raharaha nataony talohan’ny naha-kristiana azy?

¹⁰ Lioka mpitsabo dia tsy namporisika ny kristiana velively handray fiofanana ara-draharaha sahala amin’ny azy. Nanao ny fitantarana ny fiainan’i Jesosy sy ny apostoliny kosa izy, mba hanolotra azy ireo ho ohatra. Azo inoana fa efa mpitsabo izy talohan’ny nandrenesany firesahana ny amin’i Kristy. Nefa taty aoriana, dia nanome ho an’ny fanompoana kristiana ny toerana voalohany teo amin’ny fiainany izy. Ny tarehin-javatra nisy an’i Paoly koa dia sahala amin’izany. Tsy namporisika ny hafa hanahaka azy izy, toy ny nanahafany an’i Gamaliela, fa nanoratra kosa izy hoe: “Aoka hanahaka ahy hianareo, dia tahaka ny anahafako an’i Kristy.” Paoly dia nanome vidiny lehibe aoka izany ho an’ny fahalalana momba an’i Kristy, hany ka araka ny teniny ihany, dia nihevitra ireo zava-nokendreny taloha ho toy ny “taimboraka” izy raha noharina tamin’izany. — I Korintiana 11:1; Filipiana 3:8.

11. a) Inona no nolazain’i Petera tamin’i Jesosy, ary nahoana? b) Nanao ahoana ny fihetsik’i Jesosy?

¹¹ Aza hadinoina fa, noho ny fihetseham-po diso toerana, dia mety hanome anao torohevitra tsy misy vidiny na dia ny olona tia anao aza. Araka izany, rehefa nampahafantatra izay hanjo azy ao Jerosalema teo am-piafaran’ny fanompoany Jesosy, ny apostoly Petera dia nanambara taminy hoe: “Sanatria aminao izany, Tompoko; tsy ho aminao tokoa izany.” Tia an’i Jesosy i Petera ka tsy tiany ny hijaliany. Nanitsy azy anefa i Jesosy, satria fantany fa mba hahatanteraka ny sitrapon’Andriamanitra, dia tsy maintsy hijaly sy hovonoin’ny fahavalony izy. — Matio 16:21-23.

12. Torohevitra inona moa no omen’ny olona tsara fikasa ho an’ny zatovo indraindray, ary nahoana?

¹² Tahaka izany koa, fa mety hanakivy anao tsy hifidy fiainana misy fandavan-tena ny havana na ny sakaiza. Atosiky ny fihetseham-po tsy mampiseho fahendrena izy ireny ka mety hisalasala ny hamporisika anao hanomboka ny fanompoana manontolo andro amin’ny maha-mpitory maharitra, na misionera, na koa mpiasa an-tsitrapo ao amin’ny sampan’ny Fikambanana iray. Angamba hoy izy ireny hoe: ‘Nahoana moa ianao raha manambady ka mipetraka etỳ akaikinay kosa?’ na: ‘Mafy be ange ny asa ao amin’ny Betela e! Tsy isalasalana fa ho tsaratsara kokoa raha mijanona miaraka aminay ianao.’ Lazainy amin’ny teny hafa indray ny fanambaran’i Petera hoe: “Sanatria aminao izany [manàna hatsaram-po amin’ny tenanao, MN ].”

13. a) Fomba fijery zavatra marina kokoa inona moa no nambaran’i Petera? b) Inona no tafiditra amin’ny hoe maha-kristiana marina?

¹³ Na dia amin’ireo mpanompon’i Jehovah aza, dia misy mihitsy mila manitsy ny fomba fisainany. Izany no nitranga tamin’i Petera izay, noho ny fomba fijery zavatra marina kokoa, dia nanoratra izao: “Fa ho amin’izany no niantsoana anareo, fa Kristy aza efa nijaly hamonjy anareo ka namela fianarana ho anareo, mba hanarahanareo ny diany.” (I Petera 2:21). Mba hananana fiainana tena kristiana, dia ilaina ny hanehoana fandavan-tena, eny, ary na dia hijaly mihitsy aza. Tsy lalana mora izany, nefa izany no niantsoana antsika kristiana. Ny fanekena izany dia midika fa ‘tsy velona ho an’ny tenantsika intsony isika, fa ho an’izay efa maty hamonjy antsika’. (II Korintiana 5:15.) Raha manaraka ohatra tsara foana isika, dia ho mora kokoa ny hampiasa ny fiainantsika amim-pahafoizan-tena toy izany.

Ohatra tokony hobanjinina

14. Ohatra inona no navelan’i Jesosy?

¹⁴ Ny ohatra tokony hobanjinina indrindra dia ny an’i Jesosy. Noho izy tanteraka, dia azony natao ny ho tonga mpanao fanatanjahan-tena na mpahay zavamaneno na koa mpitsabo na mpitsara lehibe indrindra izay azon’ny tany nomena. Nefa na dia tamin’ny fahazazany aza, dia niezaka hahafaly ny Rainy tany an-danitra izy (Lioka 2:42-49). Izao no nambarany tatỳ aoriana: “Tsy maintsy mitory ny teny soa mahafaly ny amin’ny fanjakan’Andriamanitra any amin’ny tanàna hafa koa aho, satria izany no nanirahana ahy.” (Lioka 4:43). Tamin’ny fahavaratra lasa teo, ny taratasy iray navoaka tao amin’ny revio ara-pivavahana Ministry dia nanambara izao: “Ny Mpamonjy antsika dia tia ny nihataka tamin’ny vahoaka, avy eo dia nandeha isan-trano Izy — nikaroka olona [fanahy]. Ny fahafinaretany dia ny niresaka tamin’olona [fanahy] iray isaky ny nandeha. Tamin’izay izy dia afaka nandrotsaka taminy ny fahamarinana — ny fitiavan’Andriamanitra.” — Lioka 10:1-16.

15. a) Nahoana ny fitoriana isan-trano no tsy raharaha mora? b) Inona no manondro fa ny fanompoana isan-trano tanterahin’ny zatovo dia mandaitra?

¹⁵ Marina fa tsy raharaha mora ny fitoriana isan-trano. Ilaina ny mianatra amim-pahazotoana ny Baiboly mba hahatakarana ny vaovao tsaran’ny Fanjakana, ary misahirana manomana fampisehoana mandaitra. Ankoatr’izany, io fanompoana io dia mitaky herim-po, satria ny ankamaroan’ny olona dia tsy miraika, ary ny sasany aza dia manohitra mihitsy. Kanefa, ry tanora, ny fanompoana tanterahinareo isan-trano dia manome vokatra tsara dia tsara araka ny fanamarihana nataon’ny La Voce, revio paroasialy mivoaka any Italia, tao amin’ny lahatsoratra iray, izay nanoratan’ny mpanao azy toy izao: “Ny tenako manokana dia mankasitraka ny Vavolombelon’i Jehovah, izay tonga mitsidika ny olona any an-tokantranony”, hoy ny fampahatsiahivany. Dia mbola nanampy izy hoe: “Ireo izay fantatro dia sady tena mahalala fomba no manaja olona; manana fisehoana ivelany mahafinaritra izy ireo ary tanora amin’ny ankamaroany. Ny hatsarana sy ny hatanorana dia tena mampiaiky rehefa asongadina toy izany.”

16. a) Noho ny fandraisany anjara amin’ny asa inona moa no maha-mendri-piderana ny tanora kristiana? b) Fampitahana manao ahoana moa no azo atao eo amin’ny fandaminan’ny Vavolombelon’i Jehovah sy ireo fivavahana raha ny amin’ny fanatanterahana ny asa lehibe indrindra eto ambonin’ny tany?

¹⁶ Ianareo tanora izay maka an’i Kristy ho ohatra, dia mendri-piderana tokoa ianareo! Tanora miisa ho 12 000 mahery ary latsaka ny 26 taona no mpitory maharitra any Etazonia, ary an’aliny maro hafa koa no toy izany any amin’ny toeran-kafa (Salamo 110:3). Aoka hiaiky ianao fa manatanteraka ny asa lehibe indrindra! Na dia ilay mpanoratra tao amin’ilay revio ara-pivavahana voalaza tetsy ambony aza, dia nilaza hoe: “Amin’Andriamanitra, ny asa lehibe indrindra eo amin’izao tontolo izao, dia ny fitsidihana ny olona isan-trano — hitadiavana fanahy.” Nanohy izy hoe: “Ahoana no hevitrao? Hatraiza no andraisantsika anjara amin’izany asa izany, izaho sy ianao? Mahalana aho no nandre firesahana ny amin’io karazan’asa io tao amin’ny revio MINISTRY.” Tsy tokony ho sambatra ve isika miara-miasa amin’ny fandaminana iray, izay manantitrantitra ny amin’ny ilàna anahafana ny ohatr’i Kristy, amin’ny fandehanana mitory?

17. Inona moa no nataon’i Timoty raha mbola azo inoana fa zatovo izy, ary inona no mampiseho fa tena mbola tanora izy tamin’izany fotoana izany?

¹⁷ Koa satria ny olona derainao dia manan-kery lehibe eo amin’ny fomba hampiasanao ny fiainanao, dia saintsaino koa ny amin’ny ohatra miavaka navelan’i Timoty tanora. Teraka fotoana fohy talohan’ny nahafatesan’i Jesosy izy, ary mbola zatovo rehefa nandao ny fianakaviany mba hiaraka tamin’ny apostoly Paoly tamin’ny diany misionera faharoa. Volana vitsivitsy tatỳ aoriana, dia noteren’ny vahoaka nanohitra handositra an’i Tesalonika Paoly sy Silasy, nefa efa nanao mpianatra vitsivitsy tao izy ireo (Asan’ny apostoly 16:1-3; 17:1-10, 13-15). Tsy ela tatỳ aoriana i Paoly dia naniraka an’i Timoty tany amin’io faritany nampidi-doza io mba hampahery ireny mpianatra ireny tamin’ny fisedrana nahazo azy (I Tesaloniana 3:1-3). Angamba tsy mbola roapolo taona akory Timoty tamin’izany fotoana izany, satria 12 ka hatramin’ny 14 taona tatỳ aoriana, dia mbola hiresaka ny amin’ny ‘hatanorany’, i Paoly. (I Timoty 4:12.) Moa ve ianao tsy midera zatovolahy be herim-po sy tia fandavan-tena toy izany?

18. Nahoana i Paoly no mieritreritra ny handefa an’i Timoty ho any amin’ny Korintiana?

¹⁸ Dimy taona taorian’ny nangatahany an’i Timoty hankany Tesalonika mba hanatanjaka ny rahalahy, Paoly, izay tany Efesosy, dia nanoratra ho an’ny Korintiana hoe: “Manahafa ahy hianareo. Ary noho izany dia nirahiko ho any aminareo Timoty (...), ka izy no hampahatsiaro anareo ny fanaoko ao amin’i Kristy, tahaka ny ampianariko ao amin’ny fiangonana rehetra eny tontolo eny.” (I Korintiana 4:16, 17). Koa satria efa niara-niasa dimy taona tamin’i Paoly i Timoty tanora, dia nahafantatra tsara ny fomba fampianarany. Fantany ny fomba nanoloran’i Paoly ny hafatra tamin’ireo Efesiana, anisan’izany ny fomba nampianarany azy ireo “teo imason’ny olona ary tao amin’ny isan-trano”. (Asan’ny apostoly 20:20, 21.) Koa satria nifankazatra tsara tamin’ireny fomba fitoriana ireny Timoty, dia afaka nitondra tokoa, fanampiana niavaka ho an’ireo kongregasiona.

19. Inona no nambaran’i Paoly ny amin’i Timoty, folo taona mahery taorian’ny nanombohany niara-nanompo?

¹⁹ Dimy na enin-taona izay no lasa, ary notanana tany Roma i Paoly. Ny tenan’i Timoty izay vao avy nafahana tao an-tranomaizina, dia niaraka taminy (Hebreo 13:23). Alao sary an-tsaina izay niseho: angamba nampiasa an’i Timoty ho mpitantsoratra i Paoly ka nanonona ny taratasiny ho an’ny Filipiana. Tamin’ny fandanjalanjana tsara ny teniny, dia izao no nambarany ankoatra ny zavatra hafa: “Nefa manantena ao amin’i Jesosy Tompo aho fa haniraka an’i Timoty faingana ho atỳ aminareo (...). Fa tsy manana olona mitovy fanahy amiko [aminy, MN ] aho na dia iray akory aza, izay hazoto hiahy anareo. (...) Izy kosa dia fantatrareo fa lehilahy voazaha toetra, fa efa niara-nanompo tamiko teo amin’ny filazantsara, tahaka ny zanaka manompo ny rainy.” — Filipiana 1:1; 2:19-22.

20. Inona moa no nahatonga an’i Timoty ho ohatra mendrika hoderaina ho an’ny tanora kristiana?

²⁰ Tsy azo lavina fa namela ohatra maha-te-hidera Timoty tanora! Namana nahatoky ho an’i Paoly izy, tamin’ny fifikirany taminy namakivaky ny fisedrana rehetra, tamin’ny fanohanana azy tao amin’ny fitoriana, sy tamin’ny fahavononana hanompo na aiza na aiza. Nafoiny ny hanana fiainana lazaina fa ara-dalàna tany aminy, nefa fahafaham-po toy inona moa no azony tamin’ny nanokanany ny fiainany tamin’ny fanompoana an’Andriamanitra! ‘Tsy velona ho an’ny tenany intsony’ tokoa Timoty, ‘fa ho an’i Kristy efa maty hamonjy azy’. (II Korintiana 5:15.) Manana faniriana hanahaka ny ohatra navelany ve ianao?

Aoka ianao ho velona ho an’izao tontolo izao vaovao ampanantenain’Andriamanitra

21. Nahoana no azo lazaina fa tanora araka ny fanahy i Timoty?

²¹ Niaina marina tokoa ho an’izao tontolo izao vaovao nampanantenain’Andriamanitra i Timoty. Tsy nihevitra velively ny anio ihany izy, fa nampiasa ny fiainany kosa mba hahazoana soa mandrakizay (Matio 6:19-21). Ny rainy, Grika iray izay toa tsy mpino, dia angamba namporisika azy hanao fianarana ambony sy hikatsaka anton’asa hahazoan-daza. Nefa noho ny fanabeazana nisy fitiavam-pivavahana azony avy tamin’ny reniny sy ny renibeny, Timoty dia nampifantoka ny fiainany tamin’ny asa kristiana. Nikatsaka zava-kendrena ara-panahy izy, angamba nitoetra ho mpitovo izy fara faharatsiny nandritra ny fotoana sasany, ka nanao fandrosoana hatramin’ny fahafahana nanompo teo anilan’ny apostoly Paoly. — II Timoty 1:5.

22. Ahoana moa no ilazalazan’ilay bokikely hoe Ny sekoly ny fiainan’ireo zatovo izay manahaka ny ohatr’i Timoty?

²² Ary ianao? Moa ve hampiasa ny fahatanoranao sahala amin’ny an’i Timoty ianao? Ny amin’izany fiainana izany no asian’ilay bokikely hoe Ny sekoly sy ny Vavolombelon’i Jehovah fitenenana, rehefa manambara toy izao ny amin’ny Vavolombelona tanora izy: “Ny zava-kendreny lehibe indrindra dia ny ho tonga minisitr’Andriamanitra tsara, ary ankasitrahany ny fanampiana azon’ny sekoly entina ho azy ireo amin’izany lafiny izany. Mazàna àry izy ireny no mifidy fianarana izay hanampy azy hamelon-tena eo amin’izao tontolo izao ankehitriny. Noho izany dia maro be aminy no mety hifidy fianarana mampianatra asa iray na mankany amin’ny sekoly mampianatra asa iray. Rehefa mandao ny sekoly izy ireny dia maniry ny hahazo asa iray izay hamela azy hifantoka amin’ilay asany lehibe indrindra, dia ny fanompoana kristiana.”

23. Nahoana no tsy tokony ho sarotra ho an’ny tanora kristiana ny hamaly ny fanontaniana hoe: Inona no hampiasako ny fiainako?

²³ Raha mankasitraka tokoa izay nataon’i Jehovah Andriamanitra sy ny Zanany ho anao ianao, dia tokony tsy ho sarotra aminao ny hamaly ny fanontaniana hoe: Inona no hampiasako ny fiainako? Toy izay ho velona ho an’ny tenanao, na ny fahafinaretanao manokana, dia ho velona mba hanatanteraka ny sitrapon’Andriamanitra ianao. Toa an’i Timoty, dia hanana fiainana mendrika ny olona araka ny fanahy ianao.

Ry tanora, manao fandrosoana ara-panahy ve ianareo?

“Mazotoa hihevitra izany zavatra izany, dia mikeleza aina fatratra amin’izany, mba hiseho amin’olona rehetra ny fandrosoanao.” — I TIMOTY 4:15.

1, 2. Midika, ary tsy midika inona moa ny hoe mandroso ara-panahy?

INONA moa no hevitry ny hoe mandroso ara-panahy? Izany dia milaza fanahafana an’i Jesosy sy Timoty, izay nanome ny toerana voalohany ho an’ny zavatra ara-panahy teo amin’ny fiainany. Raha manao fandrosoana ara-panahy ianao, dia ho fantatrao izay tianao hampiasana ny fiainanao. Tsy hilaza ianao hoe: ‘Hoeritreretiko am-pahamaotinana ny hanompo an’i Jehovah rehefa ho lehibe kokoa aho.’ Tsia, fa hanompo azy dieny izao ianao!

² Amin’ny lafiny hafa, ny hoe mandroso ara-panahy dia tsy milaza fisehoana ho masina na hoe eo am-pototry ny boky lalandava. Tsy midika fakana endrika malahelo na ambony koa izany ary hoe tsy mba miala voly mihitsy miaraka amin’ny sakaizan’ny tena (Jaona 2:1-10). Jehovah dia Andriamanitra falifaly, ka iriny ny hahasambatra ny zanany etỳ an-tany. Noho izany dia azo atao ny manao fanatanjahan-tena na miala voly amin’ny antonony sady mahazo sitraka aminy. — I Timoty 1:11; 4:8.

Asehoy izany amin’ny fanekenao hatao batisa

3. Oviana moa, araka ny tena azo inoana, no natao batisa Timoty?

³ Rehefa miomana ho amin’ny batisa ny tanora iray, ka avy eo dia atao batisa tokoa, izany dia manondro fa mandroso ara-panahy izy. Raha toa, araka ny ieritreretana azy, ka latsaka ny roapolo taona Timoty rehefa nanomboka niaraka tamin’ny apostoly Paoly tamin’ny fanompoany tamin’ny naha-misionera, dia angamba izy natao batisa teo amin’ny antenatenan’ny fotoana naha-zatovo azy na talohan’izay. Nahazo fanabeazana araka ny Baiboly izy hatramin’ny fahazazany, koa rehefa ampy ny fahalalany sy ny fahatakarany zavatra, dia tsy nisalasala ny hatao batisa izy. — II Timoty 3:15.

4. Fanontaniana inona no napetraky ny lehilahy iray tamin’i Filipo, ary na dia vao avy nahafantatra momba an’i Kristy aza izy io, nahoana Filipo no nanome fahafahampo ny fangatahany?

⁴ Ary ianareo ry zatovo izay mahazo fampianarana araka ny Baiboly, moa ve efa mba nanontany tena ianareo hoe: “Inona moa no manakana ahy tsy hatao batisa?” Tamin’ny taonjato voalohany, io fanontaniana io dia napetraky ny lehilahy iray mahalala tsara ny Soratra Masina, nefa vao avy nahafantatra ny amin’ny maha-izy an’i Kristy. Marina fa mbola tsy nanana fahalalana feno ny fikasan’Andriamanitra izy, nefa dia nahatsapa fankasitrahana lalina noho izay fantany. Tsy nisy na inona na inona nanakana ny hanaovan’i Filipo mpianatra batisa azy àry. — Asan’ny apostoly 8:26-39.

5. Fepetra inona avy no tokony hofenoinao mba hahafahanao hatao batisa?

⁵ Inona no manakana anao tsy hatao batisa? Mba hahafahana mameno ny fepetra takina amin’izany dia mazava ho azy fa tokony ho fantatrao ny hevitra rehetra fonosin’ny batisa sady maniry amim-pahatsorana ny hanompo an’i Jehovah ianao satria tianao izy. Tokony hanolo-tena ho azy manokana koa ianao amin’ny alalan’ny vavaka. Ankoatr’izany, dia tokony hanaraka akaiky ireo fepetra ara-pitondrantena takin’Andriamanitra ianao ary hampahafantatra efa hatramin’ny fotoana sasany ny finoanao amin’ny hafa. Raha toa fenonao ireo fepetra ireo, dia iankinan’ny aina ny handrosoana kokoa mba hanekenao hatao batisa. — Matio 28:19, 20; Asan’ny apostoly 2:38.

6. Azo oharina amin’inona moa ny batisa, ary inona moa no tokony hanaraka izany?

⁶ Marina fa rehefa atao batisa ianao dia asehonao fa mandroso ara-panahy ianao, nefa tadidio fa vao fanombohana izany. Amin’ny fanoloranao tena ho an’i Jehovah, dia tonga mpivahiny eto amin’ity izao tontolo izao tranainy tapahin’i Satana ity ianao; toy ny hoe mametraka ny filatsahanao ho amin’ny fiainana mandrakizay ao anatin’ny fandehan-javatra vaovao ampanantenain’Andriamanitra ianao, ary ny fotoan-dehibe amin’ny batisa dia mahaforona fampisehoana izany eo imason’ny vavolombelona (Jaona 12:31; Hebreo 11:13). Aorian’izany dia tokony tsy hivadika amin’ny fanoloran-tena nataonao tamin’Andriamanitra ianao mba hahazoana ny fanomezan’Andriamanitra, dia ny fiainana mandrakizay. — Romana 6:23.

Asehoy amin’ny fitondrantenanao izany

7. Inona moa no ifandraisan’ny fihetsikao eo anoloan’ireo zavatra fanaon’ity izao tontolo izao ity amin’ny fandrosoanao ara-panahy?

⁷ Ny fihetsikao eo anoloan’ireo zavatra fanaon’izao tontolo izao dia mampiseho raha toa mandroso ara-panahy ianao na tsia. Inona àry ireo zavatra ireo? Ankoatra ny zavatra hafa, fomba fiaina voamariky ny fanaranam-po, fampiasana zavatra mahadomelina, fijangajangana, sarimihetsika maloto, mozika mampietry, teny mahamenatra, dihy manaitaitra ny filan’ny nofo, fireharehana ara-pirazanana na ara-pirenena, ets... (I Jaona 2:16; Efesiana 5:3-5.) Ry tanora, tokony hitandrina indrindra ianareo. Aza hadinoina fa ny fihetsika arahinareo eo anoloan’ireny zavatra ireny dia mampiharihary ny toe-pahasalamanareo ara-panahy. — Ohabolana 20:11.

8. Nahoana moa no misalasala hatao batisa ny tanora sasany?

⁸ Ataon’i Satana izay hahatonga ny lalana tsy madion’izao tontolo izao ho mahasodoka ery. Ny zatovolahy iray 15 taona dia nilaza izao indray andro: “Arakaraka ny ampisehoana ny fahalotoana eo amin’ny maha-lahy sy maha-vavy sy ny fampiasana zava-mahadomelina ao amin’ny televiziona no toa maha-ara-dalàna azy ireny eo amin’ny fitambaran’olona.” Tiana ny hampino ireo zatovo izay tsy manaraka ny lalan’izao tontolo izao fa lany andro izy ireo ary mihafy amin’ny zavatra mahafinaritra. Moa ve efa nahatsapa izany fihetseham-po izany ianao? Izany no nitranga tamin’ny tanora sasany izay mifanerasera amin’ny kongregasiona kristiana; misalasala àry izy ireny. Rehefa nanontaniana tokoa ny tanora iray raha mihevitra ny hatao batisa izy, dia izao no navaliny: ‘Tsy amin’izao fotoana izao satria mety hanao zavatra izay mendrika ny fandroahana aho.’ Kanefa, tsy afaka ny hanao boloky mihinam-boatseva ianao ka sady tia ny atsy no tia ny aroa. Nilaza ny mpaminanin’Andriamanitra iray indray andro hoe: “Raha Jehovah no Andriamanitra, manaraha Azy, fa raha Bala kosa, dia manaraha azy.” — I Mpanjaka 18:21.

9. Voaro amin’inona moa ny tena rehefa mandroso ara-panahy?

⁹ Raha ny marina, izay rehetra afoinao amin’ny fanariana ny lalana maloton’izao tontolo izao, dia fijaliana be dia be. “Nitambesaran’ny nenina sy ny fahatsapana mahatsiravina fankahalana ny fiainana nananako aho, hoy ny fiaiken’ny vehivavy iray. Nanala baraka sy namitaka ny tenako sy ny zaza naterako aho.” Eny ny famirapiratr’izao tontolo izaon’i Satana dia tsy inona fa fisehoana mamita-maso fotsiny. Tsy misy vidiny mihitsy izany. Ny lalan’izao tontolo izao dia mitarika fananana anaka tsy ara-dalàna, tokantrano rava, aretin-dratsy eo amin’ny maha-lahy sy maha-vavy mifindra, fatiantoka sy loza mahatsiravina. Henoy àry ny torohevitra, manaova fandrosoana ara-panahy. ‘Aoka ianao hiala amin’ny ratsy ka hanao soa.’ — I Petera 3:11.

10. Famporisihana sy ohatra inona avy moa no harahin’ny tanora iray manao fandrosoana ara-panahy?

¹⁰ Ny zatovolahy na ny zatovovavy iray izay mandroso ara-panahy dia hanaraka izao famporisihana nataon’ny apostoly Paoly izao: “Raha amin’ny lolompo dia aoka ho zaza-bodo aza, fa amin’ny fahalalana kosa dia aoka ho lehilahy tokoa.” (I Korintiana 14:20). Timoty tanora dia azo antoka fa nampihatra io torohevitra io. Azonao atao ve ny mieritreritra azy eo am-pitadiavana fiarahana amin’ny zatovo mpanaram-po amin’ny ratsy sy sakaizan’izao tontolo izao tamin’ny androny? Tsia dia tsia! Ny namany dia mpanompon’Andriamanitra tahaka azy (Ohabolana 13:20). Araho ny ohatra navelany. Raha sendra voan’ny fakam-panahy hanaraka fitondrantena mampisalasala ianao, dia manontania tena hoe: Hanao toy izany ve Timoty na Jesosy?

Asehoy amin’ny fianarana ny Baiboly izany

11. Zavatra inona avy moa no tsy hitan’ny zatovo manaraka an’izao tontolo izao, ary ahoana no mety hananana fomba fahitan-javatra mazava foana?

¹¹ Ny lahatsoratra iray avy tany Italia ary navoaka tao amin’ny revio iray amin’ny teny anglisy (World Press Review) dia nanambara izao: “Ny fahadisoam-panantenana sy ny famoizam-pon’ny tanora dia mitombo isan’andro, ary tsy misy olona afaka manao izay hahatsinjovan’izy ireny ho avy mampahery.” Koa satria nohajambaina izy ireo, ny olona anisan’izao tontolo izao tapahin’i Satana dia tsy mahita an’izao tontolo izao vaovao ampanantenain’Andriamanitra na ny ho avy mahatalanjona atokana ho an’ireo olona mendrika hiaina ao (II Korintiana 4:4; Ohabolana 29:18; II Petera 3:13). Noho ny fianarany tsy tapaka ny Baiboly kosa, ny zatovo izay mandroso ara-panahy, dia manana fahitana izany zavatra izany mazava foana.

12. a) Mba hahazoana ny fahalalana an’Andriamanitra, amin’ny fomba ahoana no tokony hitadiavana izany? b) Nahoana no mendrika ny fiezahana atao hitadiavana azy io fahalalana io?

¹² Tena izy aminao ve izao tontolo izao vaovao ampanantenain’Andriamanitra? Mety ho toy izany no izy, nefa tokony hanao fiezahana tokoa ianao amin’izany. Mila mampitombo faniriana mafy hahazo fahatakarana ny Baiboly ianao mba ‘hitadiavana azy toy ny fitady volafotsy ary hikatsahana azy mandrakariva toy ny fikatsaka harena afenina’. (Ohabolana 2:1-6.) Inona moa no manosika ny mpikaroka harena iray hisava sy hihady, indraindray mandritra ny taona maro? Ny faniriany mivaivay hahazo harena. Ary anefa ny fahalalana dia mbola sarobidy lavitra noho ny harenan’izao tontolo izao. “Izao no fiainana mandrakizay, hoy Jesosy, dia ny mahafantatra Anao, Izay Andriamanitra tokana sady marina, sy Jesosy Kristy, Izay efa nirahinao.” (Jaona 17:3). Raha mino marina an’ireo tenin’i Jesosy ireo ianao, dia hianatra amim-pahazotoana ny Baiboly, ary izany dia hahitanao soa sarobidy lavitra noho ny vatosoa. — Ohabolana 3:13-18.

13. Fanipazan-kevitra inona avy momba ny fianarana moa no harahin’ny zatovo izay mandroso ara-panahy?

¹³ Ho hitanao fa arakaraka ny hianaranao no hitomboan’ny fahazotoanao homana ny sakafo ara-panahy. Manàna fomba fianarana tsara. Aza mianina amin’ny fanipihana ny valiny fotsiny, fa raiso ireo andinin-tenin’ny Baiboly voalaza, avy eo dia mitadiava andininy mitovy amin’izany, amin’ny fampiasana ny Baiboly misy fanamarihana. Azonao atao koa ny manao fikarohana fanampiny amin’ny alalan’ny Index an’ny Fikambanana. Fantaro hoe amin’ny ahoana ireo hevitra novelabelarina no mahakasika anao ary amin’ny fomba ahoana no azo ampiharana izany. Resaho amin’ny manodidina anao izay nianaranao. Izany dia hanoritra ao an-tsainao hevitra sasantsasany ka hamporisika ny hafa hanao fikarohana. Amin’ny fahazotoanao mianatra tokoa, dia hanaraka ity torohevitra nomena an’i Timoty tanora ity ianao: “Mazotoa hihevitra izany zavatra izany, dia mikeleza aina fatratra amin’izany, mba hiseho amin’ny olona rehetra ny fandrosoanao.” — I Timoty 4:15; II Timoty 2:15.

Asehoy ao amin’ireo fivoriana sy ao amin’ny fanompoana izany

14. Inona no azonao atao mba hahatonga ireo fivoriana kristiana hahafinaritra kokoa aminao, ary amin’ny fomba ahoana no azonao amporisihana ny olon-kafa izay manatrika azy ireny?

¹⁴ Rehefa mianatra ny Baiboly amim-pahafinaretana ianao ary manomana tsara ireo fivoriana kristiana, dia hahafinaritra anao kokoa izany (Salamo 122:1; Hebreo 2:12). Mbola ho faly kokoa ihany ianao amin’ny fieritreretana ny handray anjara amin’ireo foto-kevitra aseho amin’ny alalan’ny fanontaniana sy valiny sy amin’ny fanaovana famelabelarana ao amin’ny Sekolin’ny fanompoana teokratika. Nefa any am-pivoriana dia mbola azontsika ampiharina amin’ny fomba hafa ny torohevitra milaza amintsika mba ‘hifananatra’ sy “hampandroso ny fitiavana sy ny asa tsara”. (Hebreo 10:24, 25.) Ohatra, moa ve ianao mba mitari-javatra, amin’ny firesahana amin’ireo mpanatrika hafa? Ny fiarahabana amim-pisakaizana toy ny hoe “Manao ahoana! Faly aho mahita anao!” na ny fiheverana amim-pahatsorana miseho amin’ny hoe “Manao ahoana ny fahasalamanao?”, dia mety hampahery tokoa, indrindra raha avy amin’ny zatovo izy ireny.

15. Ahoana no azonao anolorana ny fanampianao mba hanao asa samihafa, ary nahoana no tsara ny hitadidiana ao an-tsaina ny ohatr’i Kristy

¹⁵ Betsaka ny asa tokony hatao eo anivon’ny kongregasiona iray. Ho azonao atao ve ny handray anjara amin’izany? Timoty tanora dia azo inoana fa nanampy tamin’ny fomba maro an’i Paoly — tamin’ny fanatanterahana iraka maika, fividianan-javatra, tamin’ny fanaterana taratasy, ets. Raha tsy efa nataonao izany, nahoana moa raha manatona an’ireo loholona mba hilaza aminy fa vonona ny hitondra ny fanampianao ianao? Angamba izy ireo hangataka anao hizara ireo anjara amin’ny fandaharan’ny fivoriana, hanadio ny efitrano na hanatanteraka asa hafa ilaina. Tadidio fa Kristy dia nanasa ny tongotry ny mpianany; noho izany dia tsy misy mihitsy asa tsy mendrika ho an’ny olona iray mandroso ara-panahy. — Jaona 13:4, 5.

16. Araka ny revio katolika iray, asa inona moa no tokony hotanterahin’ny kristiana?

¹⁶ Raha oharina amin’izay miseho ao amin’ireo fivavahana hafa, dia afaka ny ho velom-pankasitrahana tokoa isika noho ny fampiofanana azontsika ao amin’ny faritry ny fivoriana kristiana. Izany dia manampy antsika hanatanteraka ny asa lehibe indrindra amin’ny hafa rehetra, dia ny fitoriana. Tao amin’ny revio U.S. Catholic tamin’ny septambra lasa, Kenneth Guentert dia nanao izao fanambarana izao: “Nihalehibe tamin’ny fotoana izay tsy namporisihana ny katolika amin’ny ankapobeny hamaky Baiboly ny tenako, sao hanana saina hafahafa izy ireo — ohatra, hihevitra izy ireo fa ny kristiana dia tokony handondòna isam-baravarana mba hanandrana hanova ny mpiara-belona aminy. Avy eo dia nisy ny Vatican II, ary nanomboka namaky Baiboly aho. Voatery niaiky aho: ny kristiana dia tokony handeha handondòna isam-baravarana mba hanandrana hanova ny mpiara-belona aminy.” Hoy ny nanampiny: “Tsy hoe mahafinaritra ahy akory izany hevitra izany; fa rehefa vakina ny Testamenta Vaovao, dia saika tsy azo atao ny hiala amin’izany famaranan-kevitra izany.” — Matio 10:11-13; Lioka 10:1-6; Asan’ny apostoly 20:20, 21.

17. Inona no azonao atao mba hahatonga ny fanompoana hitondra ho anao fifaliana bebe kokoa?

¹⁷ Eny, ireo kristiana voalohany dia nitory tamim-paharisihana isan-trano, ary azo inoana fa nisy zatovo toa an’i Timoty nandray anjara tamin’ny fanompoana niaraka tamin’ireo zokinjokiny. Kanefa dia tokony hekena fa tsy mahita an’io asa io ho ny mahafinaritra indrindra ny sasany ankehitriny. Inona no antony? Tafiditra amin’izany ny fahakingana azo. Moa ve tsy ahitana fahafinaretana kokoa ny manao kilalao na fanatanjahan-tena iray rehefa mpilalao mahay ny tena? Dia tahaka izany koa ny amin’ny fanompoana. Arakaraka ny hahaizanao mampiasa ny Baiboly sy hamelabelaranao foto-dresaka mora foana, no hahatonga ny fanompoana ho loharanom-pahafinaretana ho anao, indrindra rehefa hahita olona izay ho azonao ampitana ny fahalalana mamelombelona ao amin’ny Baiboly ianao. Manaova àry fandrosoana eo amin’ny lafiny ara-panahy! Manaova fanazaran-tena amin’ny fampisehoana ny hafatra isam-baravarana. Mandraisa fanipazan-kevitra eo amin’ireo kristiana namanao. Mangataha ny fanampian’i Jehovah. — Lioka 11:13.

Asehoy amin’ny fifandraisanao amin’ny olon-dehibe izany

18. Karazana fifandraisana inona no tian’i Jesosy sy Timoty hananana tamin’ny olon-dehibe?

¹⁸ Raha mbola vao 12 taona Jesosy, dia nahita fahafinaretana nandany fotoana niaraka tamin’ny olon-dehibe mba hiresadresaka ny amin’ny zavatra ara-panahy tamin’izy ireny. Indray andro, ny ray aman-dreniny dia “nahita azy teo an-kianjan’ny tempoly, nipetraka teo afovoan’ny mpampianatra ka nihaino sady nanontany azy”. (Lioka 2:46.) Tahaka izany koa ny amin’i Timoty. Rehefa tonga tao Lystra ny apostoly Paoly sy ireo namany, dia azo antoka fa nankafy ny fiarahana tamin’izy ireo Timoty sady nihevitra tamim-pitandremana ny fampianarany. Nanana fifandraisana tsara tamin’ireo rahalahy teo an-toerana izy, ka natolotr’izy ireo tamin-kafanana. — Asan’ny apostoly 16:1-3.

19. Noho ny antony lehibe inona indrindra no nifidianan’i Paoly an’i Timoty ho mpiara-dia taminy, ary nanampy tamin’inona moa i Timoty?

¹⁹ Marina fa nanampy an-tsitrapo ny hafa tamin’ny lafiny ara-nofo Timoty, nefa matoa nifidy azy ho mpiara-dia taminy i Paoly, dia satria indrindra afaka nanome izay nilain’ny olona tamin’ny lafiny ara-panahy izy. Toy izany, rehefa noteren’ny vahoaka tsy tia azy handao an’i Tesalonika Paoly, dia naniraka an’i Timoty tanora izy hampahery sy hanatanjaka ireo mpianatra vaovao. Timoty àry dia tsy naniry hampianarin’ny olon-dehibe sy hiaraka aminy fotsiny, fa naniry hitondra ny tena fanampiana ara-panahy ho azy ireny koa izy. — Asan’ny apostoly 17:1-10; I Tesaloniana 3:1-3.

20. Inona no hataonao amim-pahendrena, ary asa inona avy no azonao atao ho an’ireo be taona?

²⁰ Am-pahendrena, dia tahafo Jesosy sy Timoty amin’ny fanehoanao faniriana handray soa avy amin’ny fanandraman-javatra sy ny fahalalan’ny olon-dehibe. Tadiavo ny fiarahana aminy sady ametraho fanontaniana izy. Nefa asehoy koa fa mandroso ara-panahy ianao, amin’ny fitondrana ho azy ny fanampianao. Mahafantatra olona be taona na kilemaina ve ianao izay ho faly ny hanaovanao ho azy ireny fiantsenana sasany na asa hafa? Angamba ianao ho afaka hitsidika azy fotsiny mba hamaky zavatra aminy sy hizara aminy ny fifaliana azonao tany amin’ny fanompoanao.

Ny anjara asan’ny ray aman-dreny sy ny kristiana hafa

21. Manao ahoana ny halehiben’ny anjara asan’ny ray aman-dreny, ary inona no tsy ampy mihitsy ny fanantitranterana azy?

²¹ Ny fahasalamana ara-panahin’ny zatovo dia miankina betsaka amin’ny fampianarana sy ny ohatra omen’ireo ray aman-dreniny azy (Ohabolana 22:6). Tia fivavahana ny ray aman-drenin’i Jesosy, ary tsy isalasalana fa nandray soa lehibe avy tamin’ny fitarihana nomen’izy ireo izy (Lioka 2:51, 52). Raha ny amin’i Timoty, dia azo antoka fa tsy ho tonga ilay tovolahy ara-panahy nahalalana azy izy raha tsy nobeazin’ny reniny sy ny renibeny (II Timoty 1:5; 3:15). Tsy ho ampy mihitsy ny fanantitranterana ny maha-zava-dehibe ny hanomezana fampianarana araka ny Baiboly tsy tapaka ho an’ny ankizy! Ry Ray aman-dreny, moa ve izany no ataonareo? Sa manao tsirambina kosa ianareo amin’io lafiny io?

22. a) Rehefa mihevitra ho zava-dehibe ny fianarana Baiboly ireo ray aman-dreny, vokatra inona no entin’izany eo amin’ny ankizy? b) Fitarihana inona no tokony homen’ny ray aman-dreny kristiana ny zanany?

²² Tao amin’ny foibe maneran-tanin’ny Vavolombelon’i Jehovah, dia nanazava ny tovolahy iray fa ny fianarana Baiboly isan-kerinandro niaraka tamin’ny ankizy dia fahazarana foana tao amin’ny fianakaviany. “Indraindray dia reraka loatra i dada rehefa avy niasa ka sarotra taminy ny nifoha, nefa nanao ny fianarana ihany izy, ka izany tsy fahatapahana izany dia nanampy anay hahatakatra ny maha-maotina ny fianarana.” Ry ray aman-dreny, ho sarotra inoana ny hanomezan’ny zanakareo toerana lehibe ho an’ny zavatra ara-panahy raha toa ny tenanareo koa tsy manao torak’izany. Amporisiho izy ireny hametra ho zava-kendrena ny hanompo amin’ny maha-mpitory maharitra, misionera na mpikambana ao amin’ny Betela. Ampio izy ireo hahatakatra fa ny fanompoana no raharaha misy antenaina amin’ny ho avy fa ny raharaha ivelan’ny fivavahana kosa dia tsy mitondra ho amin’ny lalana marina mihitsy. — Jereo I Samoela 1:26-28.

23. Ahoana no azon’ny mpikambana hafa ao amin’ny kongregasiona hanampiana ny zatovo mba handroso ara-panahy?

²³ Ny mpikambana hafa ao amin’ny kongregasiona dia afaka mitondra ny fanampiany mba hampandrosoana ny zatovo eo amin’ny lafiny ara-panahy. Azonao raisina ho adidy ny miresadresaka amin’izy ireny aloha na aorian’ny fivoriana. Miezaha koa mampiditra azy ireny ao anatin’ny asa sasany ataonao. Ny loholona iray, ohatra, dia afaka manasa ny kristiana tanora iray, sady miera amin’ny ray aman-dreniny, hiaraka aminy any amin’ny kongregasiona hafa iray, izay tokony hanaovany lahateny, na hitsangatsangana miaraka (Joba 31:16-18). Ny zavatra iray toa kely indraindray dia mitondra vokany lehibe. Indray andro, raha nanao lahateny ny mpiandraikitra mpitety faritany iray, dia nahamarika zazalahy kely izay nihaino azy tamim-pitandremana, nefa tsy nanana Baiboly; notolorany iray izy rehefa nifarana ny fivoriana. Voatohina ny fon’ilay zaza, tsy noho ny fanomezana fotsiny, fa noho ny fiheverana nasehon’io mpiandraikitra io taminy koa. Telopolo taona mahery tatỳ aoriana, rehefa tonga loholona koa ny tenany, dia mahatsiaro foana amim-pihetseham-po an’izany fiheverana feno fitiavana naseho taminy izany izy.

24. Inona moa no mahafaly ny mahafantatra azy, ary inona no tokony ho fahatapahan-kevitsika?

²⁴ Moa ve tsy mahafaly ny mahafantatra fa “zatovo tahaka ny ando ateraky ny maraina” ana hetsiny maro no mitory ny hafatra mamelombelon’ilay Fanjakana, ary fara fahakeliny zatovovavy mitovy isa amin’izany, no mahaforona ‘antokony lehibe mpilaza soa’? Enga anie izy rehetra hiezaka handroso ara-panahy, ary isika rehetra hanampy azy ireo amin’izany lafiny izany! — Salamo 110:3; 68:11.

Famerenana

◻ Inona moa no afaka hanampy ny tanora kristiana iray hamantatra hoe rahoviana no tokony hatao batisa izy?

◻ Ahoana moa no ahitana amin’ny fitondrantenan’ny tanora kristiana iray hoe hatraiza izy no nandroso ara-panahy?

◻ Inona moa no mety hanampy ny zatovo handray anjara amim-pahafinaretana amin’ireo fivoriana sy fitoriana?

◻ Fifandraisana manao ahoana no tokony hananan’ny tanora kristiana amin’ny mpikambana olon-dehibe ao amin’ny kongregasiona?

◻ Ahoana no azon’ny ray aman-dreny sy ny kristiana olon-dehibe anampiana ny zatovo?