Lesona Faha-6
Inona moa ny Fanjakan’Andriamanitra?
Aiza no misy ny Fanjakan’Andriamanitra? (1) Iza no Mpanjakan’izy io? (2)
Misy hafa koa ve miara-manjaka amin’ilay Mpanjaka? Raha eny, firy? (3)
Inona no porofo fa miaina amin’ny andro farany isika izao? (4)
Inona no hataon’ny Fanjakan’Andriamanitra ho an’ny olombelona amin’ny hoavy? (5-7)
1. Fony tetỳ an-tany i Jesosy, dia nampianatra ny mpianany hivavaka mba hahatongavan’ny Fanjakan’Andriamanitra. Ny fanjakana dia fitondrana tarihin’ny mpanjaka. Fitondrana hafakely ny Fanjakan’Andriamanitra. Any an-danitra no misy azy io, ary hitondra ity tany ity izy io. Hanamasina ny anaran’Andriamanitra koa izy io, ary hahatonga ny sitrapon’Andriamanitra hatao eto an-tany, toy ny efa atao any an-danitra.—Matio 6:9, 10.
2. Nampanantena Andriamanitra fa ho lasa Mpanjakan’io Fanjakana io, i Jesosy. (Lioka 1:30-33) Fony tetỳ an-tany i Jesosy, dia efa hita fa ho Mpitondra tsara fanahy sy tia ny rariny ary tonga lafatra. Tsy tonga dia natao Mpanjakan’ny Fanjakan’Andriamanitra avy hatrany izy rehefa niverina tany an-danitra. (Hebreo 10:12, 13) Tamin’ny 1914, dia nomen’i Jehovah an’i Jesosy ilay fahefana nampanantenainy azy. Nanomboka tamin’izay, dia nanjaka tany an-danitra i Jesosy, ilay Mpanjaka voatendrin’i Jehovah.—Daniela 7:13, 14.
3. Nisy lehilahy sy vehivavy nahatoky koa nofidin’i Jehovah mba hankany an-danitra. Avy teto an-tany izy ireo, ary hiara-manjaka amin’i Jesosy, ka ho mpanjaka sy mpitsara ary mpisorona ho an’ny olombelona. (Lioka 22:28-30; Apokalypsy 5:9, 10) Nantsoin’i Jesosy hoe “ondry vitsy” ireo hiara-manjaka aminy ireo. Miisa 144 000 izy ireo.—Lioka 12:32; Apokalypsy 14:1-3.
4. Raha vao lasa Mpanjaka i Jesosy, dia noroahiny avy tany an-danitra i Satana sy ireo anjeliny ratsy fanahy ka natsipiny tetỳ an-tany. Izany no mahatonga ny fiainana eto an-tany ho ratsy dia ratsy, nanomboka tamin’ny 1914. (Apokalypsy 12:9, 12) Ny ady, ny mosary, ny areti-mandringana, ny fitomboan’ny tsy fankatoavan-dalàna, dia samy anisan’ny “famantarana” fa efa manjaka i Jesosy ankehitriny, ary efa kely sisa dia hifarana ity tontolo ity.—Matio 24:3, 7, 8, 12; Lioka 21:10, 11; 2 Timoty 3:1-5.
5. Tsy ho ela dia hitsara ny olona i Jesosy, ka hanavaka azy ireo toy ny manavaka ny ondry amin’ny osy. Ny “ondry” dia ireo hita fa vahoakany tsy mivadika aminy. Hahazo fiainana mandrakizay eto an-tany izy ireo. Ny “osy” kosa dia ireo mandà ny Fanjakan’Andriamanitra. (Matio 25:31-34, 46) Tsy ho ela, dia haringan’i Jesosy izay rehetra toy ny osy. (2 Tesaloniana 1:6-9) Raha te ho anisan’ny ‘ondrin’i Jesosy’ ianao, dia tsy maintsy mihaino ny hafatra momba ilay Fanjakana, ary manao zavatra mifanaraka amin’izay ianaranao.—Matio 24:14.
6. Voazarazara ho firenena maro ny tany ankehitriny. Samy manana ny fanjakany avy izy ireo. Matetika ireo firenena ireo no miady. Hisolo toerana an’ireo fanjakan’olombelona rehetra ireo anefa ny Fanjakan’Andriamanitra. Izy io irery no hany fitondram-panjakana hitondra ny tany manontolo amin’ny hoavy. (Daniela 2:44) Tsy hisy intsony ny ady sy ny heloka bevava ary ny herisetra amin’izay fotoana izay. Hiara-miaina ao anatin’ny filaminana sy firaisan-tsaina ny olona rehetra.—Mika 4:3, 4.
7. Mandritra ny Fanjakana Arivo Taonan’i Jesosy, dia ho lavorary ny olombelona mahatoky, ary ho lasa paradisa ny tany manontolo. Amin’ny faran’ny arivo taona, dia ho efa vitan’i Jesosy avokoa izay rehetra nasain’Andriamanitra nataony. Amin’izay fotoana izay, dia haverin’i Jesosy amin-dRainy ilay Fanjakana. (1 Korintiana 15:24) Nahoana no tsy ilazana ny amin’izay hataon’ny Fanjakan’Andriamanitra ny havana aman-tsakaizanao?
[Sary, pejy 13]
Tsy hisy fankahalana na fanavakavahana intsony rehefa i Jesosy no mitondra