Inona no Holazainao Amin’ny Olona Iray Tsy Mino An’Andriamanitra?
1 “Tsy mino an’Andriamanitra aho”, hoy ny nolazain’ny profesora iray avy any Polonina, tamin’ny misionera iray tatsy Afrika. Kanefa, afaka niresaka tamin’ilay vehivavy ilay anabavy, ary nanome azy ny boky La vie: comment est-elle apparue? Évolution ou création? Rehefa niverina ilay misionera ny herinandro nanaraka, dia nilaza taminy ilay profesora hoe: “Tsy olona tsy mino an’Andriamanitra intsony aho!” Namaky ilay boky Création manontolo izy, ka izao dia nangataka fampianarana Baiboly. Inona no azonao atao mba hahafahana hitory amin’ireo izay milaza fa tsy mino an’Andriamanitra? Voalohany, dia diniho aloha ireo antony samihafa ilazan’ny olona izany.
2 Anton-javatra izay mahatonga ny tsy finoana an’Andriamanitra: Tsy ny olona tsy mino an’Andriamanitra rehetra no notezaina ho toy izany. Maro no nanaraka fivavahana iray, ary nisy fotoana ninoany an’Andriamanitra. Kanefa, nampihena ny finoany ny zava-manahirana lehibe ara-pahasalamana na ara-pianakaviana, na ny tsy rariny sasany nihatra taminy. Ho an’ny hafa, dia nisy akony ratsy teo amin’ny fiheverany momba an’Andriamanitra, ny zavatra nampianarina azy tany amin’ny fianarana ambony. Mariho ireto ohatra ny amin’ny olona tsy nino an’Andriamanitra manaraka ireto, izay namboly finoana matanjaka an’i Jehovah Andriamanitra tamin’ny farany, ka lasa Vavolombelony.
3 Nisy vehivavy iray tany Paris, teraka nanana aretin’ny taolana nampahalemy. Na dia Katolika vita batemy aza izy, dia nilaza ho tsy nino an’Andriamanitra. Rehefa nanontany an’ireo masera ny antony nahatonga an’Andriamanitra hamela azy ho teraka sembana toy izany izy, dia hoy izy ireo hoe: “Satria tia anao izy.” Tsy nety nanaiky izany hadalana izany izy. Afa-tsy izany koa, dia diniho ny ohatry ny zatovo iray any Failandy, izay voalaza fa voan’ny aretin-kozatra tsy azo sitranina, ka voatana teo amin’ny seza misy kodiarana. Nitondra azy tany amin’ny Pentekotista, izay nilaza ho nanasitrana marary, ny reniny. Tsy nisy fahagagana nanasitrana azy anefa, ka tsy liana ny amin’Andriamanitra ilay tovolahy, ary nanjary tsy nino an’Andriamanitra.
4 Nisy lehilahy iray tany Honduras, notezaina ho Katolika, nefa nianatra filôzôfia sosialista izy, ka nanjary tsy nino an’Andriamanitra. Resy lahatry ny fampianaran’ny oniversite izy fa hoe avy amin’ny evôlisiôna ny olombelona, ka nitsahatra tsy nino an’Andriamanitra. Mitovy amin’izany koa fa nisy vehivavy iray tany Etazonia, izay notezaina ho Metodista. Nanao psikôlôjia (siansa momba ny saina) izy tany amin’ny oniversite. Inona no fiatraikan’izany teo amin’ny finoany? Hoy izy: “Tao anatin’ny telo volana monja, dia nandrava ny finoana rehetra nananako momba ny fivavahana izany.”
5 Fanohinana ny fon’ireo olona tso-po: Olona maro izay milaza fa tsy mino an’Andriamanitra, no ho faly hahafantatra raha misy vahaolana ny zava-manahirana ny amin’ny tsy fahasalamana, ny tsy fifanarahan’ny mpianakavy, ny tsy rariny, ary ny toy izany. Izy ireo dia liana hahita ny valin’ny fanontaniana toy ny hoe: ‘Nahoana no misy ny faharatsiana?’, sy ny hoe ‘Nahoana no iharan’ny zava-dratsy ny olona tsara?’, ary ny hoe ‘Inona no hevitry ny fiainana?’
6 Samy notezaina ho tsy nino an’Andriamanitra ny mpivady iray mipetraka any Soisa. Rehefa niresahana voalohany ny fahamarinana izy ireo, dia tsy nanaiky. Nanan-java-nanahirana lehibe ara-pianakaviana anefa izy ireo, ka nihevitra ny hisara-panambadiana. Rehefa nitsidika azy ireo indray ireo Vavolombelona, dia nampiseho tamin’izy ireo, avy tao amin’ny Baiboly, ny fomba handaminany ny zava-nanahirana azy. Talanjona noho ilay torohevitra azo nampiharina noraketin’ny Soratra Masina ilay mpivady, ka nanaiky ny hianatra Baiboly. Nahazo tanjaka ny fanambadiany, ary nandroso ara-panahy izy ireo, ka natao batisa.
7 Izay azonao lazaina amin’ny olona iray tsy mino an’Andriamanitra: Rehefa misy olona milaza aminao fa tsy mino an’Andriamanitra izy, dia miezaha mitady ny antony ilazany izany. Moa ve izany noho ny fanabeazana azony, sy ny zava-manahirana nahazo azy, sa noho ny fihatsarambelatsihy ara-pivavahana sy ny fampianaran-diso hitany? Azonao atao ny manontany azy toy izao: “Efa nihevitra toy izany foana ve ianao?”, na “Nahoana ianao no manatsoaka hevitra toy izany?” Hanampy anao hamaritra izay holazainao ny valin-teniny. Raha mila fanaporofoan-kevitra mahery, dia ny boky Y a-t-il un Créateur qui se soucie de vous? fotsiny no hany ilaina.
8 Azonao atao ny miresaka amin’ny olona iray tsy mino an’Andriamanitra, amin’ny fanontaniana toy izao:
◼ “Efa mba nanontany tena ve ianao hoe: ‘Raha misy Andriamanitra iray, nahoana no misy fahoriana sy tsy rariny be dia be toy izao, eto an-tany?’ [Avelao izy hamaly.] Azoko atao ve ny mampiseho aminao ny fomba fijerin’ny Baiboly ny amin’io loha hevitra io?” Vakio ny Jeremia 10:23. Rehefa avy mamaky azy io, dia anontanio ny heviny momba ilay andinin-teny. Avy eo, dia asehoy aminy ny pejy faha-16 sy faha-17, ao amin’ilay bokikely hoe Hisy Tontolo Iray Tsy Hisian’ny Ady ve Indray Andro Any? Na, azonao atao ny mampiasa ny toko faha-10 amin’ny boky Créateur. Asao izy handray ilay boky, ary hamaky ilay fanazavana. — Raha mila fanoloran-kevitra fanampiny, dia jereo ny boky Fanjohian-kevitra, pejy 41-42.
9 Ekena fa tsy ny olona tsy mino an’Andriamanitra rehetra akory no hanaiky ny fahamarinana. Maro anefa no vonona handinika fomba fijery iray hafa. Mampiasà fanjohian-kevitra mirindra, sy fandresen-dahatra, ary ambonin’ny zavatra rehetra, dia ny herin’ny Tenin’Andriamanitra, mba hanampiana azy ireo hahita ny fahamarinana. — Asa. 28:23, 24; Heb. 4:12.