Aoka Isika Hanao ny Anjarantsika mba Hananana Trano Fivavahana Mahafinaritra
1 “Endrey, tsara sady mahafinaritra raha ny mpirahalahy no miara-monina.” (Sal. 133:1). Tafaraka amin’ireo rahalahintsika isika rehefa mivory ao amin’ny Efitrano Fanjakanantsika, ka afaka mifandrisika amin’ny fitiavana sy ny asa tsara, sy mifampahery. — Heb. 10:24, 25.
2 Ny Efitrano Fanjakana no foiben’ny fanompoam-pivavahana marina eo amin’ny faritra iray. Noho izany, dia tokony hohajaintsika fatratra izy io. Tokony hahatsapa ny ilana ny handraisana anjara amin’ny fihazonana azy io ho madio sy tsy ho simba isika rehetra. Mazàna ny fanadiovana no alamina isaky ny Fianarana ny Bokin’ny Kongregasiona, miaraka amin’ny mpitarika ilay fianarana na ny mpanampy azy. Toy izany ve no izy ao amin’ny kongregasionanao? Raha tsia, ary raha mety ny hanaovana azy toy izany, dia hanao fandaminana momba izany ireo loholona. Misy àry fotoana hahavoatendry ny fianarana ny boky misy antsika hanadio ny efitrano. Raha mbola azontsika atao koa ny mandray anjara amin’izany asa izany, dia tokony haniry hanao izany isika, ka hampiseho ny fankasitrahantsika ny fananana toeram-pivoriana madio sy manintona. Afaka manome ohatra tsara ny loholona sy ny mpanampy amin’ny fanompoana, rehefa mandray anjara feno miaraka amin’ny mpikambana ao amin’ilay fianarana ny boky izy ireo.
3 Isika rehetra dia afaka mampiseho fiahiana ny Efitrano Fanjakana, na voatendry hanadio isika na tsia. Amin’ny fomba ahoana? Amin’ny fanaovan-javatra tsotra, toy ny famafana ny tongotsika rehefa miditra ao amin’ilay efitrano mba tsy hitondrana loto. Marina indrindra izany rehefa ratsy ny andro. Raha mampiasa ny trano fivoahana isika, dia afaka mamafa ny manodidina ilay toerana fisasana rehefa avy mampiasa azy io, mba hamelana azy hadio ho an’ilay olona manaraka. Ireo izay miasa eo amin’ny latabatra famoahana boky sy gazety dia afaka mampiseho ny fiahiany amin’ny fanariana avy hatrany ireo baoritra foana. Raha mahita taratasy na fakofako miparitaka eo amin’ny tany isika, dia tokony hitsimpona azy ireny, fa tsy hiandry ny olon-kafa hanao izany.
4 Toy izany koa no foto-pitsipika mihatra rehefa manatrika fivoriambe isika. Foiben’ny fanompoam-pivavahana madio ny toerana fanaovana fivoriambe, na iray amin’ny Efitrano Fivoriambentsika izany na toeran-kafa, ka tokony hohajaintsika. Tokony hojerentsika tsara foana sao misy fakofako ao anatiny sy ivelan’ny Efitrano Fivoriambe, ary koa, rehefa miainga isika dia tokony hahazo antoka fa tsy namela fakofako teo amin’izay nipetrahantsika. Tokony hanana toe-tsaina vonon-kanampy isika ary tsy hihevitra fa eo ireo notendrena hanadio mba hitsimpona azy ireny rehefa lasa isika.
5 Ny fanehoam-piheverana feno fitiavana ny hafa, ny fifampiresahana tsara, ny fiomanana mialoha ary ny fiaraha-miasa dia hanampy mba hihazonana fifandraisana mafana ao amin’ny kongregasiona sy hanao izay hahazoana antoka fa ‘hatao amin’ny fahamendrehana sy ny filaminana ny zavatra rehetra’. (1 Kor. 14:40). Ankoatra izany, raha vonona ny hanao ny anjarantsika isika rehetra, dia hanana trano fivavahana mahafinaritra, ka hampiavaka antsika ho vahoaka madio izay manome voninahitra an’i Jehovah Andriamanitra izany. — 1 Pet. 1:16.