Ampio ny Olona Hanome Voninahitra An’i Jehovah
1 Misy hafatra lehibe ambara amin’ny olona eran-tany ankehitriny: “Matahora an’Andriamanitra, ka omeo voninahitra Izy; fa tonga ny andro fitsarany; ary miankohofa eo anoloan’Izay nanao ny lanitra sy ny tany sy ny ranomasina ary ny loharano.” (Apok. 14:6, 7) Manana tombontsoa isika satria anisan’ny manambara izany. Inona no tokony ho fantatry ny olona momba an’i Jehovah, mba hatahorany azy sy hivavahany aminy?
2 Ny anarany: Mila mahafantatra ny anaran’ilay hany Andriamanitra marina ny olona, mba hanavahany azy amin’ireo andriamani-diso maro be ivavahana ankehitriny. (Deot. 4:35; 1 Kor. 8:5, 6) Raha ny marina, dia nampiasa ny anaran’Andriamanitra be voninahitra im-7 000 mahery ireo mpanoratra ny Baiboly. Tsy tokony hafenintsika mihitsy na tsy hampiasaintsika ny anaran’Andriamanitra. Ny sitrapon’Andriamanitra dia ny hahalalan’ny olombelona rehetra ny anarany.—Sal. 83:18.
3 Ny toetrany: Mila mahafantatra ny olona hoe Andriamanitra manao ahoana i Jehovah, mba hahafahany hanome voninahitra azy. Tsy maintsy ampianarintsika azy ireo fa miavaka i Jehovah noho ny fitiavany tsy manam-paharoa, ny fahendreny tapitra ohatra, ny fanaovany ny rariny tanteraka, ary ny heriny tsitoha. Tsy maintsy ampianarintsika azy koa ny toetrany hafa, toy ny famindram-po sy ny hatsaram-panahy miharo fitiavana. (Eks. 34:6, 7) Tsy maintsy mianatra ny hatahotra an’i Jehovah Andriamanitra sy hanaja lalina azy koa ny olona, satria miankina amin’ny fahazoana sitraka aminy ny fiainan’izy ireo.—Sal. 89:7.
4 Manatona akaiky an’Andriamanitra: Tsy maintsy miantso an’i Jehovah Andriamanitra amim-pinoana ny olona mba ho voavonjy amin’ilay fitsarany ho avy. (Rom. 10:13, 14; 2 Tes. 1:8) Tsy ampy àry ny mahalala fotsiny ny anaran’Andriamanitra sy ny toetrany. Tsy maintsy ampiantsika ny olona hanana fifandraisana manokana amin’i Jehovah sy hitoky aminy amin’ny fony manontolo. (Ohab. 3:5, 6) Hitombo ny finoany ka hanatona akaiky an’Andriamanitra izy, rehefa mampihatra izay ianarany sy mivavaka amin-kafanam-po ary mahatsapa ny fanampian’i Jehovah eo amin’ny fiainany.—Sal. 34:8.
5 Enga anie isika hazoto hanambara ny anaran’Andriamanitra, ary hanampy ny olona hitoky aminy tanteraka sy hatahotra azy. Mety mbola ho azontsika atao ny manampy olona maro kokoa hahafantatra an’i Jehovah, ka hanome voninahitra azy, ilay “Andriamanitry ny famonjena.”—Sal. 25:5.