Fiteny Tsotra, Tsy Amboamboarina

NY FITENINAO tsotra sy tsy amboamboarina no antony iray ihainoan’ny hafa anao amim-patokisana. Moa tokoa ve ianao hatoky ny teny lazain’ny olona iray manao saron-tava? Ary raha tsara tarehy kokoa noho ny tena endrik’ilay miteny ilay saron-tava, hatoky ny teniny ve ianao? Azo inoana fa tsia. Aza manafin-toetra àry, fa izay maha ianao anao aseho.

Tsy hoe tsy miraharaha akory ny hoe tsotra sy tsy amboamboarina. Tokony hohalavirina ny fitsipi-pitenenana diso sy ny fanononana ratsy ary ny fitenenana mingonongonona. Toy izany koa ny tenin-jatovo. Tiantsika ho mendrika foana ny fitenintsika sy ny fombantsika. Ny olona maneho fihetsika tsotra sy tsy amboamboarina dia sady tsy fatra-panaja loatra no tsy mitady loatra ny hanaitra ny sain’ny hafa.

Eny amin’ny fanompoana. Matahotahotra ve ianao, rehefa handeha hitory ao amin’ny trano iray na amin’ny olona iray eny ampahibemaso? Toy izany ny ankamaroantsika. Tsy misinda vetivety anefa izany ho an’ny olona sasany. Mety ho farina na hangovingovitra ny feony, rehefa matahotahotra izy. Mety hanao fihetsika mikaviavia koa ny tanany na ny lohany.

Antony maro no mety hahatonga ny mpitory hatahotahotra toy izany. Angamba izy mieritreritra momba izay hoheverin’ny hafa momba azy, na manontany tena raha hety ny famelabelarany. Tsy mahagaga ny toy izany, nefa tonga zava-manahirana ilay izy, rehefa lasa diso tafahoatra. Raha manjary matahotahotra ianao alohan’ny fanompoana, inona moa no hanampy anao? Ny fanomanana tsara sy ny fivavahana mafy amin’i Jehovah. (Asa. 4:29) Eritrereto ny famindram-po lehiben’i Jehovah, izay mampanantena fahasalamana tonga lafatra sy fiainana mandrakizay ao amin’ny Paradisa. Eritrereto ireo iezahanao hampiana sy mila mandre izany vaovao tsara izany.

Tadidio koa fa manana safidy malalaka ny olona, izany hoe afaka manaiky na mandà ilay hafatra. Efa toy izany no izy, fony i Jesosy nitory teo amin’ny Isiraely fahiny. Ny hitory fotsiny no asaina ataonao. (Matio 24:14) Na dia tsy mamela anao hiteny aza ny olona sasany, ny fahatongavanao eo aminy fotsiny dia efa fitoriana aminy. Efa nahomby ianao, satria manaiky hampiasain’i Jehovah mba hanatanterahana ny sitrapony. Rehefa avelan’ny olona hiteny kosa ianao, tokony hanao ahoana moa ny fiteninao? Mianara hifantoka amin’ireo zavatra ilain’ny hafa, dia hahafinaritra sy ho tsotra ny teninao.

Tsy ho saikatsaikatra ireo mihaino anao, raha manao zavatra sy miteny toy ny ataonao andavanandro ianao, rehefa mitory. Mety ho vonona handray ireo fanazavana ara-baiboly tianao holazaina aminy mihitsy aza izy ireo. Aza anaovana toriteny na kabary izy, fa iresaho kosa. Aoka ianao ho sariaka. Anehoy fiheverana izy, ary ankasitraho izay lazainy. Mazava ho azy fa raha misy fomba fiteny na fitsipika fanehoam-panajana tokony harahina eo an-toerana, dia araho izany. Aza misalasala mihitsy anefa mitsiky.

Eny amin’ny lampihazo. Ny fiteny tsotra, toy ny rehefa miresaka andavanandro, no tsara indrindra, rehefa miteny amin’olona maromaro ianao. Mila miteny mafy kokoa sy mazava kokoa ianao, rehefa be dia be ny mpanatrika. Raha mitady hianatra tsianjery ny anjaranao na ny lahateninao ianao, na raha be tsipiriany loatra ny taratasinao, dia milaza izany fa miahy loatra momba ireo teny hilazanao hevitra ianao. Ilaina ny milaza zavatra amin’ny fomba mety, nefa rehefa eritreretinao be loatra ilay izy, dia hanjary hentitra be ny fiteninao, ary tsy ho tsotra intsony. Tokony hoeritreretina tsara mialoha ireo hevitrao, nefa tsy ny teny tsirairay hilazana azy no ifantohy, fa ireo hevitra.

Marina koa izany, rehefa adinadinina amin’ny fivoriana ianao. Manaova fanomanana tsara, nefa aza vakina na ianarana tsianjery ny valin-teninao. Mitenena toy ny rehefa miresaka andavanandro, mba hahafinaritra ny teninao, satria mandeha ho azy, tsy teriterena.

Na dia ireo toetra tsara ilaina amin’ny fahaiza-miteny aza dia mety ho hitan’ny mpihaino ho toy ny amboamboarina, rehefa tafahoatra. Ohatra, tokony hazava tsara ny teninao, ary tsy ho diso ny fomba fanononao; nefa raha ataonao tafahoatra izany, dia ho toy ny hentitra be na amboamboarina ny fiteninao. Hanome aina ny anjaranao na ny lahateninao, ny fihetsehana ho fanamafisana na ho fanazavana koa, rehefa atao tsara. Tsy hifantoka amin’izay lazainao anefa ny mpihaino, raha tsy mandeha ho azy na mihoa-pampana ireo fihetsehana. Mitenena mafy tsara, nefa aza miteny mafy loatra. Tsara raha mirehidrehitra tsindraindray ianao mandritra ny famelabelaranao; nefa aza atao mihoatra ny mety izany. Ilaina koa ny fanovaovam-peo sy ny hafanam-po ary ny fihetseham-po, nefa aza atao hisarihana ny sain’ny mpihaino ho amin’ny tenanao, na hahasaikatsaikatra azy ireo.

Misy olona miteny tsy misy diso mihitsy, na dia rehefa miresaka andavanandro aza. Ny hafa kosa tsy dia mitandrina loatra toy izany, rehefa miteny. Ny zava-dehibe dia ny hampiasanao fomba fiteny tsara isan’andro sy ny hanananao fihetsika mendrika ny Kristianina. Amin’izay, rehefa eny amin’ny lampihazo ianao, dia handeha ho azy kokoa ny fitenenana sy ny fihetsehana tsotra, ka hahafinaritra ny hafa.

Rehefa mamaky teny ampahibemaso. Mitaky ezaka ny famakian-teny ampahibemaso amin’ny fomba tsotra sy tsy amboamboarina. Mila mamantatra ireo hevitra lehibe indrindra ao amin’ilay zavatra hovakinao ianao, sy mijery ny fomba amelabelarana azy ireo. Hazòny tsara ao an-tsaina izy ireo; raha tsy izany, dia ho teny tsirairay fotsiny no hovakinao. Hamarino ny fomba fanonona ireo teny tsy hainao. Manaova famerenana amin’ny feo avo, ka mizàra hanovaova ny feonao hiakatra sy hidina, sy hamaky miaraka ireo teny tokony hiaraka mba hampita hevitra mazava. Averimbereno izany, mandra-pamakinao misosa tsara. Fantaro tsara ilay zavatra hovakinao, mba ho toy ny resaka velombelona ny vakiteninao. Izany no atao hoe vakiteny tsotra, tsy amboamboarina.

Ireo bokintsika no tena anaovantsika vakiteny ampahibemaso. Ankoatra ny anjara famakian-teny ataontsika amin’ny Sekolin’ny Fanompoana, dia mamaky andinin-teny koa isika eny amin’ny fanompoana sy rehefa manao anjara na lahateny eny amin’ny lampihazo. Tendrena hamaky ireo fehintsoratra amin’ny Fianarana Ny Tilikambo Fiambenana sy amin’ny Fianarana Boky, ireo rahalahy. Misy rahalahy mahay sasany tendrena hanao lahateny vakina amin’ny fivoriamben’ny vondrom-paritra. Ataovy velombelona ireo tapany misy tenin’olona mifamaly, na Baiboly no vakinao, na zavatra hafa. Somary ovaovay isaky ny olona ny feonao, raha resaka ifanaovan’olona maromaro no ao. Teny kely fampitandremana: Aza atao tafahoatra ny fanehoana fihetseham-po, fa ataovy velombelona kosa ny vakiteninao.

Toy ny resaka andavanandro ny fandrenesana ny vakiteny tsotra sy tsy amboamboarina, ary mitory fatokisan-tena.