Fahatoniana

ZAVA-MAHAZATRA izany hoe mpandahateny matahotahotra rehefa hitsangana ho eny amin’ny lampihazo izany, indrindra raha tsy manao lahateny matetika izy. Mety hatahotahotra koa ny mpitory iray, rehefa hanao ireo trano voalohany eny am-pitoriana. Tahaka izany koa i Jeremia, rehefa nirahina mba ho mpaminany izy, dia namaly hoe: “Indro, tsy mahay mandaha-teny aho, fa mbola zaza.” (Jer. 1:5, 6) Nanampy azy anefa i Jehovah, ary hanampy anao koa izy. Hanana fahatoniana ianao rehefa mandeha ny fotoana.

Milamina ny mpandahateny tony iray, ary miharihary amin’ny fomba fihetsiny izany. Tsy amboamboariny no sady mifanentana tsara amin’ny toe-javatra ny fijorony na ny fipetrany. Misy heviny ny fihetsehana ataon’ny tanany. Maneho fihetseham-po tsara ny feony, sady voafehiny tsara.

Afaka ny hihatsara ianao, na dia tsy manana izany toetra izany aza. Amin’ny fomba ahoana? Aoka isika handinika ny antony mahatonga ny mpandahateny iray hatahotahotra sy tsy ho tony. Mety ho antony ara-batana ilay izy.

Mitebiteby ianao rehefa miatrika zava-tsarotra, ka maniry handamina izany araka ny tokony ho izy, nefa tsy matoky tena ny hahavita izany. Ho vokany, dia mibaiko ny vatanao hamokatra adirenalinina bebe kokoa ny atidohanao. Ny adirenalinina dia ranoka mikoriana ao amin’ny lalan-dra izay mety hanafaingana ny fitepon’ny fo, hanova ny hafainganan’ny fisefoana, hampitombo ny hatsembohana, na hahatonga ny tanana sy ny lohalika ary ny feo hangovitra mihitsy aza. Milaza aminao izany rehetra izany fa mitady hanampy anao hizaka ilay tarehin-javatra ny vatanao, ka mampitombo ny herinao. Ahoana anefa no hamadihana izany hery izany ho tonga fisainana mampandroso sy fitenenana amin-kafanam-po?

Ny fomba hampihenana ny tebiteby. Tadidio fa ara-dalàna ny fahatsapana tebiteby. Mba hihazonana ny fahatonianao anefa, dia mila mahay mampihena izany tebiteby izany ianao, ka hanao zavatra amim-pilaminana sy amim-pahamendrehana. Ahoana no ahafahanao manao izany?

Manaova fanomanana tsara. Mandania fotoana hanomanana ny anjaranao na ny lahateninao. Ataovy azonao tsara ilay foto-kevitra horesahinao. Raha mila mifidy ireo hevitra hovelabelarinao ianao, dia eritrereto izay efa fantatry ny mpihaino anao momba ilay foto-kevitra, sy izay antenainao hotanterahina. Hanampy anao hifidy ny fanazavana mety indrindra izany. Miresaha amin’ny mpandahateny za-draharaha iray, raha sarotra aminao izany amin’ny voalohany. Afaka manampy anao hamakafaka ilay foto-kevitrao sy ireo hihaino anao izy. Rehefa matoky ianao fa tena hahasoa an’ireo hihaino anao ilay fanazavana, ka mazava tsara ao an-tsainao ilay izy, ny fanirianao hizara azy io amin’ny hafa dia handresy ilay tebiteby mety ho tsapanao rehefa hanao ilay anjara na lahateny.

Asio fiheverana manokana ny teny fampidiranao. Fantaro tsara ny fomba hanombohanao. Azo inoana fa hihena ny fahatahotahoranao eny am-panaovana ilay anjaranao na lahateninao.

Afaka manaraka ireo dingana ireo koa ianao, rehefa manomana ny fanompoanao eny amin’ny saha. Eritrereto ilay foto-kevitra tianao horesahina, ary koa ireo olona ho hitanao eny. Eritrereto tsara ny teny fampidirana hampiasainao. Tahafo ny ohatr’ireo mpitory matotra za-draharaha.

Mety hihevitra ianao hoe ho tony kokoa raha lahateny vakina no ampiasainao, rehefa manao anjara na lahateny. Raha ny tena izy anefa, dia mety ho vao mainka hitombo ny tebitebinao isaky ny hanao anjara na lahateny ianao. Marina fa misy mpandahateny manoratra lava be, fa ny hafa kosa manoratra teny fohy vitsivitsy monja. Tsy ireo soratra eo amin’ilay taratasy anefa no hanova izay hifantohan’ny sainao sy hampihena ny tebitebinao, fa ny fatokisanao ao am-po hoe nanomana zavatra tena mendrika ny hohenoin’ny mpihaino anao ianao.

Manaova famerenana amin’ny feo avo. Hahatonga anao hatoky izany fa afaka milaza tsara ireo eritreritrao ianao. Eo am-panaovanao famerenana ianao dia mandraikitra hevitra ao an-tsainao, izay hiverina mora foana rehefa manao ilay anjara na lahateny ianao. Ataovy toy ny amin’ny tena izy ny fanaovanao famerenana. Ataovy hitanao an’eritreritra ny mpihaino anao. Mipetraha eo anoloan’ny latabatra, na mijoroa, toy ny rehefa tena manao ilay anjara na lahateny ianao.

Mivavaha mba hahazoana ny fanampian’i Jehovah. Hamaly vavaka toy izany ve izy? “Izao no fahasahiana ananantsika eo anatrehany: Raha mangataka zavatra araka ny sitrapony isika, dia mihaino antsika Izy.” (1 Jaona 5:14) Tena hamaly ny vavakao tokoa Andriamanitra raha ny hanome voninahitra azy sy hanampy olona handray soa avy amin’ny Teniny no fanirianao. Hanatanjaka anao hanao ny anjaranao izany fanomezan-toky izany. Ankoatra izany, rehefa mamboly ny vokatry ny fanahy ianao—fitiavana, fifaliana, fiadanana, fahalemem-panahy, ary fifehezan-tena—dia hahazo ilay toe-tsaina ilaina mba hiatrehana ireo toe-javatra sarotra amim-pahatoniana.—Gal. 5:22, 23.

Aoka ianao ho tonga za-draharaha. Arakaraka ny andraisanao anjara amin’ny fanompoana, no hihenan’ny fahatahotahoranao. Arakaraka ny anomezanao valin-teny any amim-pivoriana, no hahitanao fa mihamora ny miteny eo anoloan’olon-kafa. Arakaraka ny itomboan’ny isan’ny anjara ataonao eo amin’ny fiangonana, no hihenan’ny tebiteby tsapanao alohan’ny anjara tsirairay. Tianao ve ny ho afaka hiteny matetika kokoa? Aza misalasala àry manolo-tena hisolo toerana ny hafa izay tsy afaka manao ny anjarany.

Rehefa vitanao ireo dingana nosoritana teo ambony ireo, dia hanampy anao ny mijery ireo famantarana manambara fa tsy tony ianao. Fantaro izy ireo, ka ianaro ny fomba handresena azy, dia hahay hiteny amim-pahatoniana ianao. Mety ho eo amin’ny vatanao na ny feonao no hahitana izany famantarana izany.

Famantarana eo amin’ny vatana. Hita eo amin’ny fomba fanetsehanao ny vatanao sy ny fampiasanao ny tananao ny fahatonianao, na ny tsy fahatonianao. Diniho aloha ny tananao. Izao avy no manambara tsy fahatoniana: Ny tanana fihinina any andamosina, henjanina mafy manaraka ny vatana, na mamikitra ny polipitra; ny tanana ampidirina sy avoaka ao am-paosy tsy an-kijanona, manidy sy manokatra ny palitao, mankeny amin’ny takolaka, ny orona, ny solomaso; ny tanana mikasikasika famantaranandro, penina, peratra, na taratasy; ny tanana manao fihetsehana tampoka na tsy vita hatramin’ny farany.

Hita koa fa tsy matoky tena ny mpandahateny iray, raha manisakisaka ny tongony tsy an-kijanona, manilangilana ny vatany miankavia sy miankavanana, mijoro mijaridina be, mijoro na mipetraka toy ny olona tsy rototra, milela-molotra matetika, mitelin-drora foana, na misefosefo.

Hahafehy ireo fihetsehana ireo ianao, raha miezaka mafy. Aza mitady hanitsy azy rehetra miaraka anefa. Fantaro ilay olana mahazo anao, ary eritrereto mialoha izay ilainao hatao mba hisakanana azy. Raha manao izany ezaka izany ianao, dia ho hita amin’ny fihetsehan’ny vatanao fa tony ianao.

Famantarana eo amin’ny feo. Izany dia mety ho feo kely tsy araka ny mahazatra, na feo mangovingovitra. Angamba ianao mikohakohaka foana mba hampisava ny feonao, na miteny haingana loatra. Azonao resena ireo zava-manahirana sy fahazaran-dratsy ireo, raha miezaka mafy hifehy ny feonao ianao.

Miatoa mba hifoka rivotra lalina, alohan’ny hiakaranao eny amin’ny lampihazo, raha matahotahotra ianao. Mianara tsy hampihenjana ny vatanao manontolo. Aza eritreretina ilay ianao matahotahotra. Ny antony anirianao hizara amin’ny mpihaino anao ireo zavatra nomaninao kosa no ifantohy. Alohan’ny hitenenana, dia makà fotoana hijerena ny mpanatrika, mifidiana endrika sariaka iray, ary mitsikia aminy. Tonòny miadana ny teny fampidirana, ary avy eo dia aoka ianao ho revo amin’ny lahateninao.

Inona no azonao antenaina? Aza manantena hoe hanjavona tanteraka ny fahatsiarovana ho matahotahotra. Mpandahateny maro za-draharaha hatramin’ny ela be no mbola matahotahotra ihany alohan’ny hankanesana eny amin’ny lampihazo. Nianatra ny hifehy izany anefa izy ireo.

Ho hitan’ny mpanatrika fa mpandahateny tony ianao, raha miezaka mafy mba tsy ho tsikaritra hoe matahotahotra. Mbola mety hatahotahotra ihany ianao, nefa mety ho tsy hitan’izy ireo akory izany.

Tadidio fa ilay adirenalinina mampipoitra ny famantarana ny fahatahotahoranao dia mampitombo ny herinao koa. Ampiasao io hery io mba hitenenana amim-pihetseham-po.

Aza miandry rehefa eny amin’ny lampihazo vao hampihatra ireny torohevitra rehetra ireny. Mianara ho tony sy hifehy tena ary hiteny amim-pihetseham-po mety, eo amin’ny fiainanao andavanandro. Tena hanampy anao izany hanana fatokisan-tena eny amin’ny lampihazo sy eny amin’ny fanompoana, ary eny izy io no tena zava-dehibe.