Tandremo Tsara Hatrany ny Fomba Ampiasanao ny Fotoananao
1 Efa betsaka ankehitriny ny fitaovana manampy ny olona hitsitsy fotoana sy tsy hiasa be. Toa vao mainka be atao sy tsy manam-potoana firy anefa ny olona maro. Sarotra aminao ve ny manao zavatra ara-panahy tsy tapaka? Te hanana fotoana bebe kokoa hanompoana ve ianao? Ahoana no ampiasantsika amin’ny fomba tsara indrindra ny fotoanantsika?—Sal. 90:12; Fil. 1:9-11.
2 Fantaro ireo zavatra mandanilany ny fotoananao: Tokony handinika tsindraindray ny fomba ampiasantsika ny fotoanantsika isika rehetra. Mampirisika antsika ny Baiboly hoe: “Mitandrema tsara hatrany mba tsy hitondranareo tena tahaka ny adala, fa tahaka ny hendry, ka hararaoty tsara ny fotoana, fa ratsy izao andro izao.” (Efes. 5:15, 16) Eritrereto ny habetsahan’ny fotoana mety ho lanilany fotsiny hijerena tele sy video. Mety ho lasa fandrika ho antsika koa ny ordinatera sy ny fitaovana elektronika hafa, na dia ilaina aza, raha tsy mitandrina tsara hatrany isika mba tsy handany fotoana be loatra amin’izy ireny.—1 Kor. 7:29, 31.
3 Tokony hanontany tena isika tsirairay hoe: ‘Mandany fotoana hamakiana na hamaliana ny e-mail tonga ao amiko ve aho isan’andro, na dia tsy zava-dehibe akory aza ilay izy? Miantso matetika amin’ny telefaonina na mandefa hafatra tsy dia misy dikany amin’ny telefaonina ve aho? (1 Tim. 5:13) Mijerijery ny zava-misy ao amin’ny Internet fotsiny ve aho, na manovaova tsy amin’ny antony ny fandaharana jereko ao amin’ny tele? Variana loatra manao lalao video ve aho, ka manomboka tsy manam-potoana hianarana ny Tenin’Andriamanitra?’ Mety hanimba tsikelikely ny fahasalamantsika ara-panahy ireo rehetra ireo.—Ohab. 12:11, fanamarihana ambany pejy.
4 Ampiasao amim-pahendrena ny fotoananao: Mandany ny fotoanantsika sy mitana ny saintsika mazàna ny fitaovana elektronika. Tena variana nanao lalao tamin’ny ordinatera, ohatra, ny tanora iray. Niaiky toy izao izy: “Sarotra be tamiko indraindray ny nifantoka teny amin’ny fanompoana sy tany amin’ny fivoriana kristianina, rehefa avy nanao lalao tamin’ny ordinatera aho. Variana nieritreritra aho hoe inona no tetika hampiasaiko mba handreseko amin’ilay lalao, rehefa tonga any an-trano aho. Lasa nanao an-tsirambina ny fianarana samirery sy ny famakiana Baiboly tsy tapaka aho. Nanomboka tsy nahafaly ahy intsony ny fanompoana an’Andriamanitra.” Tsapan’io tanora io fa nila niova izy, ka nesoriny daholo ny lalao rehetra tao amin’ny ordinaterany. Hoy izy: “Tena mafy ny nanao izany. Tsy araka ny noeritreretiko fa hay tena tia nanao lalao tamin’ny ordinatera aho. Tsapako anefa fa tena nandresy aho rehefa avy nanala ilay izy, satria mahasoa ahy izany.”—Matio 5:29, 30.
5 Mety hila ny handray fepetra toy izany koa ianao, raha misy zavatra sasany tokony hovana. Azonao anesorana antsasak’adiny isan’andro ve ny fotoana hanaovanao zavatra tsy dia ilaina? Antsasak’adiny eo ho eo isan’andro mantsy no ilainao, raha te hahavaky ny Baiboly manontolo ao anatin’ny herintaona ianao. Azo antoka fa tena hahasoa anao eo amin’ny lafiny ara-panahy izany! (Sal. 19:7-11; 119:97-100) Manokàna fotoana hentitra hamakiana Baiboly sy hanomanana fivoriana ary hanompoana eny amin’ny saha. (1 Kor. 15:58) Hanampy anao tsy handanilany foana ny fotoananao izany, ary hanampy anao ‘hamantatra hatrany izay sitrapon’i Jehovah.’—Efes. 5:17.
[Fanontaniana]
1. Inona no zava-tsarotra atrehin’ny olona hatraiza hatraiza ankehitriny?
2, 3. Inona no zava-tsarotra entin’ny fitaovana elektronika sy ny ordinatera, ary inona no fandinihan-tena tokony hataontsika tsirairay?
4. Inona no fiovana nataon’ny tanora iray, ary nahoana?
5. Ahoana no ahitantsika fotoana hanaovana zavatra ara-panahy, ary inona no soa raisintsika avy amin’izany?