Fampaherezana sy Fanatanjahana ny Mpihaino

TOKONY ho afaka hahazo fampaherezana eo anivon’ny fiangonana kristianina ny mpanompon’Andriamanitra, na inona na inona zava-manahirana mahazo azy. Izany indrindra no mahatonga ny anti-panahy ho tsy maintsy miezaka mba hampahery amin’ny alalan’ny lahateniny sy ny toroheviny. Tokony “ho fierena amin’ny rivotra sy ho fialofana amin’ny ranonoram-baratra [izy ireo]; ho ranovelona ao amin’ny tany karankaina . . ., ho alo-batolampy lehibe amin’ny tany mahana.”—Isaia 32:2.

Raha anti-panahy ianao, moa ve ireo lahateninao mamelombelona sy mampionona? Manatanjaka an’ireo miezaka hanompo an’i Jehovah amim-pahatokiana ve izy ireny? Moa ve izy ireny manome hery hifikirana amin’ny fanompoana an’Andriamanitra, na dia tsy miraika sy manohitra aza ny ankamaroan’ny olona? Ahoana raha ketraka ny sasany amin’ny mpihaino, satria vesaran’ny zava-manahirana ara-bola, na miady amin’ny aretina hahafaty azy? Afaka ‘mampahery ny rahalahinao amin’ny fampiononana ataon’ny molotrao’ ianao.—Joba 16:5.

Ampiasao ny fahafahanao mandaha-teny mba hanampiana ny rahalahinao hanovo fanantenana sy tanjaka avy amin’i Jehovah sy ireo fandaharana nataony.—Rom. 15:13; Efes. 6:10.

Ampahatsiahivo ny zavatra efa nataon’i Jehovah. Anisan’ny tena mampahery ny fampisehoana ny fomba nanampian’i Jehovah ny vahoakany nandia fotoan-tsarotra fahiny.—Rom. 15:4.

Nasain’i Jehovah ‘nampaherezin’i Mosesy’ sy ‘nampahatanjahiny’ i Josoa, talohan’ny nidiran’ny Isiraely ny Tany Nampanantenaina, izay feno firenena fahavalo. Ahoana no nanaovan’i Mosesy izany? Nampahatsiahiviny an’ilay firenena manontolo, teo anatrehan’i Josoa, ireo zavatra nataon’i Jehovah fony izy ireo niala tany Ejipta. (Deot. 3:28; 7:18) Notantarain’i Mosesy koa ny nanampian’i Jehovah azy ireo handresy ny Amorita. Avy eo, dia hoy i Mosesy tamin’i Josoa: “Mahereza sy matanjaha.” (Deot. 31:1-8) Rehefa miezaka hampahery ny rahalahinao ianao, moa ve ianao manampy azy hanovo tanjaka avy amin’ny fitadidiana izay efa nataon’i Jehovah ho azy ireo?

Tototry ny zava-manahirana loatra ny olona sasany indraindray, ka manontany tena raha mba hahita ireo fitahiana hoentin’ilay Fanjakana. Ampahatsiahivo azy ireo fa azo ianteherana ny fampanantenan’i Jehovah.—Josoa 23:14.

Misy tany andraran’ny fanjakana ny fitoriana ny vaovao tsara. Azon’ireo anti-panahy any amin’izany tany izany ampiana ny mpiray finoana aminy, mba hanovo tanjaka avy amin’ireo zavatra niainan’ny apostolin’i Jesosy Kristy. (Asa. 4:1–5:42) Ary tena hampahery an’ireo rahalahy raha asongadiny ny fomba nitarihan’Andriamanitra ny toe-javatra, araka ny tantarain’ny bokin’i Estera.

Indraindray, dia misy olona manatrika fivoriana, nefa tsy manao fandrosoana fanampiny. Mety hihevitra izy ireny fa tsy hamela ny fahotany mihitsy Andriamanitra, noho ny fiainany taloha ratsy loatra. Tantarao aminy ny nataon’i Jehovah tamin’i Manase Mpanjaka. (2 Tant. 33:1-16) Na resaho ny amin’ireo mponin’i Korinto fahiny, izay nanova ny fomba fiainany, ka tonga Kristianina, ary nambaran’Andriamanitra fa marina.—1 Kor. 6:9-11.

Mihevitra ve ny sasany fa tsy ankasitrahan’Andriamanitra intsony izy ireo matoa iharan-java-manahirana? Ampahatsiahivo azy ny nanjo an’i Joba sy ny fitahiana tondraka azony, noho izy nifikitra sy tsy nivadika tamin’i Jehovah. (Joba 1:1-22; 10:1; 42:12, 13; Sal. 34:19) Niampanga an’i Joba ho nanota ireo mpampionona sandoka. (Joba 4:7, 8; 8:5, 6) Nifanohitra tamin’izany kosa ny nataon’i Paoly sy i Barnabasy, izay nanatanjaka an’ireo mpianatra ka “nampahery . . . azy haharitra amin’ny finoana”, ary nanao hoe: “Tsy maintsy ho amin’ny fahoriana be no idirantsika amin’ny fanjakan’Andriamanitra.” (Asa. 14:21, 22) Toy izany koa ankehitriny, hatanjaho ireo mandia fisedrana, ka lazao fa takina amin’ny Kristianina rehetra ny fiaretana ao anatin’ny fahoriana, ary sarobidy eo imason’Andriamanitra izany.—Ohab. 27:11; Matio 24:13; Rom. 5:3, 4; 2 Tim. 3:12.

Ampirisiho ny mpihaino hieritreritra ny amin’ny fomba nanatanterahan’i Jehovah ny teniny teo amin’ny fiainan’izy ireo manokana. Fampahatsiahivana kely fotsiny dia mety ho ampy mba hahitany fa efa nanao zavatra ho azy ireo i Jehovah, araka ny nampanantenainy. Hoy ny Salamo 32:8: “Hanome saina anao sy hampianatra anao izay làlan-kalehanao Aho; hitsinjo anao ny masoko ka hanolo-tsaina anao Aho.” Ampio ny mpihaino hitadidy ny fitarihana na ny fampaherezana efa nomen’i Jehovah azy. Ho hitany amin’izay fa tena miahy azy manokana i Jehovah, ary mbola hanampy azy koa hizaka izay fisedrana mahazo azy ankehitriny.—Isaia 41:10,  13; 1 Pet. 5:7.

Asehoy fa mahafaly anao izay ataon’Andriamanitra ankehitriny. Rehefa miezaka hampahery ny rahalahinao ianao, dia resaho aminy ny zavatra efa ataon’i Jehovah ankehitriny. Asehoy amin’ny teninao fa mahafaly anao izy ireny, dia ho toy izany koa no ho tsapan’ny mpihaino ao am-pony.

Resaho ny fomba anampian’i Jehovah antsika hizaka ireo faneren’ny fiainana. Asehony antsika ny fomba fiaina tsara indrindra. (Isaia 30:21) Hazavainy ny antony isian’ny heloka bevava, ny tsy rariny, ny fahantrana, ny aretina, sy ny fahafatesana, ary ampahafantariny fa hofaranany ireo rehetra ireo. Omeny fianakavian’ny mpirahalahy be fitiavana koa isika. Tolorany fanomezana sarobidy isika, dia ny vavaka. Nanankinany tombontsoa ho Vavolombelony isika. Ampahafantariny antsika fa efa Mpanjaka any an-danitra i Kristy, ary hifarana tsy ho ela ny andro faran’ity tontolo tranainy ity.—Apok. 12:1-12.

Ankoatra izany rehetra izany, dia mbola eo koa ireo fivoriana sy fivoriambe. Resaho amim-pankasitrahana ireo fandaharana ireo, dia vao mainka ho tapa-kevitra kokoa ny hafa tsy hanao tsirambina ny fiaraha-mivory amin’ny rahalahiny.—Heb. 10:23-25.

Mampahatanjaka koa ny fandrenesana fa tahin’i Jehovah ny ezaka ataontsika eo amin’ny fanompoana. Tamin’ny taonjato voalohany, fony i Paoly sy i Barnabasy nankany Jerosalema, dia “nampifaly ny rahalahy rehetra indrindra” izy ireo, tamin’ny fitantarana ny niovan’ny jentilisa. (Asa. 15:3) Afaka mampifaly ny rahalahinao koa ianao, raha mitantara aminy zavatra mampahery.

Vao mainka hahazo fampaherezana ny hafa, raha ampiana hahita ny hasarobidin’izay ataony. Derao izy ireo, noho izay ataony eo amin’ny fanompoana kristianina. Derao ireo miaritra sy tsy mivadika, na dia tsy mahavita firy aza, noho ny fahanterana sy ny aretina. Ampahatsiahivo azy fa tsy hadinon’i Jehovah ny fitiavana asehon’izy ireo ho an’ny anarany. (Heb. 6:10) Fananana sarobidy tokoa ny finoana voazaha toetra ao anatin’ny fitsapana. (1 Pet. 1:6, 7) Ilaina hampahatsiahivina ny amin’izany ireo rahalahintsika.

Resaho amim-pihetseham-po ilay fanantenana ho avy. Tena loharanom-pampaherezana lehibe ho an’izay rehetra tia an’Andriamanitra ireo fampanantenany ny amin’ny hoavy. Efa nandre izany matetika angamba ny ankamaroan’ny mpihaino anao. Raha resahinao amim-pankasitrahana anefa izy ireny, dia ho velombelona indray, ka hatoky ny fahatanterahany ny mpihaino sady ho velom-pankasitrahana. Hanampy anao hanao izany ny fampiharanao ireo zavatra nianaranao tao amin’ny Sekolin’ny Fanompoana.

I Jehovah no ilay Mpampahery sy Mpanatanjaka ny vahoakany. Afaka miara-miasa aminy anefa ianao amin’izany. Hararaoty tsara ny fahafahana hanao izany, rehefa mandaha-teny ho an’ny fiangonana ianao.