Ezaka Manokana Eran-tany Hampahafantarana ny Fivoriamben’ny Vondrom-paritra “Araho ny Dian’i Kristy!”
Hizara Fanasana Manokana Indray ny Mpitory
1 Nanintona olona liana maro ilay ezaka manokana eran-tany nampahafantarana ny Fivoriamben’ny Vondrom-paritra “Akaiky ny Fanafahana!” tamin’ny taon-dasa. Sambany ireo nanaiky ilay fanasana manokana no nankafy sakafo ara-panahy be dia be niaraka tamin’ny Vavolombelon’i Jehovah. (Isaia 65:13) Nahafinaritra azy ireo ny nahita fa mifankatia sy miray saina isika. (Sal. 133:1) Hizara fanasana manokana indray isika eran-tany, mba hanampiana olona maro araka izay azo atao, hanatrika ny Fivoriamben’ny Vondrom-paritra “Araho ny Dian’i Kristy!”
2 Vokany tamin’ny taon-dasa: Araka ny tatitra voaray eran-tany, dia tena tsara ny vokatra azo tamin’ny nampahafantarana ny Fivoriamben’ny Vondrom-paritra “Akaiky ny Fanafahana!” Nankasitrahan’ny olona tany amin’ny toerana maro izany. Namoaka lahatsoratra lava momba ilay ezaka manokana, ohatra, ny gazety tany amin’ny tanàna iray, ka nilaza hoe: “Nanao hetsika manokana ny Vavolombelona teto amin’ny manodidina mba hanasana ny rehetra alohan’ilay fivoriambe, ka niasa ela kokoa, nandeha lavitra kokoa, ary niteny haingana kokoa.” Voalamina tsara ny fizarana an’ilay fanasana ka nanaitra ny sain’ny mpanao gazety tao amin’ny tanàna iray hafa. Nataony matoan-dahatsoratra àry ilay izy. Gazety telo, fara fahakeliny, no nankasitraka ny asantsika talohan’ilay fivoriambe. Lahatsoratra maromaro nameno pejy roa mahery no nosoratan’ny mpanangom-baovao, tao amin’ny gazety iray nivoaka alahady. Noresahin’izy io tamin’ny an-tsipiriany ny zavatra inoantsika, ny firahalahiantsika, ny fizarana an’ilay fanasana, ary ilay fivoriambe. Rehefa nanolotra an’ilay fanasana teo am-baravarana ny mpitory iray, dia notapahin’ilay tompon-trano ny teniny, ka hoy izy: “Vao namaky izany tao amin’ny gazety mihitsy aho izao!” Hoy ny olona iray hafa: “Vao avy namaky momba anareo tao amin’ny gazety aho, dia tonga ianareo! Ho ahy ve iny fanasana iny?” Hoy koa izy: “Mahafinaritra mihitsy izao ataon’ny Vavolombelon’i Jehovah izao!”
3 Maro tamin’ireo olona liana no hita nitondra fanasana teny an-tanany, rehefa namonjy ilay fivoriambe. Nanao dia lavitra ny sasany mba hanatrehana azy io. Nitombo be ny isan’ny mpanatrika noho isika nazoto nanasa olona. Nitombo 27 isan-jato, ohatra, ny mpanatrika tany amin’ny tany iray, raha oharina tamin’ny taona teo aloha.
4 Vitao ny faritaninareo: Hanomboka hizara ilay fanasana ianareo, telo herinandro alohan’ny fivoriambenareo. Tokony hiezahana hovitaina daholo ny faritanin’ny fiangonana. Raha lehibe ny faritanin’ny fiangonana, dia azon’ny mpitory asiana fanasana eo am-baravaran’ireo tsy tratra an-trano, mandritra ilay herinandro farany alohan’ny fivoriambe. Tokony ho malina anefa izy ireo rehefa manao izany. Tokony hiezaka hizara ny fanasana rehetra voarainy ny fiangonana, ary hamita faritany betsaka araka izay azo atao. Azon’ny mpisava lalana ampiasaina ny ambiny.
5 Inona no holazaina? Afaka milaza ianao hoe: “Misy ezaka manokana ataonay eran-tany, mba hanasana ny olona hanatrika fotoan-dehibe. Intỳ ny anjaranao. Ho hitanao ato amin’ity fanasana ity ny tsipiriany.” Ho betsaka ny ho voazara, raha tsy be resaka isika. Valio ihany anefa izay mety ho fanontanian’ilay olona. Raiso an-tsoratra izay olona liana, ka tsidiho haingana araka izay azo atao.
6 Tena ilaintsika ny miezaka hanara-dia an’i Kristy! (Jaona 3:36) Hanampy ny mpanatrika rehetra hanao izany indrindra, io fivoriambe io. Antenaina fa ho fitoriana miezinezina indray no ho vitantsika, noho ilay ezaka manokana hampahafantarana ny fivoriambe “Araho ny Dian’i Kristy!” Koa mazotoa manasa olona betsaka araka izay azo atao! Hotahin’i Jehovah anie ny ezaka ataonao, mba handraisana anjara amin’ity ezaka manokana eran-tany ifarimbonantsika ity!